ಇಂದು ಅಬುಧಾಬಿಯಲ್ಲಿ ಐಪಿಎಲ್​ ಮಿನಿ ಹರಾಜು; ಗ್ರೀನ್​, ವೆಂಕಟೇಶ್​, ಪಥಿರಣಗೆ ಬೇಡಿಕೆ ನಿರೀಕ್ಷೆ

ಮಿನಿ ಹರಾಜಿನಲ್ಲಿ ಆಟಗಾರರ ಖರೀದಿಗೆ 10 ತಂಡಗಳು ಒಟ್ಟು 237.55 ಕೋಟಿ ರೂ. ಬಜೆಟ್​ ಹೊಂದಿವೆ. ಈ ಪೈಕಿ ಕೋಲ್ಕತ ನೈಟ್​ರೈಡರ್ಸ್​ ತಂಡ ಸರ್ವಾಧಿಕ 64.30 ಕೋಟಿ ರೂ. ಮತ್ತು ಚೆನ್ನೈ ಸೂಪರ್​ಕಿಂಗ್ಸ್​ 43.40 ಕೋಟಿ ರೂ. ಹೊಂದಿವೆ. ಮುಂಬೈ ಇಂಡಿಯನ್ಸ್​ ಕನಿಷ್ಠ 2.75 ಕೋಟಿ ರೂ. ಮಾತ್ರ ಹೊಂದಿದೆ. ಹಾಲಿ ಚಾಂಪಿಯನ್​ ಆರ್​ಸಿಬಿ ತಂಡ 16.40 ಕೋಟಿ ರೂ. ಹೊಂದಿದ್ದು, ಹರಾಜಿನಲ್ಲಿ ಗರಿಷ್ಠ 8 ಆಟಗಾರರನ್ನಷ್ಟೇ (2 ವಿದೇಶಿ) ಖರೀದಿಸಲು ಅವಕಾಶವಿದೆ. ಮಿನಿ ಹರಾಜಿನಲ್ಲಿ ರೈಟ್​ ಟು ಮ್ಯಾಚ್​ (ಆರ್​ಟಿಎಂ) ಕಾರ್ಡ್​ ಬಳಸಲು ಅವಕಾಶವಿಲ್ಲ.

ಆಸ್ಟ್ರೆಲಿಯಾದ ಕ್ಯಾಮರಾನ್​ ಗ್ರೀನ್​ ಹರಾಜಿಗೆ ಬ್ಯಾಟರ್​ ಎಂದು ತಪ್ಪಾಗಿ ಹೆಸರು ನೋಂದಾಯಿಸಿಕೊಂಡಿದ್ದರೂ, ಬೌಲಿಂಗ್​ಗೂ ಫಿಟ್​ ಆಗಿರುವೆ ಎಂದು ತಿಳಿಸಿರುವುದರಿಂದ "ಆಲ್ರೌಂಡರ್​' ಆಗಿ ಭಾರಿ ಬಿಡ್​ ಪಡೆಯುವ ನಿರೀಕ್ಷೆ ಇದೆ. ಇನ್ನು ಕಳೆದ ಹರಾಜಿನಲ್ಲಿ ದಾಖಲೆಯ 23.75 ಕೋಟಿ ರೂ.ಗೆ ಕೆಕೆಆರ್​ ಪಾಲಾಗಿದ್ದ ವೆಂಕಟೇಶ್​ ಅಯ್ಯರ್​, ಈ ಬಾರಿ ಅಷ್ಟು ಮೊತ್ತಕ್ಕೆ ಅಲ್ಲದಿದ್ದರೂ, ಹೆಚ್ಚಿನ ಬೇಡಿಕೆಯನ್ನೇ ಪಡೆಯುವ ಸಾಧ್ಯತೆ ಇದೆ. ಮಾಲಿಂಗ ಬೌಲಿಂಗ್​ ಶೈಲಿಯ ಲಂಕಾ ವೇಗಿ ಮಥೀಶ್​ ಪಥಿರಣ ಸಿಎಸ್​ಕೆ ತಂಡದಿಂದ ರಿಲೀಸ್​ ಆಗಿರುವುದೇ ಅಚ್ಚರಿ. ಅವರನ್ನು ಖರೀದಿಸಲು ಕೂಡ ನಿಕಟ ಪೈಪೋಟಿ ಏರ್ಪಡುವ ಸಾಧ್ಯತೆ ಇದೆ. ದಿ ಹಂಡ್ರೆಡ್​ನಲ್ಲಿ ಮಿಂಚಿರುವ ಇಂಗ್ಲೆಂಡ್​ ಆಲ್ರೌಂಡರ್​ ಲಿಯಾಮ್​ ಲಿವಿಂಗ್​ಸ್ಟೋನ್​, ಟಿ20 ನಿವೃತ್ತಿ ಹಿಂಪಡೆದಿರುವ ದಣ ಆಫ್ರಿಕಾದ ವಿಕೆಟ್​ ಕೀಪರ್​&ಬ್ಯಾಟರ್​ ಕ್ವಿಂಟನ್​ ಡಿಕಾಕ್​ ಕೂಡ ಹೆಚ್ಚಿನ ಬೇಡಿಕೆ ಪಡೆಯುವ ನಿರೀಕ್ಷೆ ಇದೆ.

