ಭಾರತ ಏಕದಿನ ತಂಡಕ್ಕೆ ಕನ್ನಡಿಗ ಕೆಎಲ್ ರಾಹುಲ್ ನಾಯಕ?: ದ.ಆಫ್ರಿಕಾ ವಿರುದ್ಧದ ಸರಣಿಗೆ ನಾಳೆ ತಂಡ ಆಯ್ಕೆ!

ಪಂತ್ ಏಕದಿನ ನಾಯಕತ್ವ ವಹಿಸಲು ಇನ್ನೂ ಪಕ್ವವಾಗಿಲ್ಲ ಎನಿಸಿದರೆ, ಈಗಾಗಲೆ ನಾಯಕತ್ವದ ಅನುಭವ ಹೊಂದಿರುವ ಕೆಎಲ್ ರಾಹುಲ್ ಜತೆಗೆ ಮಾಜಿ ನಾಯಕ ರೋಹಿತ್ ಶರ್ಮ, ಅಕ್ಷರ್ ಪಟೇಲ್ ಹೆಸರು ಕೂಡ ಏಕದಿನ ತಂಡ ಹಂಗಾಮಿ ನಾಯಕತ್ವಕ್ಕೆ ಕೇಳಿಬಂದಿದೆ.

ಹಾಲಿ ಟೆಸ್ಟ್ ಸರಣಿಯ ಬಳಿಕ ವೇಗಿ ಬುಮ್ರಾ ವಿಶ್ರಾಂತಿ ಪಡೆಯಲಿದ್ದು, ಸಿರಾಜ್ ಬೌಲಿಂಗ್ ವಿಭಾಗವನ್ನು ಮುನ್ನಡೆಸಲಿದ್ದಾರೆ. ಸದ್ಯ ಬಿಸಿಸಿಐ ಶ್ರೇಷ್ಠತಾ ಕೇಂದ್ರದ ಪುನಶ್ಚೇತನ ಶಿಬಿರದಲ್ಲಿರುವ ಹಾರ್ದಿಕ್ ಪಾಂಡ್ಯ ವಿಶ್ವಕಪ್‌ವರೆಗೂ ಟಿ20 ಪಂದ್ಯಗಳಿಗೆ ಮಾತ್ರ ಲಭ್ಯರಿದ್ದು, ಏಕದಿನ ಸರಣಿಗೆ ಡೌಟ್ ಎನ್ನಲಾಗಿದೆ. 

ದ.ಆಫ್ರಿಕಾ ಸರಣಿಗೆ ಆಯ್ಕೆಯಾಗುವ ತಂಡವೇ ಮುಂದಿನ ವರ್ಷ ೆಬ್ರವರಿ-ಮಾರ್ಚ್‌ನಲ್ಲಿ ಭಾರತ ಹಾಗೂ ಶ್ರೀಲಂಕಾ ಜಂಟಿ ಆತಿಥ್ಯದಲ್ಲಿ ನಡೆಯಲಿರುವ ಟಿ20 ವಿಶ್ವಕಪ್‌ಗೆ ಅಂತಿಮವಾಗುವ ಸಾಧ್ಯತೆಗಳಿವೆ. ಟಿ20 ನಾಯಕ  ಸೂರ್ಯಕುಮಾರ್ ಯಾದವ್ ಹಾಗೂ ಕೋಚ್ ಗಂಭೀರ್ ತಂಡದ ಕಾಂಬಿನೇಷನ್‌ನ ಪ್ರಯೋಗಕ್ಕೂ ಈ ಸರಣಿ ನಿರ್ಣಾಯಕ ಎನಿಸಿದೆ. ಐಸಿಸಿ ನಿಯಮದನ್ವಯ ಟಿ20 ವಿಶ್ವಕಪ್ ಟೂರ್ನಿಗೆ ಒಂದು ತಿಂಗಳು ಮುಂಚಿತವಾಗಿ ತಂಡವನ್ನು ಹೆಸರಿಸಬೇಕಿದೆ.

ಐಸಿಸಿ ಟೂರ್ನಿಗೆ ಮುನ್ನ ಭಾರತ 10 ಟಿ20 ಆಡಲಿದ್ದು, ನ್ಯೂಜಿಲೆಂಡ್ ವಿರುದ್ಧದ ಸರಣಿ ಜನವರಿಯಲ್ಲಿ ನಿಗದಿಯಾಗಿದೆ. ದ.ಆಫ್ರಿಕಾ ಬಳಿಕ ನ್ಯೂಜಿಲೆಂಡ್ ವಿರುದ್ಧ ಐದು ಪಂದ್ಯಗಳ ಸರಣಿ ವಿಶ್ವಕಪ್‌ಗೆ ಮುನ್ನ ಭಾರತ ತಂಡ ಆಡಲಿರುವ ಕೊನೇ ಚುಟುಕು ಸರಣಿ ಆಗಿರಲಿದೆ. ವಿಶ್ವಕಪ್‌ನಲ್ಲಿ ಆಡುವ ತಂಡವೇ ಕಿವೀಸ್ ವಿರುದ್ಧದ ಸರಣಿಯಲ್ಲಿ ಆಡುವ ನಿರೀಕ್ಷೆ ಇದೆ. ಹೀಗಾಗಿ ಟಿ20 ತಂಡದಲ್ಲಿ ಪ್ರಯೋಗ ನಡೆಸಲು ಹರಿಣಗಳ ವಿರುದ್ಧದ ಸರಣಿಯೇ ಕೊನೇ ಅವಕಾಶವಾಗಿದೆ.