ಇದೆಲ್ಲ ಬೇಕಿತ್ತಾ ನಿಮಗೆ? ಕಾವ್ಯ ಮಾರನ್​ಗೆ ಪಿಸಿಬಿ ಮುಖ್ಯಸ್ಥ ಚೆಕ್​ಮೇಟ್​​! ಸನ್​ರೈಸರ್ಸ್​ ಲೀಡ್ಸ್​ ಆಸೆಗೆ ಕಡೆಗೂ ತಣ್ಣೀರು

ಚೆನ್ನೈ: ಈ ಬಾರಿಯ 'ದಿ ಹಂಡ್ರೆಡ್'​ 2026ರ ಟಿ20 ಲೀಗ್​ ಇಂಗ್ಲೆಂಡ್​ನಲ್ಲಿ ನಡೆಯಲಿದ್ದು, ಇತ್ತೀಚೆಗಷ್ಟೇ ಹರಾಜು ಪ್ರಕ್ರಿಯೆ ನಡೆಯಿತು. ಈ ಆಕ್ಷನ್​ನಲ್ಲಿ ಸನ್​ರೈಸರ್ಸ್​ ಹೈದರಾಬಾದ್​ ಹಾಗೂ ಲೀಡ್ಸ್​ ಫ್ರಾಂಚೈಸಿಗಳ ಸಹ ಮಾಲೀಕರಾದ ಕಾವ್ಯ ಮಾರನ್​ ಮಾಡಿದ ಎಡವಟ್ಟಿಗೆ ಇದೀಗ ಭಾರತೀಯ ಕ್ರಿಕೆಟ್​ ಅಭಿಮಾನಿಗಳು ಭಾರೀ ವಿರೋಧ ವ್ಯಕ್ತಪಡಿಸಿದ್ದು, ಛೀಮಾರಿ ಹಾಕಿದ್ದಾರೆ.

ಹಂಡ್ರೆಡ್​ ಲೀಗ್​ಗಾಗಿ ನಡೆದ ಆಟಗಾರರ ಹರಾಜು ಪ್ರಕ್ರಿಯೆಯಲ್ಲಿ, ಪಾಕ್​ ಸ್ಪಿನ್ನರ್ ಅಬ್ರಾರ್​ ಅಹ್ಮದ್​ನನ್ನು 2.34 ಕೋಟಿ (190,000 ಪೌಂಡ್‌ಗಳು) ರೂ.ಗೆ ಖರೀದಿಸಿ ಕಾವ್ಯ ಮಾರನ್​, ಸದ್ಯ ಭಾರತೀಯರ ಕೆಂಗಣ್ಣಿಗೆ ಗುರಿಯಾಗಿದ್ದು, ದೊಡ್ಡ ವಿವಾದಕ್ಕೆ ಸಿಲುಕಿದ್ದಾರೆ. ಸನ್​ರೈಸರ್ಸ್​ ಲೀಡ್ಸ್​ ಕೋಚ್​ ಡೆನಿಯಲ್ ವೆಟೋರಿ ಜತೆಗೆ ಈ ನಿರ್ಧಾರ ಕೈಗೊಂಡ ಕಾವ್ಯ, ತಮ್ಮ ತಂಡಕ್ಕೆ ಪಾಕ್​ ಸ್ಪಿನ್​ ಇರಲಿ ಎಂದು ಮೊದಲೇ ಮಾತಾಡಿಕೊಂಡಿದ್ದರಂತೆ. ಅಂತೆಯೇ, ಹರಾಜಿನಲ್ಲಿ ಖರೀದಿ ಮಾಡಿದ್ದಾಗಿ ತಿಳಿಸಿದ್ದಾರೆ.

ಈ ವಿಚಾರ ದೊಡ್ಡ ವಿವಾದಕ್ಕೆ ತಿರುಗಿದ್ದು, ಪಾಕಿಸ್ತಾನದ ಇತರೆ ಕ್ರಿಕೆಟಿಗರ ಮೇಲೂ ಕಣ್ಣಿಟ್ಟಿದ್ದ ಫ್ರಾಂಚೈಸಿಯ ನಡೆಯನ್ನು ತೀವ್ರವಾಗಿ ಖಂಡಿಸಿರುವ ಭಾರತೀಯ ಕ್ರಿಕೆಟ್​ ಅಭಿಮಾನಿಗಳು, ಐಪಿಎಲ್​ 19ನೇ ಆವೃತ್ತಿಯಿಂದ ಮೊದಲು ಸನ್​ರೈಸರ್ಸ್​ ಹೈದರಾಬಾದ್ ತಂಡವನ್ನು ಕಿತ್ತುಬಿಸಾಡಿ. ವೈರಿ ರಾಷ್ಟ್ರದ ಆಟಗಾರರನ್ನು ಆಯ್ಕೆ ಮಾಡಿಕೊಳ್ಳುವ ಇಂಥ ತಂಡ ನಮಗೆ ಬೇಕಿಲ್ಲ ಎಂದು ಬಿಸಿಸಿಐಗೆ ಆಗ್ರಹಿಸಿದ್ದಾರೆ. ಸನ್​ರೈಸರ್ಸ್​ ಲೀಡ್ಸ್​ನ ಸಹ ಒಡತಿ ಕಾವ್ಯ ಮಾರನ್​ ವಿರುದ್ಧ ನೆಟ್ಟಿಗರು ಹಿಗ್ಗಾಮುಗ್ಗಾ ಟ್ರೋಲ್​ ಮಾಡಿದ್ದಾರೆ.

