ಶ್ರೀಲಂಕಾ ವಿರುದ್ಧ ಟೆಸ್ಟ್ ಸರಣಿಗೆ ಬುಮ್ರಾ ಬದಲಿಗೆ ಜಮ್ಮು- ಕಾಶ್ಮೀರದ ವೇಗಿ ಎಂಟ್ರಿ: ವೈದ್ಯಕೀಯ ಸಿಬ್ಬಂದಿ ಪರಾಮರ್ಶೆ

ನವದೆಹಲಿ: ರಣಜಿ ಟ್ರೋಫಿಯ ಕಳೆದ ಎರಡು ಆವೃತ್ತಿಯಲ್ಲಿ ಒಟ್ಟಾರೆ 104 ವಿಕೆಟ್ ಕಬಳಿಸಿದ್ದ ಜಮ್ಮು ಮತ್ತು ಕಾಶ್ಮೀರದ ವೇಗಿ ಅಕಿಬ್ ನಬಿ ಭಾರತ ಟೆಸ್ಟ್ ತಂಡಕ್ಕೆ ಚೊಚ್ಚಲ ಕರೆ ಪಡೆದಿದ್ದಾರೆ. ಮೊಣಕಾಲಿನ ಗಾಯದ ಸಮಸ್ಯೆಯಿಂದ ಚೇತರಿಸಿಕೊಳ್ಳುತ್ತಿರುವ ಜಸ್‌ಪ್ರೀತ್ ಬುಮ್ರಾ ಬದಲಿಗೆ ಶ್ರೀಲಂಕಾ ವಿರುದ್ಧದ ಎರಡು ಪಂದ್ಯಗಳ ಟೆಸ್ಟ್ ಸರಣಿಗೆ ಅವರು ತಂಡಕ್ಕೆ ಸೇರ್ಪಡೆಗೊಂಡಿದ್ದಾರೆ.

ಕಾಶ್ಮೀರದ ಬರಮುಲ್ಲದ 29 ವರ್ಷದ ಅಕಿಬ್ ನಬಿ ಭಾರತ ತಂಡಕ್ಕೆ ಆಯ್ಕೆಯಾದ ಜಮ್ಮು-ಕಾಶ್ಮೀರದ ಮೂರನೇ ಆಟಗಾರ ಎನಿಸಿದ್ದಾರೆ. ಪರ್ವೇಜ್ ರಸೂಲ್, ಉಮರ್ ಮಲಿಕ್ ಸೀಮಿತ ಓವರ್‌ಗಳಲ್ಲಿ ಟೀಮ್ ಇಂಡಿಯಾ ಪರ ಆಡಿದ ಮೊದಲಿಬ್ಬರು. 2025-26ರ ಚಾಂಪಿಯನ್ ಜಮ್ಮು-ಕಾಶ್ಮೀರ ಪರ 60 ವಿಕೆಟ್ ಪಡೆದಿದ್ದ ಅಕಿಬ್ ನಬಿ, ಇತ್ತೀಚೆಗೆ ಭಾರತ ಎ ಪರ ಆಡಿದ 2 ಪಂದ್ಯಗಳಲ್ಲಿ 6 ವಿಕೆಟ್ ಪಡೆದಿದ್ದರು. ಎಡಗೈ ಬ್ಯಾಟರ್ ಸಾಯಿ ಸುದರ್ಶನ್ ಸಹ ಗಾಯದ ಸಮಸ್ಯೆಯಿಂದ ಚೇತರಿಸಿಕೊಳ್ಳುತ್ತಿದ್ದು, ಫಿಟ್ನೆಸ್ ಟೆಸ್ಟ್ ಎದುರಿಸಬೇಕಿದೆ.

