ಫೀಲ್ಡಿಂಗ್‌ಗೆ ಅಡ್ಡಿ, ಮೈದಾನದಲ್ಲಿ ರಂಪಾಟ: ಔಟ್ ಆದ ಸಿಟ್ಟಿನಲ್ಲಿ ಶಿಸ್ತು ಮರೆತ ಅಂಗ್‌ಕ್ರಿಶ್​ಗೆ ಬಿಗ್​ ಶಾಕ್​! Angkrish Raghuvanshi

Angkrish Raghuvanshi : ಪ್ರಸ್ತುತ ನಡೆಯುತ್ತಿರುವ 19ನೇ ಆವೃತ್ತಿಯ ಐಪಿಎಲ್​ನಲ್ಲಿ ಆರಂಭದಲ್ಲಿ ಸತತ ಸೋಲುಗಳಿಂದ ಕಂಗೆಟ್ಟಿದ್ದ ಕೋಲ್ಕತ್ತ ನೈಟ್ ರೈಡರ್ಸ್ ( KKR ) ತಂಡವು ಇದೀಗ ಬ್ಯಾಕ್​ ಟು ಬ್ಯಾಕ್​ ಎರಡು ಗೆಲುವಿನೊಂದಿಗೆ ಜಯದ ಹಾದಿಗೆ ಮರಳಿದೆ. ಭಾನುವಾರ (ಏಪ್ರಿಲ್​ 26) ಲಖನೌದ ಏಕಾನಾ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಕೋಲ್ಕತ್ತ ನೈಟ್ ರೈಡರ್ಸ್ ತಂಡವು ಸೂಪರ್ ಓವರ್‌ನಲ್ಲಿ ಲಖನೌ ಸೂಪರ್ ಜೈಂಟ್ಸ್ ತಂಡವನ್ನು ಸೋಲಿಸಿತು. ಈ ಸೀಸನ್‌ನಲ್ಲಿ ಇದುವರೆಗೂ 8 ಪಂದ್ಯಗಳನ್ನು ಆಡಿರುವ ಕೆಕೆಆರ್‌ಗೆ ಇದು ಎರಡನೇ ಗೆಲುವು. ಈ ಗೆಲುವಿನ  ಉತ್ಸಾಹದಲ್ಲಿದ್ದ ಕೆಕೆಆರ್‌ಗೆ ಇದೀಗ ದೊಡ್ಡ ಆಘಾತವೊಂದು ಎದುರಾಗಿದೆ. 

ಐಪಿಎಲ್ ಆಡಳಿತ ಮಂಡಳಿಯು ತಂಡದ ಸ್ಟಾರ್ ಆಟಗಾರ ಅಂಗ್‌ಕ್ರಿಶ್ ರಘುವಂಶಿಗೆ ಭಾರಿ ದಂಡ ವಿಧಿಸಿದೆ. ಅವರಿಗೆ ಪಂದ್ಯ ಶುಲ್ಕದ ಶೇ. 20 ರಷ್ಟು ದಂಡ ವಿಧಿಸಿದ್ದು, ಅವರ ಖಾತೆಗೆ ಒಂದು ಡಿಮೆರಿಟ್ ಪಾಯಿಂಟ್ ಸೇರಿಸಲಾಗಿದೆ. ಈ ಪಂದ್ಯದಲ್ಲಿ ರಘುವಂಶಿ ಐಪಿಎಲ್ ನೀತಿ ಸಂಹಿತೆಯನ್ನು ಉಲ್ಲಂಘಿಸಿದರು. ಫೀಲ್ಡ್ ಅನ್ನು ಅಡ್ಡಿಪಡಿಸುವ ನಿಯಮದ ಅಡಿಯಲ್ಲಿ ಔಟಾದ ಬಳಿಕ, ಅವರು ಪೆವಿಲಿಯನ್‌ಗೆ ಹೋಗಿ ಬೌಂಡರಿ ಗೆರೆಯನ್ನು ದಾಟಿ ಹೆಲ್ಮೆಟ್ ಮತ್ತು ಬ್ಯಾಟ್ ಅನ್ನು ಎಸೆದರು.

