ಐಪಿಎಲ್​ ಮಿನಿ ಹರಾಜಿಗೆ ದಿನಗಣನೆ: 1005 ಆಟಗಾರರಿಗೆ ಶಾಕ್​, ಪಟ್ಟಿಯಿಂದ ತೆಗೆದುಹಾಕಿದ ಬಿಸಿಸಿಐ! IPL 2026 Auction

IPL 2026 Auction : ಕ್ರಿಕೆಟ್ ಅಭಿಮಾನಿಗಳು ಬಹಳ ಕುತೂಹಲದಿಂದ ಎದುರು ನೋಡುತ್ತಿರುವ ಬಹುನಿರೀಕ್ಷಿತ ಐಪಿಎಲ್​ ಮಿನಿ ಹರಾಜಿಗೆ ಸಮಯ ಹತ್ತಿರ ಬರುತ್ತಿದೆ. ಡಿಸೆಂಬರ್ 16 ರಂದು ದುಬೈನಲ್ಲಿ ಈ ಈವೆಂಟ್​ ನಡೆಯಲಿದ್ದು, ಹರಾಜಿಗೆ ನೋಂದಣಿ ಮಾಡಿಕೊಂಡಿರುವ ಆಟಗಾರರ ಪಟ್ಟಿಯಿಂದ ಬಿಸಿಸಿಐ 1005 ಆಟಗಾರರ ಹೆಸರುಗಳನ್ನು ತೆಗೆದುಹಾಕಿದೆ. ಅದೇ ಸಮಯದಲ್ಲಿ, 35 ಹೊಸ ಆಟಗಾರರ ಹೆಸರುಗಳನ್ನು ಬಿಸಿಸಿಐ ಸೇರಿಸಿದೆ. ಒಟ್ಟು 350 ಆಟಗಾರರ ಕಿರುಪಟ್ಟಿಯನ್ನು ಮಿನಿ ಹರಾಜಿಗಾಗಿ ಸಿದ್ಧಪಡಿಸಿದೆ.

ದಕ್ಷಿಣ ಆಫ್ರಿಕಾದ ಸ್ಟಾರ್ ವಿಕೆಟ್ ಕೀಪರ್ ಹಾಗೂ ಬ್ಯಾಟ್ಸ್‌ಮನ್ ಕ್ವಿಂಟನ್ ಡಿ ಕಾಕ್ ಆರಂಭದಲ್ಲಿ ತಮ್ಮ ಹೆಸರನ್ನು ನೋಂದಾಯಿಸಿಕೊಂಡಿರಲಿಲ್ಲ. ಈ ಕಾರಣದಿಂದಾಗಿ, ಆರಂಭದಲ್ಲಿ ಘೋಷಿಸಲಾದ ಪಟ್ಟಿಯಲ್ಲಿ ಅವರ ಹೆಸರು ಇರಲಿಲ್ಲ. ಆದರೆ, ಕೊನೆಯ ಕ್ಷಣದಲ್ಲಿ ತಮ್ಮ ಮನಸ್ಸು ಬದಲಾಯಿಸಿಕೊಂಡ ಡಿ ಕಾಕ್​, ಮಿನಿ ಹರಾಜಿಗಾಗಿ ತಮ್ಮ ಹೆಸರನ್ನು ನೋಂದಾಯಿಸಿಕೊಂಡಿದ್ದಾರೆ. ಇದಲ್ಲದೆ, ಡಿ ಕಾಕ್​ ಅವರು ತಮ್ಮ ಮೂಲ ಬೆಲೆಯನ್ನು 2 ಕೋಟಿ ರೂ.ಗಳಿಂದ 1 ಕೋಟಿ ರೂ.ಗಳಿಗೆ ಇಳಿಸಿದ್ದಾರೆ ಎಂದು ಕ್ರಿಕ್‌ಬಜ್ ವರದಿ ಮಾಡಿದೆ.

ಐಪಿಎಲ್​ ಫ್ರಾಂಚೈಸಿಗಳ ಕೋರಿಕೆಯ ಮೇರೆಗೆ ಕ್ವಿಂಟನ್​ ಡಿ ಕಾಕ್​ ಮತ್ತು ಉಳಿದವರನ್ನು ಶಾರ್ಟ್‌ಲಿಸ್ಟ್‌ಗೆ ಸೇರಿಸಲಾಗಿದೆ. ಈ 35 ಆಟಗಾರರಲ್ಲಿ ಶ್ರೀಲಂಕಾ ಮತ್ತು ದಕ್ಷಿಣ ಆಫ್ರಿಕಾದ ಆಟಗಾರರು ಹಾಗೂ ಟೀಮ್ ಇಂಡಿಯಾದ ದೇಶೀಯ ಕ್ರಿಕೆಟಿಗರು ಕೂಡ ಸೇರಿದ್ದಾರೆ.