ಅಗಸ್ಟ್ 15ರಂದು ಗಾಲೆಯಲ್ಲಿ ಆರಂಭವಾಗಲಿರುವ ಸರಣಿಗೆ ಮಂಗಳವಾರ ಭಾರತ ತಂಡ, ಲಂಕಾಗೆ ತೆರಳಲಿದೆ. ಬುಮ್ರಾ ಗೈರು ಶುಭಮಾನ್ ಗಿಲ್ ಬಳಗಕ್ಕೆ ಹಿನ್ನಡೆ ಎನಿಸಿದ್ದು, ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್‌ಷಿಪ್‌ನ (ಡಬ್ಲುೃಟಿಸಿ) 4ನೇ ಆವೃತ್ತಿಯಲ್ಲಿ ಫೈನಲ್‌ಗೆ ಅರ್ಹತೆ ಪಡೆಯಲು, ಮುಂದಿನ 9ರಲ್ಲಿ 7 ಟೆಸ್ಟ್ ಗೆಲ್ಲುವ ಸವಾಲು ಭಾರತದ ಮುಂದಿದೆ.

ತವರಿನ ಟೆಸ್ಟ್ ಸರಣಿಗಳಲ್ಲಿ ನೀರಸ ಪ್ರದರ್ಶನ ಹಾಗೂ ಯುಕೆ ಪ್ರವಾಸದ ವೈಟ್‌ಬಾಲ್ ಸರಣಿ ಸೋಲಿನ ಬೆನ್ನಲ್ಲೇ ಭಾರತ ತಂಡದ ತರಬೇತಿ ಬಳಗದಲ್ಲಿ ಕೆಲ ಬದಲಾವಣೆ ನಡೆಸಿರುವ ಬಿಸಿಸಿಐ, ಆಟಗಾರರ ಪದೇಪದೆ ಗಾಯದ ಸಮಸ್ಯೆ ಬಗ್ಗೆ ಕಳವಳ ವ್ಯಕ್ತಪಡಿಸಿದೆ. ಇದರಿಂದ ಶ್ರೀಲಂಕಾ ಪ್ರವಾಸದ ನಂತರ ಭಾರತ ತಂಡ ಹಾಗೂ ಬಿಸಿಸಿಐ ಶ್ರೇಷ್ಠತಾ ಕೇಂದ್ರದ (ಸಿಒಇ) ವೈದ್ಯಕೀಯ ತಂಡದ ಅಧಿಕಾರಿಗಳ ಪರಾಮರ್ಶೆ ನಡೆಸುವ ಸಾಧ್ಯತೆಗಳಿವೆ ಎನ್ನಲಾಗಿದೆ. 2022ರಲ್ಲಿ ನಿತಿನ್ ಪಟೇಲ್ ಅವರಿಂದ ತೆರವಾದ ಸ್ಥಾನಕ್ಕೆ ಮುಖ್ಯ ಫಿಸಿಯೋಥೆರಪಿಸ್ಟ್ ಆಗಿ ಕಮಲೇಶ್ ಜೈನ್ ನೇಮಕಗೊಂಡಿದ್ದರು.

ಹಿರಿಯ ವೇಗಿ ಜಸ್‌ಪ್ರೀತ್ ಬುಮ್ರಾ ಸೇರಿ ಹರ್ಷಿತ್ ರಾಣಾ, ನಿತೀಶ್ ಕುಮಾರ್ ರೆಡ್ಡಿ, ವಾಷಿಂಗ್ಟನ್ ಸುಂದರ್ ಹಲವು ಆಟಗಾರರು ಕೇವಲ 2ರಿಂದ 3 ಪಂದ್ಯಕ್ಕೆ ಗಾಯದ ಸಮಸ್ಯೆ ಎದುರಿಸುತ್ತಿದ್ದಾರೆ. ಜತೆಗೆ ಹಿರಿಯ ಆಟಗಾರರು ಬಿಸಿಸಿಐ ನೇಮಿಸಿರುವ ವೈದ್ಯಕೀಯ ಸಿಬ್ಬಂದಿ ಹೊರತುಪಡಿಸಿ ಹೊರಗಿನ ಹಿರಿಯ ಅಧಿಕಾರಿಗಳ ನೆರವು ಪಡೆಯುತ್ತಿರುವುದು ಇದಕ್ಕೆ ಕಾರಣ ಎಂದು ವರದಿಯಾಗಿದೆ.