2028ರ ಒಲಿಂಪಿಕ್ಸ್‌ನಲ್ಲಿ ಭಾರತ-ಪಾಕ್​ ಮಧ್ಯೆ ಹೈವೋಲ್ಟೇಜ್​ ಪಂದ್ಯ ನಡೆಯುತ್ತಾ? ಇಲ್ಲಿದೆ ನೋಡಿ ಉತ್ತರ...India-Pakistan Match

India-Pakistan Match : 2028ರಲ್ಲಿ ಲಾಸ್ ಏಂಜಲೀಸ್​ನಲ್ಲಿ ನಡೆಯಲಿರುವ ಒಲಿಂಪಿಕ್ಸ್‌ (Los Angeles 2028 Olympics) ಕ್ರೀಡಾಕೂಟದಲ್ಲಿ ಭಾರತ ಮತ್ತು ಪಾಕಿಸ್ತಾನ ನಡುವಿನ ಹೈ-ವೋಲ್ಟೇಜ್ ಕ್ರಿಕೆಟ್ ಪಂದ್ಯವನ್ನು ವೀಕ್ಷಿಸಬೇಕೆಂದು ಎದುರು ನೋಡುತ್ತಿದ್ದರೆ ಆ ಆಸೆಯನ್ನು ಬಿಟ್ಟು ಬಿಡಿ. ಏಕೆಂದರೆ, ಕ್ರೀಡಾಭಿಮಾನಿಗಳಿಗೆ ಭಾರಿ ಆಘಾತ ಎದುರಾಗುವ ಸುದ್ದಿಯೊಂದು ಹೊರಬಿದ್ದಿದೆ.

ಬರೋಬ್ಬರಿ 128 ವರ್ಷಗಳ ಸುದೀರ್ಘ ಕಾಯುವಿಕೆಯ ನಂತರ ಟಿ20 ಮಾದರಿಯಲ್ಲಿ ಒಲಿಂಪಿಕ್ಸ್‌ಗೆ ಕ್ರಿಕೆಟ್ ಮರಳಿದೆ. ಪೊಮೊನಾದಲ್ಲಿ ನಿರ್ಮಾಣವಾಗಲಿರುವ ವಿಶೇಷ ಕ್ರೀಡಾಂಗಣದಲ್ಲಿ ನಡೆಯುವ ಈ ಮಹಾಕೂಟದಲ್ಲಿ ಭಾಗವಹಿಸುವುದು ಅಷ್ಟು ಸುಲಭವಲ್ಲ, ಏಕೆಂದರೆ ಪುರುಷರ ಮತ್ತು ಮಹಿಳೆಯರ ಎರಡೂ ವಿಭಾಗಗಳಲ್ಲಿ ಕೇವಲ ಅಗ್ರ 6 ತಂಡಗಳಿಗೆ ಮಾತ್ರ ಇಲ್ಲಿ ಆಡಲು ಅವಕಾಶ ಸಿಗಲಿದೆ. ಈ ಪೈಕಿ 5 ಸ್ಥಾನಗಳನ್ನು ಐಸಿಸಿ ರ‍್ಯಾಂಕಿಂಗ್ ಮತ್ತು ಪ್ರಮುಖ ಟೂರ್ನಿಗಳ ಆಧಾರದ ಮೇಲೆ ಭರ್ತಿ ಮಾಡಲಿದ್ದರೆ, ಉಳಿದ ಕೊನೆಯ ಒಂದು ಸ್ಥಾನಕ್ಕಾಗಿ 2027ರಲ್ಲಿ 'ಐಸಿಸಿ ಒಲಿಂಪಿಕ್ಸ್ ಕ್ವಾಲಿಫೈಯರ್' ವೈಲ್ಡ್‌ಕಾರ್ಡ್ ಟೂರ್ನಿ ನಡೆಯಲಿದ್ದು, ಕಠಿಣ ಅರ್ಹತಾ ಮಾನದಂಡಗಳಿಂದಾಗಿ ಸಾಂಪ್ರದಾಯಿಕ ಎದುರಾಳಿಗಳಾದ ಭಾರತ-ಪಾಕ್ ಮುಖಾಮುಖಿ ಒಲಿಂಪಿಕ್ಸ್ ವೇದಿಕೆಯಲ್ಲಿ ಮಿಸ್ ಆಗುವ ಸಾಧ್ಯತೆ ದಟ್ಟವಾಗಿದೆ.

