ಇದಕ್ಕೆ ಪಾಕ್​ ಗುಳ್ಳೆನರಿ ಅಂತ ಅನ್ನೋದು! ಟಿ20 ವಿಶ್ವಕಪ್​ ಆಡಲು ಸಖತ್ ಹೈಡ್ರಾಮಾ, ಇರ್ಫಾನ್​ ಪಠಾಣ್​ ಛೀಮಾರಿ | Pakistan

ನವದೆಹಲಿ: ಭಾರತದಲ್ಲಿ ನಮ್ಮ ಆಟಗಾರರಿಗೆ ಸುರಕ್ಷತೆ ಇಲ್ಲ. ಹೀಗಾಗಿ, ಟಿ20 ವಿಶ್ವಕಪ್​ನಲ್ಲಿ ನಮ್ಮ ಪಂದ್ಯಗಳನ್ನು ಶ್ರೀಲಂಕಾದಲ್ಲಿ ಆಡಿಸಬೇಕು ಎಂದು ಮನವಿ ಮಾಡಿಕೊಂಡಿದ್ದ ಬಾಂಗ್ಲಾ ಕ್ರಿಕೆಟ್​ಗೆ ಕಡೆಗೂ ಆಗಿದ್ದು ಭಾರೀ ಮುಖಭಂಗವೇ. ಬಾಂಗ್ಲಾದೇಶ ತಂಡವನ್ನು ಟೂರ್ನಿಯ ಪಟ್ಟಿಯಿಂದ ಕಿತ್ತುಬಿಸಾಡಿದ ಐಸಿಸಿ, ಅವರ ಸ್ಥಾನವನ್ನು ಸ್ಕಾಟ್​ಲ್ಯಾಂಡ್​ಗೆ ನೀಡಿತು. ಈ ಬೆಳವಣಿಗೆಯ ಬೆನ್ನಲ್ಲೇ ತನ್ನ ಗುಳ್ಳೆನರಿ ಬುದ್ಧಿ ತೋರಿರುವ ಪಾಕಿಸ್ತಾನ, ಸದ್ಯ ಹೈಡ್ರಾಮಾವನ್ನು ಮುಂದಿನ ವಾರದವರೆಗೆ ನಡೆಸಲು ಮುಂದಾಗಿದೆ.  

ವಿಶ್ವಕಪ್​ನಲ್ಲಿ ನಾವು ಭಾಗಿಯಾಗುವುದಿಲ್ಲ. ಭಾರತದ ವಿರುದ್ಧ ಪಂದ್ಯವನ್ನು ಬಹಿಷ್ಕರಿಸುತ್ತೇವೆ ಎಂದೆಲ್ಲ ಐಸಿಸಿಗೆ ಬೆದರಿಕೆ ಹಾಕುತ್ತಿದೆ. ಈ ಬಗ್ಗೆ ಮಾತನಾಡಿರುವ ಪಿಸಿಬಿ ಮುಖ್ಯಸ್ಥ ಮೊಹ್ಸಿನ್ ನಖ್ವಿ, ನಾವು ನಮ್ಮ ಪ್ರಧಾನಿ ಜತೆ ಮಾತನಾಡಿ, ಆಡಬೇಕಾ, ಬೇಡವಾ ಎಂಬ ನಿರ್ಧಾರವನ್ನು ಶುಕ್ರವಾರ (ಜ.30) ಅಥವಾ ಸೋಮವಾರ (ಫೆ.2) ತಿಳಿಸುತ್ತೇವೆ ಎಂದಿದ್ದಾರೆ. ಪಾಕ್​ನ ಈ ನಾಟಕಗಳಿಂದ ಕೆರಳಿರುವ ಟೀಮ್ ಇಂಡಿಯಾದ ಮಾಜಿ ಕ್ರಿಕೆಟಿಗ ಇರ್ಫಾನ್ ಪಠಾಣ್, ಪಿಸಿಬಿಗೆ ಛೀಮಾರಿ ಹಾಕಿದ್ದಾರೆ.  

ಬಾಂಗ್ಲಾದೇಶ ಬದಲಿಗೆ ಸ್ಕಾಟ್​ಲ್ಯಾಂಡ್​ಗೆ ಐಸಿಸಿ ಸ್ಥಾನ ನೀಡಿದ್ದೇ ತಡ ಪಾಕಿಸ್ತಾನ ಬೆದರಿಕೆಗಳನ್ನು ಹಾಕುತ್ತಿದೆ.  ಇದು ಸಂಪೂರ್ಣ ಅಸಂಬದ್ಧ! ಇದೇ ನೀವು ಮೊದಲು ಹೈಬ್ರಿಡ್ ಮಾದರಿಗೆ ಒಪ್ಪಿಕೊಂಡಿದ್ದೀರಿ. ಭಾರತದೊಂದಿಗಿನ ಪಂದ್ಯವನ್ನು ಶ್ರೀಲಂಕಾದಲ್ಲಿ ಆಡಲು ಓಕೆ ಎಂದಿದ್ದೀರಿ ಅಂದಮೇಲೆ ಈಗ್ಯಾಕೆ ಇಂತಹ ವರಸೆ? ಎಂದು ಪಠಾಣ್ ಪ್ರಶ್ನಿಸಿದ್ದಾಗಿ 'ರೆವ್‌ಸ್ಪೋರ್ಟ್ಸ್​' ತನ್ನ ವರದಿಯಲ್ಲಿ ಉಲ್ಲೇಖಿಸಿದೆ.

ಪಾಕಿಸ್ತಾನ ಕ್ರಿಕೆಟ್ ಮಂಡಳಿ (ಪಿಸಿಬಿ) ಮುಖ್ಯಸ್ಥ ಮೊಹ್ಸಿನ್ ನಖ್ವಿ ಈ ವಿಷಯಕ್ಕೆ ಸಂಬಂಧಿಸಿದಂತೆ ತಮ್ಮ ದೇಶದ ಪ್ರಧಾನಿ ಶೆಹಬಾಜ್ ಷರೀಫ್ ಅವರನ್ನು ಭೇಟಿಯಾಗಿದ್ದು, ಟಿ20 ವಿಶ್ವಕಪ್​ ಟೂರ್ನಿಯಿಂದ ಐಸಿಸಿ ಬಾಂಗ್ಲಾದೇಶವನ್ನು ಹೊರಗಿಟ್ಟ ಹಿನ್ನೆಲೆ, ತಮ್ಮ ತಂಡ ಕೂಡ ಟೂರ್ನಿಯನ್ನು ಕೈಬಿಡುವ ಬಗ್ಗೆ ಪ್ರಧಾನಿಯೊಂದಿಗೆ ಚರ್ಚಿಸಿದ್ದಾಗಿ ತಿಳಿಸಿದ್ದಾರೆ. ದೀರ್ಘಕಾಲದ ಚರ್ಚೆಯ ಬಳಿಕ ಈ ವಿಚಾರದಲ್ಲಿ ತಮ್ಮ ನಿರ್ಧಾರವನ್ನು ಜ.30 ಅಥವಾ ಫೆ.02ರಂದು ತಿಳಿಸುವುದಾಗಿ ಪಾಕ್​ ತಾವು ಮಾಡುತ್ತಿರುವ ಹೈಡ್ರಾಮವನ್ನು ಮುಂದುವರಿಸಿದೆ,(ಏಜೆನ್ಸೀಸ್).