Jasprit Bumrah: ಮೈದಾನದಲ್ಲೇ ರೊಚ್ಚಿಗೆದ್ದ ಜಸ್ಪ್ರೀತ್ ಬುಮ್ರಾ: ಮಾರ್ಕರ್ ಒದ್ದು ಕಿರುಚಾಡಿದ ಯಾರ್ಕರ್ ಕಿಂಗ್!

ಹೌದು, ಆರ್​ಸಿಬಿ ವಿರುದ್ಧದ ಪಂದ್ಯದ ವೇಳೆ ಬುಮ್ರಾ ಅವರು ತಮ್ಮ ಬೌಲಿಂಗ್ ಮಾರ್ಕರ್ ಅನ್ನು ಕಾಲಿನಿಂದ ಒದ್ದು, ಆಕ್ರೋಶದಿಂದ ಕಿರುಚಾಡುತ್ತಿರುವ ವಿಡಿಯೋ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಅಭಿಮಾನಿಗಳನ್ನು ಬೆಚ್ಚಿಬೀಳಿಸಿದೆ.

ಐಪಿಎಲ್ 2026ರ ಆರ್​​ಸಿಬಿ ವಿರುದ್ಧ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ ಪರ ಬೌಲಿಂಗ್ ಮಾಡುತ್ತಿದ್ದ ಬುಮ್ರಾ, ಅಂತಿಮ ಓವರ್‌ಗಳಲ್ಲಿ ರನ್ ನಿಯಂತ್ರಿಸಲು ಹರಸಾಹಸ ಪಡುತ್ತಿದ್ದರು. ಈ ವೇಳೆ ಸತತವಾಗಿ ವೈಡ್ ಅಥವಾ ನೋ-ಬಾಲ್ ತೀರ್ಪು ಬಂದ ಹಿನ್ನೆಲೆಯಲ್ಲಿ ಬುಮ್ರಾ ತಾಳ್ಮೆ ಕಳೆದುಕೊಂಡಂತೆ ಕಂಡುಬಂದರು. ತಮ್ಮ ರನ್ನಪ್ ಮುಗಿಸಿದ ನಂತರ ಸಿಟ್ಟಿನಿಂದ ಬೌಲಿಂಗ್ ಮಾರ್ಕರ್ ಅನ್ನು ಒದ್ದು, ಗಾಳಿಯಲ್ಲಿ ಕೈಬೀಸುತ್ತಾ ಕಿರುಚಾಡಿದರು.

ಸಾಮಾನ್ಯವಾಗಿ ಬುಮ್ರಾ ಮೈದಾನದಲ್ಲಿ ಸ್ಲೆಡ್ಜಿಂಗ್ ಮಾಡುವುದಾಗಲಿ ಅಥವಾ ಸಿಟ್ಟು ಮಾಡುವುದನ್ನಾಗಲಿ ಯಾರೂ ನೋಡಿಲ್ಲ. ಆಕ್ರಮಣಕಾರಿ ಬೌಲರ್ ಆಗಿದ್ದರೂ ಅವರ ನಡವಳಿಕೆ ಸದಾ ಸಂಯಮದಿಂದ ಕೂಡಿರುತ್ತಿತ್ತು. ಆದರೆ, 'ಅನ್-ಸೀನ್' (Unseen) ಎಂದು ಕರೆಯಲಾಗುತ್ತಿರುವ ಈ ಹೊಸ ವಿಡಿಯೋದಲ್ಲಿ ಬುಮ್ರಾ ಅವರ ಇನ್ನೊಂದು ಮುಖ ಅನಾವರಣಗೊಂಡಿದೆ. "ಬುಮ್ರಾ ಇಷ್ಟೊಂದು ಸಿಟ್ಟು ಮಾಡುವುದನ್ನು ನಾವು ಎಂದೂ ನೋಡಿಲ್ಲ" ಎಂದು ನೆಟ್ಟಿಗರು ಕಮೆಂಟ್ ಮಾಡುತ್ತಿದ್ದಾರೆ.

ಡೆತ್ ಓವರ್ ಸ್ಪೆಷಲಿಸ್ಟ್ ಆಗಿರುವ ಬುಮ್ರಾ ಮೇಲೆ ಇಡೀ ತಂಡದ ಜವಾಬ್ದಾರಿ ಇತ್ತು. ಮೈದಾನದ ಉಷ್ಣಾಂಶ ಮತ್ತು ಪಂದ್ಯದ ಗೆಲುವಿನ ಒತ್ತಡವೇ ಬುಮ್ರಾ ಅವರನ್ನು ಈ ರೀತಿ ರೊಚ್ಚಿಗೇಳುವಂತೆ ಮಾಡಿರಬಹುದು ಎಂದು ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ.

ಬುಮ್ರಾ ಅವರ ಈ ವಿಡಿಯೋ ಕ್ಲಿಪ್ ಕೆಲವೇ ಗಂಟೆಗಳಲ್ಲಿ ಮಿಲಿಯನ್ ವೀಕ್ಷಣೆಗಳನ್ನು ಕಂಡಿದೆ. ಕೆಲವರು "ಬೌಲರ್‌ಗಳಿಗೆ ಆಕ್ರಮಣಕಾರಿ ಗುಣವಿರಬೇಕು, ಅದು ತಪ್ಪಲ್ಲ" ಎಂದು ಬೆಂಬಲಿಸಿದರೆ, ಇನ್ನು ಕೆಲವರು "ಬುಮ್ರಾ ಅಂತಹ ಹಿರಿಯ ಆಟಗಾರರು ಮೈದಾನದಲ್ಲಿ ಶಿಸ್ತು ಕಾಪಾಡಿಕೊಳ್ಳಬೇಕು" ಎಂದು ಕಿವಿಮಾತು ಹೇಳುತ್ತಿದ್ದಾರೆ,(ಏಜೆನ್ಸೀಸ್).