IPL​ ಮಿನಿ ಹರಾಜಿಗೆ ಕ್ಷಣಗಣನೆ: ಯಾವ ತಂಡದಲ್ಲಿ ಎಷ್ಟು ಹಣವಿದೆ? ಎಷ್ಟು ಆಟಗಾರರನ್ನು ಖರೀದಿಸಬಹುದು? IPL 2026 Auction

IPL 2026 Auction : ಕ್ರಿಕೆಟ್ ಅಭಿಮಾನಿಗಳು ಬಹಳ ಕುತೂಹಲದಿಂದ ಎದುರು ನೋಡುತ್ತಿರುವ ಬಹುನಿರೀಕ್ಷಿತ ಐಪಿಎಲ್​ ಮಿನಿ ಹರಾಜಿಗೆ ಸಮಯ ಹತ್ತಿರ ಬರುತ್ತಿದೆ. ಡಿಸೆಂಬರ್ 16 ರಂದು ದುಬೈನಲ್ಲಿ ಈ ಈವೆಂಟ್​ ನಡೆಯಲಿದ್ದು, ಹರಾಜಿಗೆ ನೋಂದಣಿ ಮಾಡಿಕೊಂಡಿರುವ ಆಟಗಾರರ ಪಟ್ಟಿಯಿಂದ ಬಿಸಿಸಿಐ 1005 ಆಟಗಾರರ ಹೆಸರುಗಳನ್ನು ತೆಗೆದುಹಾಕಿದೆ. ಅದೇ ಸಮಯದಲ್ಲಿ, 35 ಹೊಸ ಆಟಗಾರರ ಹೆಸರುಗಳನ್ನು ಬಿಸಿಸಿಐ ಸೇರಿಸಿದೆ.

ಒಟ್ಟು 350 ಆಟಗಾರರ ಕಿರುಪಟ್ಟಿಯನ್ನು ಮಿನಿ ಹರಾಜಿಗಾಗಿ ಬಿಸಿಸಿಐ ಸಿದ್ಧಪಡಿಸಿದೆ. ಇದರಲ್ಲಿ 240 ಭಾರತೀಯ ಆಟಗಾರರು ಮತ್ತು 110 ವಿದೇಶಿ ಆಟಗಾರರಿದ್ದಾರೆ. ಒಟ್ಟು ಆಟಗಾರರಲ್ಲಿ 224 ಭಾರತೀಯ ಅನ್​ಕ್ಯಾಪ್ಡ್​ ಆಟಗಾರರು ಮತ್ತು 14 ವಿದೇಶಿ ಅನ್​ಕ್ಯಾಪ್ಡ್​ ಆಟಗಾರರಿದ್ದಾರೆ. ಎಲ್ಲ 10 ಫ್ರಾಂಚೈಸಿಗಳಲ್ಲಿ ಒಟ್ಟು 77 ಸ್ಥಾನಗಳು ಖಾಲಿ ಇದ್ದು, ಅವುಗಳ ಪೈಕಿ 31 ಸ್ಥಾನಗಳು ವಿದೇಶಿ ಆಟಗಾರರಿಗೆ ಮೀಸಲಾಗಿವೆ. 40 ಆಟಗಾರರು ಗರಿಷ್ಠ ಮೂಲ ಬೆಲೆ 2 ಕೋಟಿ ರೂಪಾಯಿಯೊಂದಿಗೆ ಹರಾಜಿನಲ್ಲಿ ಭಾಗವಹಿಸಲಿದ್ದಾರೆ. ಡಿಸೆಂಬರ್ 16 ರಂದು ಮಧ್ಯಾಹ್ನ 2.30 ಕ್ಕೆ ಹರಾಜು ಆರಂಭವಾಗಲಿದ್ದು, ಸ್ಟಾರ್ ಸ್ಪೋರ್ಟ್ಸ್ ಚಾನೆಲ್‌ನಲ್ಲಿ ನೇರ ಪ್ರಸಾರ ಮಾಡಲಾಗುತ್ತದೆ. ಅದೇ ರೀತಿ ಜಿಯೋ ಹಾಟ್‌ಸ್ಟಾರ್‌ ಒಟಿಟಿಯಲ್ಲಿ ಸ್ಟ್ರೀಮ್ ಮಾಡಲಾಗುತ್ತದೆ.

ಎಲ್ಲ ಫ್ರಾಂಚೈಸಿಗಳು ತಮಗೆ ಬೇಕಾದ ಆಟಗಾರರನ್ನು ಖರೀದಿಸಲು ಮತ್ತು ತಮ್ಮ ತಂಡಗಳನ್ನು ಬಲಪಡಿಸಲು ಈಗಾಗಲೇ ತಮ್ಮ ತಂತ್ರಗಳನ್ನು ಸಿದ್ಧಪಡಿಸಿಕೊಂಡಿದ್ದು, ಎಲ್ಲ 10 ಫ್ರಾಂಚೈಸಿಗಳು ಒಟ್ಟು 237.55 ಕೋಟಿ ರೂ.ಗಳನ್ನು ಈ ಹರಾಜಿನಲ್ಲಿ ಖರ್ಚು ಮಾಡಲಿವೆ. ಹಾಗಾದರೆ, ಯಾವ್ಯಾವ ಫ್ರಾಂಚೈಸಿ ಬಳಿ ಎಷ್ಟು ಹಣವಿದೆ? ಮತ್ತು ಎಷ್ಟು ಆಟಗಾರರನ್ನು ಖರೀದಿ ಮಾಡಬಹುದು ಎಂಬುದನ್ನು ನಾವೀಗ ತಿಳಿದುಕೊಳ್ಳೋಣ.