ನಿನ್ನೆ ನಡೆದ ಪಂದ್ಯದಲ್ಲಿ 5ನೇ ಓವರ್‌ನಲ್ಲಿ ಫೀಲ್ಡಿಂಗ್​ಗೆ ಅಡ್ಡಿಪಡಿಸಿದ ನಿಯಮದಡಿ ರಘುವಂಶಿ ಔಟಾದರು. ಇದೇ ಬೇಸರದಲ್ಲಿ ರಘುವಂಶಿ ಅವರು ತಮ್ಮ ಬ್ಯಾಟ್‌ನಿಂದ ಬೌಂಡರಿ ಕುಶನ್ ಕುಟ್ಟಿ, ನಂತರ ಹೆಲ್ಮೆಟ್ ಅನ್ನು ಡಗೌಟ್ ಕಡೆಗೆ ಎಸೆದರು. ಮೈದಾನದ ಉಪಕರಣಗಳನ್ನು ದುರುಪಯೋಗಪಡಿಸಿಕೊಂಡ ಈ ವರ್ತನೆಯು ಐಪಿಎಲ್ ನೀತಿಸಂಹಿತೆಯ ಆರ್ಟಿಕಲ್ 2.2 ರ ಅಡಿಯಲ್ಲಿ 'ಲೆವೆಲ್ 1' ಅಪರಾಧವೆಂದು ಪರಿಗಣಿಸಲಾಗಿದೆ. ಇದಕ್ಕೆ ಶಿಕ್ಷೆಯಾಗಿ ರಘುವಂಶಿ ಅವರಿಗೆ ಪಂದ್ಯದ ಸಂಭಾವನೆಯ ಶೇ. 20 ರಷ್ಟು ದಂಡ ವಿಧಿಸಲಾಗಿದೆ ಮತ್ತು ಅವರ ಖಾತೆಗೆ ಒಂದು ಡಿಮೆರಿಟ್ ಪಾಯಿಂಟ್ ಸೇರಿಸಲಾಗಿದೆ. ತಮ್ಮ ತಪ್ಪನ್ನು ಒಪ್ಪಿಕೊಂಡಿರುವ ರಘುವಂಶಿ, ಸಂಘಟಕರು ನೀಡಿದ ಈ ಶಿಕ್ಷೆಯನ್ನು ಅಂಗೀಕರಿಸಿದ್ದಾರೆ ಎಂದು ಐಪಿಎಲ್ ಅಧಿಕೃತ ಪ್ರಕಟಣೆಯಲ್ಲಿ ತಿಳಿಸಿದೆ.

ನಿನ್ನೆ ನಡೆದ ಪಂದ್ಯದಲ್ಲಿ ಕೆಕೆಆರ್ ತಂಡ ಮೊದಲು ಬ್ಯಾಟಿಂಗ್ ಮಾಡಿತು. ಆರಂಭಿಕ ಆಟಗಾರ ಟಿಮ್ ಸೀಫರ್ಟ್ ಶೂನ್ಯಕ್ಕೆ ಔಟಾದ ನಂತರ ಅಂಗ್‌ಕ್ರಿಶ್ ರಘುವಂಶಿ ಕ್ರೀಸ್‌ಗೆ ಬಂದರು. ಇನ್ನಿಂಗ್ಸ್‌ನ ಐದನೇ ಓವರ್‌ನಲ್ಲಿ ಈ ಘಟನೆ ಸಂಭವಿಸಿತು. ಲಖನೌ ಬೌಲರ್ ಪ್ರಿನ್ಸ್ ಯಾದವ್ ಈ ಓವರ್ ಎಸೆದರು. ರಘುವಂಶಿ ಮಿಡ್‌ಫೀಲ್ಡ್ ಕಡೆಗೆ ಶಾಟ್ ಬಾರಿಸಿ ಸಿಂಗಲ್‌ಗೆ ಓಡಿದರು. ಆದಾಗ್ಯೂ, ನಾನ್-ಸ್ಟ್ರೈಕರ್‌ನ ಎಂಡ್‌ನಲ್ಲಿದ್ದ ಕ್ಯಾಮರೊನ್​ ಗ್ರಿನ್​ ಸಿಂಗಲ್ ತೆಗೆದುಕೊಳ್ಳಲು ನಿರಾಕರಿಸಿದರು. ಇದರಿಂದ ರಘುವಂಶಿ ವಾಪಸ್​ ಕ್ರೀಸ್​ಗೆ ಹೋಗಲು ಪ್ರಯತ್ನಿಸಿದರು. ಅದೇ ಸಮಯದಲ್ಲಿ ಚೆಂಡನ್ನು ಹಿಡಿದ ಶಮಿ, ಸ್ಟ್ರೈಕಿಂಗ್ ಎಂಡ್‌ ಕಡೆ ಎಸೆದರು. 

