ಕ್ಯಾಮರಾನ್​ ಗ್ರೀನ್​, ಸ್ಮಿತ್​... IPL 2026 ಹರಾಜಿಗೆ ದಾಖಲೆಯ ನೋಂದಣಿ! ಪಟ್ಟಿಯಲ್ಲಿ ಸ್ಟಾರ್ ಕ್ರಿಕೆಟಿಗರು

ನವದೆಹಲಿ: ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) 2026ರ ಹರಾಜಿಗೆ ಇದೀಗ ದಿನಗಣನೆ ಆರಂಭವಾಗಿದೆ. ಇದೇ ಡಿಸೆಂಬರ್ 16ರಂದು ಅಬುಧಾಬಿಯಲ್ಲಿ ನಡೆಯಲಿರುವ ಹರಾಜಿಗೆ ಒಟ್ಟು 1,355 ಆಟಗಾರರು ಅಧಿಕೃತವಾಗಿ ನೋಂದಾಯಿಸಿಕೊಂಡಿದ್ದಾರೆ.

ಕ್ರಿಕ್‌ಬಜ್ ವರದಿ ಪ್ರಕಾರ, ಆಟಗಾರರ ಪಟ್ಟಿ 13 ಪುಟಗಳಷ್ಟು ದೊಡ್ಡದಿದೆ. ಮಿನಿ ಹರಾಜಿಗೆ ದಾಖಲೆ ಸಂಖ್ಯೆಯ ನೋಂದಣಿಗಳು ಬಂದಿರುವುದು ಇದೇ ಮೊದಲು. ರಿಜಿಸ್ಟರ್​ ಆದವರ ಪಟ್ಟಿಯಲ್ಲಿ 14 ದೇಶಗಳ ಆಟಗಾರರಿದ್ದಾರೆ. ಈ ಮೆಗಾ ಹರಾಜಿನಲ್ಲಿ ಫ್ರಾಂಚೈಸಿಗಳ ನಡುವಿನ ಪೈಪೋಟಿ ಮೇಲೆ ಭಾರೀ ನಿರೀಕ್ಷೆಯಿದೆ. ಏಕೆಂದರೆ, ಹರಾಜಿನಲ್ಲಿ ಹಿರಿಯ ಆಟಗಾರರು ಮತ್ತು ಪ್ರತಿಭಾನ್ವಿತ ಯುವ ಕ್ರಿಕೆಟಿಗರಿದ್ದಾರೆ.

ಭಾರತೀಯ ಆಟಗಾರರ ಪಟ್ಟಿ ನೋಡುವುದಾದರೆ, ಕನ್ನಡಿಗ ಮಾಯಾಂಕ್ ಅಗರ್ವಾಲ್, ಕೇಶಭರತ್, ರವಿ ಬಿಷ್ಣೋಯ್, ಆಕಾಶ್ ದೀಪ್, ದೀಪಕ್ ಹೂಡಾ, ವೆಂಕಟೇಶ್ ಅಯ್ಯರ್, ಸರ್ಫರಾಜ್ ಖಾನ್, ಶಿವಂ ಮಾವಿ, ನವದೀಪ್ ಸೈನಿ, ಚೇತನ್ ಸಕಾರಿಯಾ, ಕುಲದೀಪ್ ಸೇನ್, ಪೃಥ್ವಿ ಶಾ, ರಾಹುಲ್ ತ್ರಿಪಾಠಿ, ಸಂದೀಪ್ ವಾರಿಯರ್, ಉಮೇಶ್ ಯಾದವ್ ಮುಂತಾದವರಿದ್ದಾರೆ.

ಇನ್ನು ವಿದೇಶಿ ಆಟಗಾರರ ಪೈಕಿ ಇಂಗ್ಲೆಂಡ್, ಆಸ್ಟ್ರೇಲಿಯಾ ಮತ್ತು ದಕ್ಷಿಣ ಆಫ್ರಿಕಾದ ಅನೇಕ ಸ್ಟಾರ್ ಕ್ರಿಕೆಟಿಗರು ಸಹ ನೋಂದಾಯಿಸಿಕೊಂಡಿದ್ದಾರೆ. ಆಸ್ಟ್ರೇಲಿಯಾದ ಕ್ಯಾಮರೂನ್ ಗ್ರೀನ್, ಮ್ಯಾಥ್ಯೂ ಶಾರ್ಟ್ ಮತ್ತು ಸ್ಟೀವ್ ಸ್ಮಿತ್ ಹರಾಜಿನಲ್ಲಿ ಭಾಗವಹಿಸಲಿದ್ದಾರೆ. ಜೇಮೀ ಸ್ಮಿತ್, ವನಿಂದು ಹಸರಂಗ, ಮತೀಶಾ ಪತಿರಾನ, ಅನ್ರಿಜ್ ನಾರ್ಗೆ, ಕೋಟ್ಜೀ ಮತ್ತು ಲಿಯಾಮ್ ಲಿವಿಂಗ್ಸ್ಟನ್ ಅವರಂತಹ ಸ್ಟಾರ್ ಕ್ರಿಕೆಟಿಗರು ಸಹ ಇದ್ದಾರೆ. ಇತ್ತೀಚೆಗಷ್ಟೇ ದಾಂಪತ್ಯ ಜೀವನಕ್ಕೆ ಕಾಲಿಟ್ಟ ಕಾರಣ, ಜೋಶ್ ಇಂಗ್ಲಿಸ್ ಲಭ್ಯತೆ ಬಹುತೇಕ ಅನುಮಾನವಾಗಿದೆ.

ಪವರ್​ ಹಿಟ್ಟರ್​ಗಳಾದ ಜಾನಿ ಬೈರ್‌ಸ್ಟೋವ್, ರಚಿನ್ ರವೀಂದ್ರ, ಮುಜೀಬ್ ಮತ್ತು ನವೀನ್-ಉಲ್-ಹಕ್ ಕೂಡ ಹರಾಜು ಪಟ್ಟಿಯಲ್ಲಿದ್ದಾರೆ. ಕಳೆದ ಕೆಲವು ಆಕ್ಷನ್​ನಲ್ಲಿ ಮಾರಾಟವಾಗದ ಸ್ಟೀವ್ ಸ್ಮಿತ್ ಮತ್ತೊಮ್ಮೆ ನೋಂದಾಯಿಸಿಕೊಂಡಿದ್ದಾರೆ. ಮಲೇಷ್ಯಾದ ಆಟಗಾರ ವೀರಂದೀಪ್ ಸಿಂಗ್ ಕೂಡ ಪಟ್ಟಿಯಲ್ಲಿದ್ದಾರೆ. ಹರಾಜಿನಲ್ಲಿ ಕೋಲ್ಕತ ನೈಟ್ ರೈಡರ್ಸ್ ಮತ್ತು ಚೆನ್ನೈ ಸೂಪರ್​ ಕಿಂಗ್ಸ್​ ಪ್ರಸ್ತುತ ತಮ್ಮ ಖಾತೆಯಲ್ಲಿ ಅತಿದೊಡ್ಡ ಬ್ಯಾಲೆನ್ಸ್ ಹೊಂದಿರುವ ತಂಡಗಳು. ಯಾವ ಆಟಗಾರರು? ಯಾರ ತಂಡಕ್ಕೆ ಸೇರಲಿದ್ದಾರೆ ಎಂಬುದನ್ನು ಹರಾಜು ಪ್ರಕ್ರಿಯೆ ದಿನದಂದು ಕಾದು ನೋಡಬೇಕಿದೆ,(ಏಜೆನ್ಸೀಸ್).