ಕೆಕೆಆರ್ ಬಳಿ 64.30 ಕೋಟಿ ರೂ. ಲಭ್ಯವಿದ್ದು, 13 ಆಟಗಾರರನ್ನು ಖರೀದಿ ಮಾಡಬಹುದು. ಈ ಪೈಕಿ 6 ಸ್ಥಾನಗಳು ವಿದೇಶಿ ಆಟಗಾರರಿಗೆ ಮೀಸಲಿಡಲಾಗಿದೆ.

ಸಿಎಸ್‌ಕೆ ತಂಡದಲ್ಲಿ 43.40 ಕೋಟಿ ರೂ. ಲಭ್ಯವಿದೆ. 9 ಆಟಗಾರರನ್ನು ಖರೀದಿಸಬಹುದು. ಇದರಲ್ಲಿ 4 ಸ್ಲಾಟ್‌ಗಳು ವಿದೇಶಿ ಆಟಗಾರರಿಗೆ ಮೀಸಲಿದೆ.

ಸನ್‌ರೈಸರ್ಸ್ ಹೈದರಾಬಾದ್ ತಂಡದಲ್ಲಿ 25.50 ಕೋಟಿ ರೂ. ಲಭ್ಯವಿದೆ. ಅವರು 10 ಆಟಗಾರರನ್ನು ಖರೀದಿಸಬಹುದು. ಅದರಲ್ಲಿ 2 ಸ್ಲಾಟ್‌ಗಳು ವಿದೇಶಿ ಆಟಗಾರರಿಗೆ.

ಲಖನೌ ಸೂಪರ್ ಜೈಂಟ್ಸ್ ತಂಡದ ಜೇಬಿನಲ್ಲಿ 22.95 ಕೋಟಿ ರೂ. ಲಭ್ಯವಿದೆ. ಈ ಫ್ರಾಂಚೈಸಿ 6 ಆಟಗಾರರನ್ನು ಖರೀದಿಸಬಹುದು. ಅದರಲ್ಲಿ 4 ಸ್ಲಾಟ್‌ಗಳು ವಿದೇಶಿ ಆಟಗಾರರದ್ದು.

ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಪರ್ಸ್​ನಲ್ಲಿ 21.8 ಕೋಟಿ ರೂಪಾಯಿ ಲಭ್ಯವಿದೆ. ಅವರು 8 ಆಟಗಾರರನ್ನು ಖರೀದಿಸಬಹುದು, ಅದರಲ್ಲಿ 5 ಸ್ಲಾಟ್‌ಗಳು ವಿದೇಶಿ ಆಟಗಾರರಿಗೆ ಮೀಸಲು.

ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದಲ್ಲಿ 16.4 ಕೋಟಿ ರೂ. ಲಭ್ಯವಿದೆ. 7 ಆಟಗಾರರನ್ನು ಖರೀದಿಸಬಹುದು. ಇವುಗಳಲ್ಲಿ 2 ಸ್ಲಾಟ್‌ಗಳು ವಿದೇಶಿ ಆಟಗಾರರು.

ಗುಜರಾತ್ ಟೈಟಾನ್ಸ್ ಬಳಿ 12.9 ಕೋಟಿ ರೂ. ಲಭ್ಯವಿದೆ. 5 ಆಟಗಾರರನ್ನು ಖರೀದಿಸಬಹುದು. ಅದರಲ್ಲಿ 4 ಸ್ಲಾಟ್‌ಗಳು ವಿದೇಶಿ ಆಟಗಾರರಾಗಿದ್ದಾರೆ.

ಪಂಜಾಬ್ ಕಿಂಗ್ಸ್ ಬಳಿ 11.5 ಕೋಟಿ ರೂ. ಲಭ್ಯವಿದೆ. ಅವರು 4 ಆಟಗಾರರನ್ನು ಖರೀದಿಸಬಹುದು. ಇವುಗಳಲ್ಲಿ 2 ಸ್ಲಾಟ್‌ಗಳು ವಿದೇಶಿ ಆಟಗಾರರದ್ದು.

ಮುಂಬೈ ಇಂಡಿಯನ್ಸ್ ಬಳಿ 2.75 ಕೋಟಿ ರೂ. ಲಭ್ಯವಿದೆ. ಅವರು 5 ಆಟಗಾರರನ್ನು ಖರೀದಿಸಬಹುದು. ಇದರಲ್ಲಿ ಒಂದು ಸ್ಲಾಟ್ ವಿದೇಶಿ ಆಟಗಾರರಿದ್ದಾರೆ.

ರಾಜಸ್ಥಾನ ರಾಯಲ್ಸ್ ತಂಡದಲ್ಲಿ 16.05 ಕೋಟಿ ರೂ. ಲಭ್ಯವಿದೆ. ಅವರು 9 ಆಟಗಾರರನ್ನು ಖರೀದಿಸಬಹುದು. ಒಂದು ಸ್ಲಾಟ್ ವಿದೇಶಿ ಆಟಗಾರನಿಗೆ ಮೀಸಲಾಗಿದೆ.