ಒಂದು ಕ್ಷಣವೂ... 19ನೇ ಆವೃತ್ತಿ ಆರಂಭಕ್ಕೂ ಮುನ್ನ ಆರ್​ಸಿಬಿ ಆಟಗಾರರಿಗೆ ಕೊಹ್ಲಿ ವಾರ್ನಿಂಗ್​! 'ಕಿಂಗ್' ಹೇಳಿದ್ದಿಷ್ಟು

ಬೆಂಗಳೂರು: ಟೀಮ್ ಇಂಡಿಯಾದ 'ರನ್ ಮೆಷಿನ್', ದಾಖಲೆಗಳ ಸರದಾರ, ಕ್ರಿಕೆಟ್​ ಅಭಿಮಾನಿಗಳ ನೆಚ್ಚಿನ 'ಕಿಂಗ್' ವಿರಾಟ್​ ಕೊಹ್ಲಿ ಬಗ್ಗೆ ಹೆಚ್ಚೇನು ಹೇಳಬೇಕಿಲ್ಲ ಬಿಡಿ. ದಿಗ್ಗಜ ಕ್ರಿಕೆಟಿಗರ ಸಾಲಿನಲ್ಲಿ ಈಗಾಗಲೇ ತಮ್ಮ ಹೆಸರನ್ನು ಮುದ್ರಿಸಿರುವ ಕೊಹ್ಲಿ, ಅಂತಾರಾಷ್ಟ್ರೀಯ ಕ್ರಿಕೆಟ್​ನ ಮೂರು ಫಾರ್ಮೆಟ್​ನಲ್ಲಿಯೂ ಹಲವು ದಾಖಲೆಗಳನ್ನು ತಮ್ಮ ಮುಡಿಗೇರಿಸಿಕೊಂಡಿದ್ದಾರೆ. ಪ್ರಸ್ತುತ, ಲಂಡನ್​ನಲ್ಲಿ ನೆಲೆಸಿರುವ ವಿರಾಟ್​, ಐಪಿಎಲ್​ 19ನೇ ಆವೃತ್ತಿಗಾಗಿ ಭಾರತಕ್ಕೆ ಬಂದಿದ್ದಾರೆ. ಅದಾಗಲೇ, ಆರ್​ಸಿಬಿ ತಂಡವನ್ನೂ ಸೇರಿ, ಮೈದಾನದಲ್ಲಿ ಭರ್ಜರಿ ತಯಾರಿ ನಡೆಸುತ್ತಿದ್ದಾರೆ.

ಇದೇ ಮಾರ್ಚ್ 28ರಂದು ಬೆಂಗಳೂರಿನ ಎಂ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆಯಲಿರುವ ಕಿಕ್​ಸ್ಟಾರ್ಟ್​ ಪಂದ್ಯಕ್ಕೆ ಹಾಲಿ ಚಾಂಪಿಯನ್ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಸನ್ನದ್ಧವಾಗಿದೆ. ಸನ್​ರೈಸರ್ಸ್​ ಹೈದರಾಬಾದ್​ ಎದುರು ಕಣಕ್ಕಿಳಿಯಲು ಸಜ್ಜಾಗಿರುವ ಆರ್‌ಸಿಬಿ, ಸತತ ಎರಡನೇ ಬಾರಿಗೆ ಟ್ರೋಫಿ ಎತ್ತಿ ಹಿಡಿಯಲು ಬಯಸಿದೆ. ಈ ಸಂದರ್ಭದಲ್ಲಿ, ವಿರಾಟ್ ಕೊಹ್ಲಿ ತಮ್ಮ ತಂಡದ ಆಟಗಾರರಿಗೆ ಮಹತ್ವದ ಸಲಹೆ ಮತ್ತು ಎಚ್ಚರಿಕೆಯನ್ನು ನೀಡಿದ್ದಾರೆ.

ಈ ಬಾರಿ ಸ್ಪರ್ಧೆ ಇನ್ನಷ್ಟು ಕಠಿಣವಾಗಲಿದೆ. ಆದ್ದರಿಂದ, ಒಂದು ಕ್ಷಣವೂ ವ್ಯರ್ಥ ಮಾಡಬೇಡಿ. ಕಳೆದ ಎರಡ್ಮೂರು ಸೀಸನ್​ಗಳಲ್ಲಿ ಎಲ್ಲಾ ಆಟಗಾರರು ತುಂಬಾ ಶ್ರಮಿಸಿದ್ದಾರೆ. 18ನೇ ಆವೃತ್ತಿಯಲ್ಲಿ ನಾವು ಚಾಂಪಿಯನ್ಸ್​ ಆಗಿ ಹೊರಹೊಮ್ಮಿದೆವು. ಆದರೀಗ, ಇತರ ತಂಡಗಳು ಸಹ ತುಂಬಾ ಬಲಿಷ್ಠವಾಗಿವೆ. ನಮಗಿರುವ ಕಡಿಮೆ ಸಮಯದಲ್ಲಿ ಹೆಚ್ಚು ಶ್ರಮಿಸಿ, ಕೆಲಸ ಮಾಡಬೇಕು ಎಂದರು.

ಎರಡೂವರೆ ತಿಂಗಳ ಕಾಲ ನಡೆಯಲಿರುವ ಐಪಿಎಲ್​ನಲ್ಲಿ ನಾವು ಶೇ.120ರಷ್ಟು ಶ್ರಮ ಹಾಕಿ, ಗೆಲುವು ಸಾಧಿಸಬೇಕು. ನಿಮ್ಮೆಲ್ಲರನ್ನೂ ನೋಡಿದರೆ, ನೀವು ಸವಾಲುಗಳನ್ನು ಎದುರಿಸಲು ಸಿದ್ಧರಿರುವ ಚಾಲೆಂಜರ್ಸ್​ ಅನ್ನೋದು ತಿಳಿಯುತ್ತೆ ಎಂದರು. ಇನ್ನು ಆ್ಯಂಡಿ ಫ್ಲವರ್​ ಮಾತನಾಡಿ, "ಈ ವರ್ಷ ಆಸಕ್ತಿದಾಯಕ ಹರಾಜು ನಡೆಯಿತು. ಸ್ಪಷ್ಟವಾಗಿ ಹೇಳಬೇಕೆಂದರೆ, ನಮ್ಮ ತಂಡ ಈಗ ಇನ್ನಷ್ಟು ಸುಧಾರಣೆ ಕಂಡಿದೆ. ಒಂದಷ್ಟು ಉತ್ತಮ ಹೊಸ ಆಟಗಾರರು ತಂಡಕ್ಕೆ ಸೇರಿದ್ದಾರೆ. ಇವರನ್ನೆಲ್ಲ ಸೇರಿಸಿಕೊಂಡು ಒಂದು ಬಲಿಷ್ಠ ಟೀಮ್ ಕಟ್ಟುತ್ತೇವೆ" ಎಂದು ಹೇಳಿದರು,(ಏಜೆನ್ಸೀಸ್).