IPL ಟೆನ್ಶನ್ ಬೇಡವೇ ಬೇಡ: PSL ಆಯ್ಕೆ ಮಾಡಿಕೊಂಡ ಮೊಯೀನ್ ಅಲಿ ಆಡಿದ ಮಾತೇನು?

ಮೊಯೀನ್ ಅಲಿ ಅವರ ಪೂರ್ವಜರು ಪಾಕಿಸ್ತಾನದವರು. ಈ ಬಗ್ಗೆ ಮಾತನಾಡಿರುವ ಅವರು, "ನನ್ನ ಕುಟುಂಬದ ಬೇರುಗಳು ಇರುವುದು ಪಾಕಿಸ್ತಾನದಲ್ಲಿ. ನನ್ನ ವೃತ್ತಿಜೀವನದ ಅಂತಿಮ ಹಂತದಲ್ಲಿರುವಾಗ ನನ್ನ ಮೂಲದ ದೇಶದಲ್ಲಿ ಆಡುವುದು ನನಗೆ ಹೆಮ್ಮೆಯ ವಿಷಯ. ಇದು ಕೇವಲ ಕ್ರಿಕೆಟ್ ಅಲ್ಲ, ನನ್ನ ಸಂಸ್ಕೃತಿಯೊಂದಿಗೆ ಮರುಜೋಡಣೆಯಾಗುವ ಪ್ರಯತ್ನ" ಎಂದು ಹೇಳಿದ್ದಾರೆ. ಐಪಿಎಲ್ ನೀಡುವ ಭಾರಿ ಮೊತ್ತದ ಸಂಭಾವನೆಗಿಂತಲೂ ಈ ಭಾವನಾತ್ಮಕ ಸಂಬಂಧ ದೊಡ್ಡದು ಎಂಬುದು ಅಲಿ ಅವರ ಮಾತುಗಳ ಸಾರಾಂಶ.

ಐಪಿಎಲ್ ಸುಮಾರು ಎರಡು ತಿಂಗಳ ಕಾಲ ನಡೆಯುವ ಸುದೀರ್ಘ ಟೂರ್ನಿ. "ಐಪಿಎಲ್ ಅದ್ಭುತ ಲೀಗ್ ಎಂಬುದರಲ್ಲಿ ಸಂಶಯವಿಲ್ಲ, ಆದರೆ ಅದು ದೈಹಿಕವಾಗಿ ಮತ್ತು ಮಾನಸಿಕವಾಗಿ ಹೆಚ್ಚಿನ ಶಕ್ತಿಯನ್ನು ಬೇಡುತ್ತದೆ. ವಯಸ್ಸಾಗುತ್ತಿದ್ದಂತೆ ದೀರ್ಘಕಾಲ ಮನೆಯಿಂದ ದೂರವಿರುವುದು ಕಷ್ಟವಾಗುತ್ತದೆ. ಪಿಎಸ್‌ಎಲ್ ಅವಧಿ ಕಡಿಮೆ ಇರುವುದರಿಂದ ಕುಟುಂಬದೊಂದಿಗೆ ಸಮಯ ಕಳೆಯಲು ನನಗೆ ಸಾಧ್ಯವಾಗುತ್ತದೆ" ಎಂದು ಮೊಯೀನ್ ಅಲಿ ವಿವರಿಸಿದ್ದಾರೆ.

ಚೆನ್ನೈ ಸೂಪರ್ ಕಿಂಗ್ಸ್ (CSK) ತಂಡದ ಬಗ್ಗೆ ಅಪಾರ ಗೌರವ ಹೊಂದಿರುವ ಅಲಿ, "ಸಿಎಸ್‌ಕೆ ನನಗೆ ಕುಟುಂಬದಂತೆ ಇತ್ತು. ಅಲ್ಲಿ ನಾನು ನನ್ನ ಕ್ರಿಕೆಟ್ ಜೀವನದ ಅತ್ಯುತ್ತಮ ಕ್ಷಣಗಳನ್ನು ಕಳೆದಿದ್ದೇನೆ. ಈ ನಿರ್ಧಾರ ತೆಗೆದುಕೊಳ್ಳುವುದು ಸುಲಭವಾಗಿರಲಿಲ್ಲ. ಆದರೆ ಜೀವನದ ಈ ಹಂತದಲ್ಲಿ ಆದ್ಯತೆಗಳು ಬದಲಾಗುತ್ತವೆ" ಎಂದಿದ್ದಾರೆ.

ಸಾಮಾನ್ಯವಾಗಿ ವಿದೇಶಿ ಆಟಗಾರರು ಐಪಿಎಲ್ ಆಡಲು ಇತರ ಲೀಗ್‌ಗಳನ್ನು ತ್ಯಜಿಸುತ್ತಾರೆ. ಆದರೆ ಮೊಯೀನ್ ಅಲಿ ಅವರ ಈ ಉಲ್ಟಾ ನಿರ್ಧಾರವು "ಹಣಕ್ಕಿಂತ ನೆಮ್ಮದಿ ಮುಖ್ಯ" ಎಂಬ ಸಂದೇಶವನ್ನು ರವಾನಿಸಿದೆ. ಇಂಗ್ಲೆಂಡ್ ತಂಡದ ಇತರ ಆಟಗಾರರಿಗೂ ಇದು ಮಾದರಿಯಾಗಬಲ್ಲದು ಅಥವಾ ಚರ್ಚೆಗೆ ಕಾರಣವಾಗಬಲ್ಲದು ಎಂದು ವಿಶ್ಲೇಷಿಸಲಾಗುತ್ತಿದೆ,(ಏಜೆನ್ಸೀಸ್​).