ಪುರುಷರ ಕ್ರಿಕೆಟ್ ತಂಡಗಳ ಒಲಿಂಪಿಕ್ ಅರ್ಹತಾ ಪ್ರಕ್ರಿಯೆಯು ಸಂಪೂರ್ಣವಾಗಿ ಐಸಿಸಿ ಅಧಿಕೃತ ಟಿ20 ರ‍್ಯಾಂಕಿಂಗ್ ಆಧಾರಿತವಾಗಿದೆ. ಮೊದಲ 5 ಸ್ಥಾನಗಳನ್ನು ನಿರ್ಧರಿಸಲು 2026, ಡಿಸೆಂಬರ್ 31 ಅನ್ನು ಅಂತಿಮ ಗಡುವಾಗಿ ನಿಗದಿಪಡಿಸಲಾಗಿದೆ. ಆತಿಥೇಯ ರಾಷ್ಟ್ರವಾಗಿ ಅಮೆರಿಕ ನೇರ ಅರ್ಹತೆ ಪಡೆಯಲು ಜೂನ್ 30, 2026 ರಿಂದ ಡಿಸೆಂಬರ್ 31, 2026 ರ ನಡುವೆ ಐಸಿಸಿ ಟಿ20 ರ‍್ಯಾಂಕಿಂಗ್‌ನಲ್ಲಿ ಟಾಪ್-15 ರೊಳಗೆ ಸ್ಥಾನ ಪಡೆಯಬೇಕೆಂಬ ಕಠಿಣ ನಿಯಮವಿದ್ದು, ಪ್ರಸ್ತುತ 13ನೇ ರ‍್ಯಾಂಕಿಂಗ್‌ನಲ್ಲಿರುವ ಕಾರಣ ಅದು ಮೊದಲ ದಿನವೇ ಈ ಅರ್ಹತೆ ತಲುಪಿದೆ.

ಇನ್ನು ಜಾಗತಿಕ ಪ್ರಾತಿನಿಧ್ಯಕ್ಕಾಗಿ ಐಒಸಿ (IOC) ವಿಧಿಸಿರುವ ನಿಯಮದ ಪ್ರಕಾರ ಏಷ್ಯಾ, ಆಫ್ರಿಕಾ, ಯುರೋಪ್ ಮತ್ತು ಓಷಿಯಾನಿಯಾ ಖಂಡಗಳಿಂದ ಕೇವಲ ತಲಾ ಒಂದು ಅಗ್ರ ರ‍್ಯಾಂಕಿಂಗ್ ತಂಡಕ್ಕೆ ಮಾತ್ರ ನೇರ ಪ್ರವೇಶ ಸಿಗಲಿದೆ. ಸದ್ಯದ ಸಮೀಕರಣದಂತೆ ಏಷ್ಯಾದಿಂದ ಭಾರತ (ರ‍್ಯಾಂಕ್ 1), ಯುರೋಪ್‌ನಿಂದ ಇಂಗ್ಲೆಂಡ್ (ರ‍್ಯಾಂಕ್ 2), ಓಷಿಯಾನಿಯಾದಿಂದ ಆಸ್ಟ್ರೇಲಿಯಾ (ರ‍್ಯಾಂಕ್ 3) ಮತ್ತು ಆಫ್ರಿಕಾದಿಂದ ದಕ್ಷಿಣ ಆಫ್ರಿಕಾ (ರ‍್ಯಾಂಕ್ 5) ಸುಲಭವಾಗಿ ಅರ್ಹತೆ ಪಡೆಯುವ ರೇಸ್‌ನಲ್ಲಿ ಮುಂಚೂಣಿಯಲ್ಲಿವೆ, ಆದರೆ ಏಷ್ಯಾ ಖಂಡದಿಂದ ನಂಬರ್ 1 ಸ್ಥಾನದಲ್ಲಿರುವ ಭಾರತ ನೇರ ಅರ್ಹತೆ ಪಡೆಯುವುದರಿಂದ, ಅದೇ ಖಂಡದ ಮತ್ತೊಂದು ತಂಡವಾದ ಪಾಕಿಸ್ತಾನ (ರ‍್ಯಾಂಕ್ 6) ರೇಸ್‌ನಲ್ಲಿ ತೀವ್ರ ಹಿನ್ನಡೆ ಅನುಭವಿಸುವಂತಾಗಿದೆ.