ಈ ಬಾರಿಯ 'ದಿ ಹಂಡ್ರೆಡ್' ಲೀಗ್‌ನಲ್ಲಿ ಅಬ್ರಾರ್ ಅಹ್ಮದ್ ಆಡುವುದು ಬಹುತೇಕ ಡೌಟ್​ ಎನ್ನಲಾಗಿದೆ. ಅದಕ್ಕೆ ಕಾರಣ, ಪಿಸಿಬಿ ಮುಖ್ಯಸ್ಥ ಮೊಹ್ಸಿನ್ ನಖ್ವಿ. ಅಬ್ರಾರ್ ಇಲ್ಲಿಯವರೆಗೆ ಪಾಕಿಸ್ತಾನ ಕ್ರಿಕೆಟ್ ಮಂಡಳಿಯಿಂದ ಆಕ್ಷೇಪಣೆ ಇಲ್ಲ ಪ್ರಮಾಣಪತ್ರವನ್ನು ಪಡೆದೇ ಇಲ್ಲ. ಇದಲ್ಲದೆ, ಈ ಲೀಗ್ ಆರಂಭವಾಗುವ ಸಮಯದಲ್ಲೇ ಪಾಕಿಸ್ತಾನ ತಂಡವು ವೆಸ್ಟ್ ಇಂಡೀಸ್‌ನೊಂದಿಗೆ ಟೆಸ್ಟ್ ಸರಣಿಯನ್ನು ಆಡಲಿದೆ. ಪಿಸಿಬಿ ಇದಕ್ಕೆ ಸಂಬಂಧಿಸಿದ ಪೂರ್ವ ತಯಾರಿಗಳನ್ನು ಸಹ ಮಾಡಿಕೊಂಡಿದೆ ಎಂದು ವರದಿಯಾಗಿದೆ..

ಈ ಸಂದರ್ಭಗಳ ಹಿನ್ನೆಲೆಯಲ್ಲಿ, ಹಂಡ್ರೆಡ್​ ಲೀಗ್​ನಲ್ಲಿ ಅಬ್ರಾರ್​ ಆಡಿಸಲು ಪಾಕಿಸ್ತಾನ ಕ್ರಿಕೆಟ್ ಮಂಡಳಿಯು NOC (ಆಕ್ಷೇಪಣೆ ಇಲ್ಲ ಪ್ರಮಾಣಪತ್ರ) ನೀಡುವುದಿಲ್ಲ ಎಂಬ ಸುದ್ದಿಗಳು ಸದ್ಯ ಕ್ರಿಕೆಟ್ ವಲಯಗಳಲ್ಲಿ ಭಾರೀ ಚರ್ಚೆಗೆ ಗ್ರಾಸವಾಗಿದೆ. ಇದನ್ನು ಪಿಬಿಸಿ ಮೂಲಗಳು ಬಹಿರಂಗಪಡಿಸಿವೆ. ವರದಿಗಳನ್ನು ಆಧರಿಸಿ ನೋಡುವುದಾದರೆ, ಈ ಲೀಗ್‌ನಲ್ಲಿ ಅಬ್ರಾರ್​ ಸನ್​ರೈಸರ್ಸ್​ ಲೀಡ್ಸ್​ ತಂಡದ ಪರ ಆಡುವ ಸಾಧ್ಯತೆಗಳು 50-50 ಎನ್ನಲಾಗಿದೆ.

ಈ ವಿಷಯ ಕ್ರಿಕೆಟ್​ ವಲಯದಲ್ಲಿ ಭಾರೀ ಚರ್ಚೆಗೆ ಗ್ರಾಸವಾಗುತ್ತಿದ್ದಂತೆ ನೇರವಾಗಿ ಬಿಸಿಸಿಐ ಅಂಗಳಕ್ಕೆ ತಲುಪಿದೆ. ಸನ್​ರೈಸರ್ಸ್​ ಫ್ರಾಂಚೈಸಿಯನ್ನು ಮಾ.28ರಿಂದ ಆರಂಭವಾಗಲಿರುವ ಐಪಿಎಲ್​ ಲೀಗ್​ನಿಂದ ತೆಗೆಯುವ ವಿಚಾರಕ್ಕೆ ಪ್ರತಿಕ್ರಿಯಿಸಿದ ಬಿಸಿಸಿಐ ಉಪಾಧ್ಯಕ್ಷ ಹಾಗೂ ಕಾಂಗ್ರೆಸ್ ಸಂಸದ ರಾಜೀವ್ ಶುಕ್ಲಾ, "ಇದು ನಮ್ಮ (ಐಪಿಎಲ್​) ಡೊಮೈನ್​ಗೆ ಬರಲ್ಲ. ಅವರು ವಿದೇಶಿ ನೆಲದ ಟೂರ್ನಿಗಾಗಿ ಮಾಡಿಕೊಂಡಿದ್ದಾರೆ. ಹೀಗಾಗಿ, ಇಲ್ಲಿ ನಿರ್ಧಾರ ಅವರದ್ದೇ ಆಗಿದೆ ಹೊರತು ನಮ್ಮದು ಏನಿಲ್ಲ" ಎಂದಿದ್ದಾರೆ,(ಏಜೆನ್ಸೀಸ್).