ಸೆಟ್​1 (ಬ್ಯಾಟರ್ಸ್​): ಡೆವೊನ್​ ಕಾನ್​ವೇ, ಜೇಕ್​ ಫ್ರೇಸರ್​ ಮೆಕ್​ಗುರ್ಕ್​, ಕ್ಯಾಮರಾನ್​ ಗ್ರೀನ್​, ಡೇವಿಡ್​ ಮಿಲ್ಲರ್​ (ತಲಾ 2 ಕೋಟಿ ಮೂಲಬೆಲೆ), ಸ್ರಾರ್ಜ್​ ಖಾನ್​, ಪೃಥ್ವಿ ಷಾ (ತಲಾ ‘75 ಲಕ್ಷ).

ಸೆಟ್​2 (ಆಲ್ರೌಂಡರ್ಸ್​): ಗಸ್​ ಅಟ್ಕಿನ್​ಸನ್​, ವಾನಿಂದು ಹಸರಂಗ, ವೆಂಕಟೇಶ್​ ಅಯ್ಯರ್​, ಲಿವಿಂಗ್​ಸ್ಟೋನ್​, ರಚಿನ್​ ರವೀಂದ್ರ (ತಲಾ 2 ಕೋಟಿ), ವಿಯಾನ್​ ಮಿಲ್ಡರ್​ (1 ಕೋಟಿ), ದೀಪಕ್​ ಹೂಡಾ (75 ಲಕ್ಷ).

ಸೆಟ್​3 (ವಿಕೆಟ್​ ಕೀಪರ್ಸ್​): ಫಿನ್​ ಅಲೆನ್​, ಬೆನ್​ ಡಕೆಟ್​, ಜೇಮಿ ಸ್ಮಿತ್​ (ತಲಾ 2 ಕೋಟಿ), ರಹಮಾನುಲ್ಲ ಗುರ್ಬಜ್​ (1.5 ಕೋಟಿ), ಜಾನಿ ಬೇರ್​ಸ್ಟೋ, ಕ್ವಿಂಟನ್​ ಡಿಕಾಕ್​ (ತಲಾ 1 ಕೋಟಿ), ಕೆಎಸ್​ ಭರತ್​ (75 ಲಕ್ಷ).

ಸೆಟ್​4 (ವೇಗಿಗಳು): ಗೆರಾಲ್ಡ್​ ಕೋಟ್​ಜೀ, ಜೇಕಬ್​ ಡಫಿ, ಮ್ಯಾಟ್​ ಹೆನ್ರಿ, ಅನ್ರಿಚ್​ ನೋರ್ಕಿಯಾ, ಮಥೀಶ ಪಥಿರಣ (ತಲಾ 2 ಕೋಟಿ), ಸ್ಪೆನ್ಸರ್​ ಜಾನ್ಸನ್​ (1.5 ಕೋಟಿ), ಆಕಾಶ್​ದೀಪ್​, ಜಲ್ಲಾಕ್​ ಫಾರೂಖಿ (ತಲಾ 1 ಕೋಟಿ), ಶಿವಂ ಮಾವಿ (75 ಲಕ್ಷ).