ಖಂಡಗಳ ಆಧಾರದ ಮೇಲಿನ ನೇರ ಅರ್ಹತೆಯ ರೇಸ್‌ನಿಂದ ಹೊರಬೀಳಲಿರುವ ಪಾಕಿಸ್ತಾನ, ಈಗ ಒಲಿಂಪಿಕ್ಸ್‌ನ ಕೊನೆಯ ಆರನೇ ಸ್ಥಾನಕ್ಕಾಗಿ ನಡೆಯಲಿರುವ 8 ತಂಡಗಳ 'ಐಸಿಸಿ ಒಲಿಂಪಿಕ್ಸ್ ಕ್ವಾಲಿಫೈಯರ್ 2027' ಟೂರ್ನಿಯಲ್ಲಿ ತನ್ನ ಅದೃಷ್ಟ ಪರೀಕ್ಷಿಸಬೇಕಾಗಿದೆ. ಪ್ರಸ್ತುತ ಸಮೀಕರಣದ ಪ್ರಕಾರ ಪಾಕಿಸ್ತಾನದ ಜೊತೆಗೆ ನ್ಯೂಜಿಲೆಂಡ್ (ರ‍್ಯಾಂಕ್ 4) ನಂತಹ ಬಲಿಷ್ಠ ತಂಡವೂ ಈ ವೈಲ್ಡ್‌ಕಾರ್ಡ್ ಅರ್ಹತಾ ಸುತ್ತಿನಲ್ಲಿ ಸೆಣಸಾಡಬೇಕಿದ್ದು, ಪಾಕ್ ಈ ಟೂರ್ನಿ ಗೆದ್ದರೆ ಮಾತ್ರ ಒಲಿಂಪಿಕ್ಸ್‌ನಲ್ಲಿ ಭಾರತ-ಪಾಕ್ ಹೈ-ವೋಲ್ಟೇಜ್ ಪಂದ್ಯ ಸಾಧ್ಯವಾಗುತ್ತದೆ.

ಇದೇ ವೇಳೆ, ವೆಸ್ಟ್ ಇಂಡೀಸ್ ತಂಡವು ಮತ್ತೊಂದು ವಿಚಿತ್ರ ಸಮಸ್ಯೆಯನ್ನು ಎದುರಿಸುತ್ತಿದೆ. ಅದು ಕೆರಿಬಿಯನ್ ದ್ವೀಪ ರಾಷ್ಟ್ರಗಳ ಒಕ್ಕೂಟದ ಕ್ರಿಕೆಟ್ ಮಂಡಳಿಯೇ ಹೊರತು ಒಂದೇ ರಾಷ್ಟ್ರೀಯ ಒಲಿಂಪಿಕ್ ಸಮಿತಿ (NOC) ಅಡಿಯಲ್ಲಿ ಬಾರದ ಕಾರಣ 'ವೆಸ್ಟ್ ಇಂಡೀಸ್' ಹೆಸರಿನಲ್ಲಿ ಒಲಿಂಪಿಕ್ಸ್ ಆಡಲು ಸಾಧ್ಯವಿಲ್ಲ, ಇದಕ್ಕಾಗಿ ಐಸಿಸಿ ವಿಶೇಷ ಹಾದಿ ಹುಡುಕಿದ್ದು, ಡಿಸೆಂಬರ್ 31, 2026ರ ಒಳಗೆ ವೆಸ್ಟ್ ಇಂಡೀಸ್ ಅಗ್ರ 8ರ ಒಳಗೆ ಸ್ಥಾನ ಪಡೆದರೆ, ಕೆರಿಬಿಯನ್ ದ್ವೀಪ ರಾಷ್ಟ್ರಗಳ ನಡುವೆ ಪ್ರತ್ಯೇಕ ಅರ್ಹತಾ ಪಂದ್ಯ ನಡೆಸಿ, ಅದರಲ್ಲಿ ಗೆಲ್ಲುವ ಕೇವಲ ಒಂದು ನಿರ್ದಿಷ್ಟ ದ್ವೀಪ ರಾಷ್ಟ್ರಕ್ಕೆ ಮಾತ್ರ 2027ರ ಜಾಗತಿಕ ಐಸಿಸಿ ಒಲಿಂಪಿಕ್ಸ್ ಕ್ವಾಲಿಫೈಯರ್‌ನಲ್ಲಿ ಆಡಲು ಅವಕಾಶ ನೀಡಲಾಗುತ್ತದೆ.