ವರದಿಯ ಪ್ರಕಾರ, ಮಿನಿ ಹರಾಜು ಕ್ಯಾಪ್ಡ್ ಆಟಗಾರರೊಂದಿಗೆ ಪ್ರಾರಂಭವಾಗಲಿದ್ದು, ಬ್ಯಾಟ್ಸ್‌ಮನ್‌ಗಳು, ನಂತರ ಆಲ್‌ರೌಂಡರ್‌ಗಳು, ವಿಕೆಟ್‌ಕೀಪರ್-ಬ್ಯಾಟ್ಸ್‌ಮನ್‌ಗಳು, ವೇಗದ ಬೌಲರ್‌ಗಳು ಹಾಗೂ ಕೊನೆಯಲ್ಲಿ ಸ್ಪಿನ್ನರ್‌ಗಳನ್ನು ಹರಾಜಿನಲ್ಲಿ ಕೂಗಲಾಗುತ್ತದೆ. ಕ್ಯಾಪ್ಡ್​ ಆಟಗಾರರ ಬಳಿಕ ಅನ್‌ಕ್ಯಾಪ್ಡ್ ಆಟಗಾರರಿಗೂ ಅದೇ ಕ್ರಮವನ್ನು ಅನುಸರಿಸಲಾಗುತ್ತದೆ.

350 ಆಟಗಾರರ ಅಂತಿಮ ಐಪಿಎಲ್ ಹರಾಜಿನ ಪಟ್ಟಿಯಲ್ಲಿ ಹೊಸದಾಗಿ ಸೇರ್ಪಡೆಯಾದ ಆಟಗಾರರ ಹೆಸರು ಈ ಕೆಳಕಂಡಂತಿವೆ.

ಅರಬ್ ಗುಲ್ (ಅಫ್ಘಾನಿಸ್ತಾನ), ಮೈಲ್ಸ್ ಹ್ಯಾಮಂಡ್ (ಇಂಗ್ಲೆಂಡ್), ಡ್ಯಾನ್ ಲಟೆಗನ್ (ಇಂಗ್ಲೆಂಡ್), ಕ್ವಿಂಟನ್ ಡಿ ಕಾಕ್ (ದಕ್ಷಿಣ ಆಫ್ರಿಕಾ), ಕಾನರ್ ಎಸ್ಟರ್‌ಹ್ಯೂಜೆನ್ (ದಕ್ಷಿಣ ಆಫ್ರಿಕಾ), ಜಾರ್ಜ್ ಲಿಂಡೆ (ದಕ್ಷಿಣ ಆಫ್ರಿಕಾ), ಬಯಾಂಡ ಮಜೋಲಾ (ದಕ್ಷಿಣ ಆಫ್ರಿಕಾ), ಟ್ರಾವೀನ್ ಮ್ಯಾಥ್ಯೂ (ಶ್ರೀಲಂಕಾ), ಡಿಸುರಿ ಲಂಕಾಸ್ ( ಶ್ರೀಲಂಕಾ) ಹಾಗೂ ಅಕೀಮ್​ ಆಗಸ್ಟೆ (ವೆಸ್ಟ್ ಇಂಡೀಸ್).

ಸಾದೇಕ್ ಹುಸೇನ್, ವಿಷ್ಣು ಸೋಲಂಕಿ, ಸಬೀರ್ ಖಾನ್, ಬ್ರಿಜೇಶ್ ಶರ್ಮ, ಕಾನಿಷ್ಕ್ ಚೌಹಾಣ್, ಆರನ್ ಜಾರ್ಜ್, ಜಿಕ್ಕು ಬ್ರೈಟ್, ಶ್ರೀಹರಿ ನಾಯರ್, ಮಾಧವ್ ಬಜಾಜ್, ಶ್ರೀವತ್ಸ ಆಚಾರ್ಯ, ಯಶರಾಜ್ ಪುಂಜಾ, ಸಾಹಿಲ್ ಪರಾಖ್, ರೋಷನ್ ವಾಘ್ಸರೆ, ಯಶ್ ಡಿಚೋಲ್ಕರ್, ಅಯಾಜ್ಕ್ ವಾಲ್ಕರ್, ಧುರ್ಮಿಲ್ತ್ ಖಾನ್​, ಪುರವ್​ ಅಗರ್ವಾಲ್​, ರಿಷಭ್​ ಚೌಹಾಣ್, ಸಾಗರ್ ಸೋಲಂಕಿ, ಇಜಾಜ್ ಸವಾರಿಯಾ ಹಾಗೂ ಅಮನ್ ಶೇಖಾವತ್, (ಏಜೆನ್ಸೀಸ್​).