ಜೋಫ್ರಾ ಆರ್ಚರ್​ ಚಿನ್ನದ ಸರ ನಾಪತ್ತೆ: ಪಾಕ್​​ ಕ್ರಿಕೆಟಿಗರು, ಅಭಿಮಾನಿಗಳ ಮೇಲೆ ಬಿತ್ತು ಎಲ್ಲರ ಕಣ್ಣು! Jofra Archer

Jofra Archer : ಐಸಿಸಿ ಪುರುಷರ ಟಿ20 ವಿಶ್ವಕಪ್ ಟೂರ್ನಿಯಲ್ಲಿ ಪಾಕಿಸ್ತಾನಿ ಆಟಗಾರರು ಭಾರಿ ಅವಮಾನಕ್ಕೆ ಗುರಿಯಾಗಿದ್ದಾರೆ. ಪ್ರತಿ ಪಂದ್ಯದಲ್ಲೂ ಚಿನ್ನದ ಸರದೊಂದಿಗೆ ಮೈದಾನಕ್ಕೆ ಇಳಿಯುತ್ತಿದ್ದ ಇಂಗ್ಲೆಂಡ್ ತಂಡದ ಸ್ಟಾರ್ ಬೌಲರ್ ಜೋಫ್ರಾ ಆರ್ಚರ್, ನಿನ್ನೆ ಚಿನ್ನದ ಸರವಿಲ್ಲದೇ ಕಾಣಿಸಿಕೊಂಡರು. ಹೀಗಾಗಿ, ಅವರ ಚಿನ್ನ ನಾಪತ್ತೆಯಾಗಿರುವುದಕ್ಕೂ ಮತ್ತು ಪಾಕಿಸ್ತಾನದ ಆಟಗಾರರಿಗೆ ಲಿಂಕ್​ ಮಾಡಿ ಸಾಮಾಜಿಕ ಜಾಲತಾಣದಲ್ಲಿ ಟ್ರೋಲ್​ ಮಾಡಲಾಗುತ್ತಿದೆ.

ಅದರಲ್ಲೂ, ಇಂಗ್ಲೆಂಡ್ ತಂಡದ ಅಭಿಮಾನಿಗಳು ಪಾಕ್​ ಆಟಗಾರರನ್ನು ಟ್ರೋಲ್ ಮಾಡಲು ಪ್ರಾರಂಭಿಸಿದ್ದಾರೆ. ಪಾಕಿಸ್ತಾನಿ ಆಟಗಾರರೇ ಕಳ್ಳತನ ಮಾಡಿರಬೇಕೆಂದು ಹೀಯಾಳಿಸುತ್ತಿದ್ದಾರೆ. ಇಂಗ್ಲೆಂಡ್​ ತಂಡದ ಅಭಿಮಾನಿಗಳ ಜತೆ ಟೀಮ್​ ಇಂಡಿಯಾ ಅಭಿಮಾನಿಗಳು ಪಾಕ್​ ಆಟಗಾರರನ್ನು ಗೇಲಿ ಮಾಡುತ್ತಿದ್ದಾರೆ. ಇದರೊಂದಿಗೆ ಜೋಫ್ರಾ ಆರ್ಚರ್ ಅವರ ಚಿನ್ನದ ಸರ ನಾಪತ್ತೆ ಪ್ರಕರಣ ಈಗ ಭಾರಿ ಚರ್ಚೆಯಾಗುತ್ತಿದೆ.

ಅಂದಹಾಗೆ, ಟಿ20 ವಿಶ್ವಕಪ್​​ನ ಟೂರ್ನಮೆಂಟ್ ಸೂಪರ್ 8 ರ ಭಾಗವಾಗಿ ಮಂಗಳವಾರ ಪಲ್ಲೆಕೆಲೆ ಅಂತಾರಾಷ್ಟ್ರೀಯ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ಇಂಗ್ಲೆಂಡ್ ಮತ್ತು ಪಾಕಿಸ್ತಾನ ನಡುವೆ ನಿರ್ಣಾಯಕ ಪಂದ್ಯ ನಡೆಯಿತು. ಇಂಗ್ಲೆಂಡ್ ತಂಡ ಎರಡು ವಿಕೆಟ್‌ಗಳಿಂದ ಗೆದ್ದಿತು. ಇದರೊಂದಿಗೆ ಪಾಕಿಸ್ತಾನದ ಸೆಮಿಫೈನಲ್ ಆಸೆ ಭಗ್ನಗೊಂಡಿತು ಮತ್ತು ಇಂಗ್ಲೆಂಡ್ ತಂಡ ಸೆಮಿಫೈನಲ್‌ಗೆ ಪ್ರವೇಶಿಸಿತು.

ಆದಾಗ್ಯೂ, ಈ ಪಂದ್ಯದ ನಂತರ, ಜೋಫ್ರಾ ಆರ್ಚರ್ ಚಿನ್ನದ ಸರ ವಿಷಯವು ಬಿಸಿ ಚರ್ಚೆಯ ವಿಷಯವಾಗಿದೆ. ಜೋಫ್ರಾ ಆರ್ಚರ್ ಅವರು ಪ್ರತಿ ಪಂದ್ಯದಲ್ಲೂ ನಾಯಿ ಸರಪಳಿಯಂತೆ ಚಿನ್ನದ ಸರ ಧರಿಸುತ್ತಿದ್ದರು. ಆದರೆ, ಪಾಕಿಸ್ತಾನ ವಿರುದ್ಧದ ಪಂದ್ಯದ ಸಮಯದಲ್ಲಿ ಜೋಫ್ರಾ ಆರ್ಚರ್ ಚಿನ್ನದ ಸರವಿಲ್ಲದೇ ಬೌಲಿಂಗ್ ಮಾಡಿದರು. ಹೀಗಾಗಿ, ಎಲ್ಲಾ ಅಭಿಮಾನಿಗಳು ಚಿನ್ನದ ಸರದ ಬಗ್ಗೆ ಚರ್ಚಿಸುತ್ತಿದ್ದಾರೆ.

ಜೋಫ್ರಾ ಆರ್ಚರ್ ಅವರ ಚಿನ್ನದ ಸರ ಎಲ್ಲಿಗೆ ಹೋಯಿತು? ಯಾರಾದರೂ ಅದನ್ನು ಕದ್ದಿದ್ದಾರೆಯೇ? ಎಂದು ಇಂಗ್ಲೆಂಡ್​ ಅಭಿಮಾನಿಗಳು ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆ ಮಾಡುತ್ತಿದ್ದಾರೆ. ಇದರ ಹಿಂದೆ ಪಾಕಿಸ್ತಾನದ ಕೈವಾಡ ಇದೆ ಎಂದು ಪಾಕ್​ ಕ್ರಿಕೆಟಿಗರನ್ನು ಅಣಕಿಸುತ್ತಿದ್ದಾರೆ. ಪಾಕಿಸ್ತಾನ ಆರ್ಥಿಕ ಸ್ಥಿತಿಯನ್ನು ಉಲ್ಲೇಖಿಸಿ, ಪಾಕ್​ ಕ್ರಿಕೆಟಿಗರನ್ನು ಟ್ರೋಲ್​ ಮಾಡುತ್ತಿದ್ದಾರೆ. (ಏಜೆನ್ಸೀಸ್​).