ರಘುವಂಶಿ ಕ್ರೀಸ್​ನತ್ತ ಸಮೀಪಿಸುತ್ತಿದ್ದಂತೆ, ಶಮಿ ಎಸೆದ ಚೆಂಡು ಅವರ ಕಾಲುಗಳಿಗೆ ತಗುಲಿತು. ಈ ವೇಳೆ ಶಮಿ ಮತ್ತು ರಿಷಭ್ ಪಂತ್, ಮೈದಾನದಲ್ಲಿ ಫೀಲ್ಡಿಂಗ್​ಗೆ ಅಡ್ಡಿಪಡಿಸಿದ ಅಡಿಯಲ್ಲಿ ಅವರು ಔಟ್ ಆಗಿದ್ದಾರೆ ಎಂದು ಮನವಿ ಮಾಡಿದರು. ರಘುವಂಶಿ ಅವರು ಉದ್ದೇಶಪೂರ್ವಕವಾಗಿ ಚೆಂಡನ್ನು ತಡೆದಿದ್ದಾರೆ ಎಂದು ಆರೋಪಿಸಿದರು. ಈ ಬಗ್ಗೆ ಫೀಲ್ಡ್ ಅಂಪೈರ್‌ಗಳು ಮೂರನೇ ಅಂಪೈರ್ ಸಹಾಯವನ್ನು ಕೋರಿದರು.

ಹಲವು ಬಾರಿ ಪರಿಶೀಲಿಸಿದ ಮೂರನೇ ಅಂಪೈರ್, ಬ್ಯಾಟರ್ ಓಡಿಹೋಗುವಾಗ ದಿಕ್ಕನ್ನು ಬದಲಾಯಿಸಿದ್ದಾರೆ ಮತ್ತು ಚೆಂಡು ವಿಕೆಟ್ ಕೀಪರ್‌ಗೆ ತಲುಪದಂತೆ ತಡೆದಿದ್ದಾರೆ ಎಂದು ಭಾವಿಸಿದರು. ಹೀಗಾಗಿ, ಮೈದಾನಕ್ಕೆ ಅಡ್ಡಿಪಡಿಸಿದ್ದಕ್ಕಾಗಿ ಅವರನ್ನು ಔಟ್ ಎಂದು ಘೋಷಿಸಿದರು. ಇದೇ ವೇಳೆ ರಘುವಂಶಿ ಅವರು ಮೈದಾನದಲ್ಲಿದ್ದ ಅಂಪೈರ್‌ಗಳೊಂದಿಗೆ ವಾದಿಸಿದರು. ಆದರೆ, ಯಾವುದೇ ಪ್ರಯೋಜನವಾಗಲಿಲ್ಲ. ಕೊನೆಗೆ, ಅವರು ಹತಾಶೆಯಿಂದ ಪೆವಿಲಿಯನ್‌ಗೆ ಹೋಗುವಾಗ, ಬೌಂಡರಿ ಕುಶನ್​ಗೆ ತಮ್ಮ ಬ್ಯಾಟ್​ ಅನ್ನು ಬಡಿದರು. ಬಳಿಕ ಬ್ಯಾಟ್​ ಮತ್ತು ಹೆಲ್ಮೆಟ್​ ಅನ್ನು ಎಸೆದರು. ಹೀಗಾಗಿ, ಇದನ್ನು ನಿಯಮ ಉಲ್ಲಂಘನೆ ಎಂದು ಪರಿಗಣಿಸಿ, ದಂಡ ವಿಧಿಸಲಾಗಿದೆ, (ಏಜೆನ್ಸೀಸ್​).