18, 11, 25... ಏನಿದು ನಂಬರ್ ಲೆಕ್ಕಾಚಾರ? ಮೊದಲನೇ ಏಕದಿನ ಪಂದ್ಯದಲ್ಲಿ ದಿಗ್ಗಜರ ದಾಖಲೆ ಮುರಿಯಲು 'ಕಿಂಗ್​' ರೆಡಿ | Virat Kohli

ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ 28,000 ರನ್‌ಗಳನ್ನು ಪೂರ್ಣಗೊಳಿಸಲು ವಿರಾಟ್​ಗೆ ಕೇವಲ 25 ರನ್‌ಗಳ ಅಗತ್ಯವಿದೆ. ಇಂದಿನ ಮೊದಲ ಏಕದಿನ ಪಂದ್ಯದಲ್ಲಿ ಕೊಹ್ಲಿ, ಆ 25 ರನ್‌ಗಳನ್ನು ಬಾರಿಸಿದರೆ, ಅವರು ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ 28,000 ರನ್‌ಗಳನ್ನು ದಾಖಲಿಸಿದ ಅತ್ಯಂತ ವೇಗದ ಬ್ಯಾಟ್ಸ್‌ಮನ್ ಎಂಬ ರೆಕಾರ್ಡ್​ಗೆ ಸಾಕ್ಷಿಯಾಗಲಿದ್ದಾರೆ. ಇಲ್ಲಿಯವರೆಗೆ, ಈ ದಾಖಲೆಗಳು ಸಚಿನ್ ತೆಂಡೂಲ್ಕರ್ ಮತ್ತು ಶ್ರೀಲಂಕಾದ ಕುಮಾರ್ ಸಂಗಕ್ಕಾರ ಹೆಸರಿನಲ್ಲಿವೆ.

ಇನ್ನು ಮೂರು ಫಾರ್ಮೆಟ್​ಗಳಲ್ಲಿ ನೋಡುವುದಾದರೆ, ವಿರಾಟ್​, ಕುಮಾರ್ ಸಂಗಕ್ಕಾರ ಅವರ 28,016 ರನ್‌ಗಳ ದಾಖಲೆಗಿಂತ ಕೇವಲ 42 ರನ್‌ಗಳ ಹಿಂದಿದ್ದಾರೆ. ಇಂದಿನ ಪಂದ್ಯದಲ್ಲಿ ಅರ್ಧಶತಕ ಸಿಡಿಸಿದರೆ, ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಎರಡನೇ ಅತಿ ಹೆಚ್ಚು ರನ್ ಗಳಿಸಿದ ಆಟಗಾರನಾಗಿ ವಿರಾಟ್​ ಹೊರಹೊಮ್ಮಲಿದ್ದಾರೆ. ಈ ಪಟ್ಟಿಯಲ್ಲಿ ಪ್ರಸ್ತುತ, ಸಂಗಕ್ಕಾರ ವಿರಾಟ್‌ಗಿಂತ ಒಂದು ಹೆಜ್ಜೆ ಮುಂದಿದ್ದಾರೆ. ಅವರು 594 ಪಂದ್ಯಗಳಲ್ಲಿ 666 ಇನ್ನಿಂಗ್ಸ್‌ಗಳಲ್ಲಿ 28,016 ರನ್ ಗಳಿಸಿದ್ದಾರೆ.

46.77 ಸರಾಸರಿಯಲ್ಲಿ, 63 ಶತಕ ಮತ್ತು 153 ಅರ್ಧಶತಕಗಳನ್ನು ಗಳಿಸಿದ್ದಾರೆ. ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿರುವ ಸಚಿನ್ ತೆಂಡೂಲ್ಕರ್, 664 ಪಂದ್ಯಗಳಲ್ಲಿ 48.25 ಸರಾಸರಿಯಲ್ಲಿ 34,357 ರನ್ ದಾಖಲಿಸಿದ್ದಾರೆ. ಸಚಿನ್ ಎಲ್ಲಾ ಸ್ವರೂಪಗಳಲ್ಲಿ 100 ಶತಕ ಮತ್ತು 164 ಅರ್ಧಶತಕಗಳನ್ನು ಗಳಿಸಿದ್ದಾರೆ.