ಅದು ಕ್ಯಾಚ್​ ಅಲ್ವೇ ಅಲ್ಲ! ಅಂಪೈರ್​ ಜೊತೆ ಕೊಹ್ಲಿ ವಾಗ್ವಾದ; ಮೋಸದಾಟ ಆರೋಪಕ್ಕೆ ತುಟಿಬಿಚ್ಚಿದ ಹೋಲ್ಡರ್​

Controversial Catch: ನಿನ್ನೆ (ಏ.30) ಅಹಮದಾಬಾದ್​ ಕ್ರೀಡಾಂಗಣದಲ್ಲಿ ನಡೆದ ಗುಜರಾತ್​ ಟೈಟನ್ಸ್ ಮತ್ತು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ನಡುವಿನ 19ನೇ ಆವೃತ್ತಿಯ ಐಪಿಎಲ್​ ಪಂದ್ಯದಲ್ಲಿ 4 ವಿಕೆಟ್​ಗಳಿಂದ ಜಿಟಿ ಅತ್ಯಂತ ಸುಲಭ ಗೆಲುವನ್ನು ದಾಖಲಿಸಿತು. ಮತ್ತೊಂದೆಡೆ, ಆರ್​ಸಿಬಿ ನಾಯಕ ರಜತ್ ಪಾಟೀದಾರ್ ಅವರು ಬ್ಯಾಟಿಂಗ್​ ಮಾಡುವಾಗ ಜೇಸನ್​ ಹೋಲ್ಡರ್​ ಹಿಡಿದ ಕ್ಯಾಚ್​ವೊಂದು ಸದ್ಯ ಭಾರೀ ವಿವಾದಕ್ಕೆ ಗುರಿಯಾಗಿದೆ.

ಅರ್ಷದ್​ ಖಾನ್​ ಬೌಲಿಂಗ್​ನಲ್ಲಿ ರಜತ್​ ಪಾಟೀದಾರ್​ ಕ್ರೀಸ್​ನಲ್ಲಿದ್ದರು. ಈ ವೇಳೆ ಶಾರ್ಟ್​ ಬಾಲ್​ಗೆ ರಜತ್​ ಪುಲ್​ ಆಡಿದರು. ಮೇಲೋದ ಚೆಂಡಿಗೆ ಕೈಹಾಕಿದ ಜೇಸನ್ ಹೋಲ್ಡರ್​, ಯಶಸ್ವಿಯಾಗಿ ಕ್ಯಾಚ್​ ಹಿಡಿದರು. ಆದರೆ, ಅದು ನೆಲಕ್ಕೆ ತಾಕಿತು ಎಂಬುದು ಮೇಲ್ನೋಟಕ್ಕೆ ಸ್ಪಷ್ಟವಾಗಿ ಕಾಣಿಸಿದ್ದೇ ಈಗ ದೊಡ್ಡ ವಿವಾದಕ್ಕೆ ಕಾರಣವಾಗಿದೆ. ಈ ಒಂದು ಕ್ಯಾಚ್​ನಲ್ಲಿ ಬಾಲ್​ ನೆಲಕ್ಕೆ ಟಚ್​ ಆಗಿದೆ ಎಂದು ಸ್ವತಃ ವಿರಾಟ್​ ಕೊಹ್ಲಿ ಬೌಂಡರಿ ಲೈನ್​ನಲ್ಲಿ ನಿಂತು ಅಂಪೈರ್​ ಜೊತೆಗೆ ಜಗಳವಾಡಿದರು. ಈ ದೃಶ್ಯ ನೋಡ್ತಿದ್ದಂತೆ ಆರ್​ಸಿಬಿ ಅಭಿಮಾನಿಗಳು ಸಿಟ್ಟಿಗೆದ್ದು, ಇದೆಂಥಾ ಮೋಸದಾಟ ಎಂದು ದೂರಿದರು.

ತಮ್ಮ ಬೌಲಿಂಗ್ ಮತ್ತು ಫೀಲ್ಡಿಂಗ್ ಮೂಲಕ ತಂಡಕ್ಕೆ ನಿರ್ಣಾಯಕ ಗೆಲುವು ತಂದುಕೊಟ್ಟ ಹೋಲ್ಡರ್, ಪ್ಲೇಯರ್ ಆಫ್​ ದಿ ಮ್ಯಾಚ್​ ಪ್ರಶಸ್ತಿ ಪಡೆದ ಬಳಿಕ ವಿವಾದಕ್ಕೆ ಪ್ರತಿಕ್ರಿಯಿಸಿದರು. ಈ ಪಂದ್ಯವು ನನಗೆ ವೈಯಕ್ತಿಕವಾಗಿ ಸಾಕಷ್ಟು ತೃಪ್ತಿಯನ್ನು ತಂದುಕೊಟ್ಟಿದೆ ಮತ್ತು ನಾವು ತಂಡವಾಗಿ ಅದ್ಭುತ ಪ್ರದರ್ಶನ ನೀಡಿದೆವು. ರಜತ್ ಪಾಟೀದಾರ್ ಅವರು ಹೊಡೆದ ಬಾಲ್​ ಅನ್ನು ಹಿಡಿಯುವ ಸಮಯದಲ್ಲಿ ಕಗಿಸೊ ರಬಾಡ ಅವರು ನನ್ನ ಪಕ್ಕದಲ್ಲೇ ಇದ್ದರು. ಅವರಿಗೆ ಡಿಕ್ಕಿ ಹೊಡೆಯದಂತೆ ಜಾಗರೂಕತೆ ವಹಿಸಿಯೇ ನಾನು ಕ್ಯಾಚ್​ ಹಿಡಿದದ್ದು ಎಂದು ಹೇಳಿದರು.

ಕ್ಯಾಚ್ ಸಮಯದಲ್ಲಿ ನನ್ನ ಸಂಪೂರ್ಣ ಗಮನ ಚೆಂಡಿನ ಮೇಲಿತ್ತು. ರಬಾಡ ಕೂಡ ನನ್ನ ಹತ್ತಿರದಲ್ಲಿದ್ದರು. ನಾನು ನೆಲಕ್ಕೆ ಬೀಳದಂತೆ ನೋಡಿಕೊಂಡೆ. ಅಂತಿಮವಾಗಿ ಕ್ಯಾಚ್ ಅನ್ನು ಯಶಸ್ವಿಯಾಗಿ ಹಿಡಿದಿದ್ದಕ್ಕೆ ನನಗೆ ಸಂತೋಷವಿದೆ. ಈ ಕ್ಯಾಚ್​ ನಮ್ಮ ತಂಡದ ಗೆಲುವಿಗೆ ತುಂಬಾ ಸಹಾಯ ಮಾಡಿತು ಎಂಬುದೇ ನನಗೆ ತೃಪ್ತಿಕರ ಎಂದು ಹೇಳಿದರು,(ಏಜೆನ್ಸೀಸ್).