ಮತ್ತೊಂದೆಡೆ, ಪುರುಷರ ವಿಭಾಗದ ರೇಸ್ ಇನ್ನು ಸಸ್ಪೆನ್ಸ್ ಆಗಿದ್ದರೂ, ಮಹಿಳಾ ವಿಭಾಗದಲ್ಲಿ ಒಲಿಂಪಿಕ್ ಚಿತ್ರಣವು ಅರ್ಧದಷ್ಟು ಸ್ಪಷ್ಟವಾಗಿದೆ. ಪ್ರಸ್ತುತ ನಡೆಯುತ್ತಿರುವ 2026ರ ಐಸಿಸಿ ಮಹಿಳಾ ಟಿ20 ವಿಶ್ವಕಪ್ ಪ್ರದರ್ಶನಗಳ ಆಧಾರದ ಮೇಲೆ ಆಸ್ಟ್ರೇಲಿಯಾ (ಓಷಿಯಾನಿಯಾ), ಗ್ರೇಟ್ ಬ್ರಿಟನ್-ಇಂಗ್ಲೆಂಡ್ (ಯುರೋಪ್), ಭಾರತ (ಏಷ್ಯಾ) ಮತ್ತು ದಕ್ಷಿಣ ಆಫ್ರಿಕಾ (ಆಫ್ರಿಕಾ) ತಂಡಗಳು ಈಗಾಗಲೇ ಲಾಸ್ ಏಂಜಲೀಸ್ ಒಲಿಂಪಿಕ್ಸ್‌ಗೆ ಅಧಿಕೃತವಾಗಿ ಟಿಕೆಟ್ ಖಚಿತಪಡಿಸಿಕೊಂಡಿವೆ. ಇನ್ನುಳಿದಂತೆ ಐದನೇ ಸ್ಥಾನಕ್ಕಾಗಿ ಅಮೆರಿಕ ಮಹಿಳಾ ತಂಡವು ಮಾರ್ಚ್ 1, 2027ರ ಒಳಗಾಗಿ ಟಾಪ್-15 ರ‍್ಯಾಂಕಿಂಗ್ ತಲುಪಬೇಕಿದ್ದು, ವಿಫಲವಾದರೆ ಆ ಅವಕಾಶ ರ‍್ಯಾಂಕಿಂಗ್‌ನಲ್ಲಿ ಮುಂದಿರುವ ಬೇರೆ ದೇಶಕ್ಕೆ ಸಿಗಲಿದೆ ಹಾಗೂ ಆರನೇ ಸ್ಥಾನವನ್ನು 2027ರ ಜಾಗತಿಕ ಅರ್ಹತಾ ಟೂರ್ನಿ ನಿರ್ಧರಿಸಲಿದೆ.

ಇನ್ನು ಒಲಿಂಪಿಕ್ಸ್‌ಗೆ ಅರ್ಹತೆ ಪಡೆಯುವ ಈ 6 ತಂಡಗಳನ್ನು ತಲಾ 3 ತಂಡಗಳಂತೆ ಎರಡು ಗುಂಪುಗಳಾಗಿ ವಿಂಗಡಿಸಿ, ಸಿಂಗಲ್ ರೌಂಡ್-ರಾಬಿನ್ ಮತ್ತು ಕ್ರಾಸ್-ಪೂಲ್ ಮಾದರಿಯಲ್ಲಿ ಪಂದ್ಯಗಳನ್ನು ನಡೆಸಿ, ಒಟ್ಟು ಪಾಯಿಂಟ್ಸ್ ಪಟ್ಟಿಯಲ್ಲಿ ಅಗ್ರ ಎರಡು ಸ್ಥಾನ ಪಡೆಯುವ ತಂಡಗಳು ನೇರವಾಗಿ ಚಿನ್ನದ ಪದಕಕ್ಕಾಗಿ ಹಾಗೂ 3 ಮತ್ತು 4ನೇ ಸ್ಥಾನ ಪಡೆಯುವ ತಂಡಗಳು ಕಂಚಿನ ಪದಕಕ್ಕಾಗಿ ಸೆಣಸಾಡಲಿವೆ. ಹೀಗೆ 2028ರ ಒಲಿಂಪಿಕ್ಸ್ ಕ್ರಿಕೆಟ್ ಅಭಿಮಾನಿಗಳಿಗೆ ಹೊಸ ರೋಮಾಂಚನ ನೀಡಲು ಸಜ್ಜಾಗುತ್ತಿದ್ದರೂ, ಭಾರತ-ಪಾಕ್ ಮುಖಾಮುಖಿ ಸಾಧ್ಯವಾಗುತ್ತಾ ಇಲ್ಲವಾ ಎಂಬುದು ಸದ್ಯದ ಬಿಲಿಯನ್ ಡಾಲರ್ ಪ್ರಶ್ನೆಯಾಗಿದೆ, (ಏಜೆನ್ಸೀಸ್​).