ಸೆಟ್​5 (ಸ್ಪಿನ್ನರ್ಸ್​): ರವಿ ಬಿಷ್ಣೋಯಿ, ಅಕೀಲ್​ ಹೊಸೈನ್​, ಮುಜೀಬ್​ ರೆಹಮಾನ್​, ಮಹೀಶ್​ ತೀಕ್ಷಣ (ತಲಾ 2 ಕೋಟಿ), ರಾಹುಲ್​ ಚಹರ್​ (1 ಕೋಟಿ).

ಮಹಾರಾಜ ಟ್ರೋಫಿ ಹಾಗೂ ಕೆಎಸ್​ಸಿಎ ಟೂರ್ನಿಗಳಲ್ಲಿ ಉತ್ತಮ ಪ್ರದರ್ಶನ ನೀಡಿರುವ ರಾಜ್ಯದ ಉದಯೋನ್ಮುಖ ಆಟಗಾರರು ಸೇರಿ ಒಟ್ಟು 17 ಕ್ರಿಕೆಟಿಗರು ಈ ಬಾರಿಯ ಹರಾಜಿನ ಅಂತಿಮ ಪಟ್ಟಿಯಲ್ಲಿ ಸ್ಥಾನ ಪಡೆದಿದ್ದಾರೆ. ಹಾಲಿ ಚಾಂಪಿಯನ್​ ಆರ್​ಸಿಬಿ ತಂಡ ಕೈ ಬಿಟ್ಟಿರುವ ಕರ್ನಾಟಕ ತಂಡದ ನಾಯಕ ಮಯಾಂಕ್​ ಅಗರ್ವಾಲ್​ (75 ಲಕ್ಷ ರೂ.) ಗರಿಷ್ಠ ಮೂಲಬೆಲೆ ಹೊಂದಿರುವ ಕನ್ನಡಿಗ ಎನಿಸಿದ್ದಾರೆ. ಅಭಿನವ್​ ಮನೋಹರ್​, ವಿದ್ಯಾಧರ್​ ಪಾಟೀಲ್​, ವಿದ್ವತ್​ ಕಾವೇರಪ್ಪ, ಕೆಎಲ್​ ಶ್ರೀಜಿತ್, ಯಶ್​ ರಾಜ್​ ಪೂಂಜಾ, ಅಭಿಲಾಷ್​ ಶೆಟ್ಟಿ, ಮನ್ವಂತ್​ ಕುಮಾರ್​, ಮನೋಜ್​ ಭಾಂಡಗೆ, ಪ್ರವಿಣ್​ ದುಬೆ, ಮ್ಯಾಕ್ನೀಲ್​ ನೂರಾನ್ಹಾ, ಶುಭಾಂಗ್​ ಹೆಗ್ಡೆ, ಶ್ರೀವತ್ಸ ಆಚಾರ್ಯ , ಹಾರ್ದಿಕ್​ ರಾಜ್​, ಮಾಧವ್​ ಬಜಾಜ್​, ತಲಾ 30 ಲಕ್ಷ ರೂ. ಮೂಲಬೆಲೆ ಹೊಂದಿದ್ದಾರೆ. ದೇಶೀಯ ಟೂರ್ನಿಯಲ್ಲಿ ಮಿಜೋರಾಂ ತಂಡ ಪ್ರತಿನಿಧಿಸುತ್ತಿರುವ ರಾಜ್ಯದ ಕೆ.ಸಿ ಕಾರ್ಯಪ್ಪ, ಜೆ. ಸುಚಿತ್​ ಸಹ ಅಂತಿಮ ಪಟ್ಟಿಯಲ್ಲಿದ್ದಾರೆ. ದೇವದತ್​ ಪಡಿಕ್ಕಲ್​ (ಆರ್​ಸಿಬಿ), ಕರುಣ್​ ನಾಯರ್​ (ಡೆಲ್ಲಿ), ಪ್ರಸಿದ್ಧ ಕೃಷ್ಣ (ಗುಜರಾತ್​), ವೈಶಾಕ್​ ವಿಜಯ್​ ಕುಮಾರ್​ (ಪಂಜಾಬ್​) ಹಾಗೂ ಶ್ರೇಯಸ್​ ಗೋಪಾಲ್​ (ಸಿಎಸ್​ಕೆ) ರಿಟೇನ್​ ಆಗಿದ್ದಾರೆ.