ದಾಖಲೆಯ ಎಂಟನೇ ಬಾರಿ ಏಷ್ಯಾಕಪ್ ಗೆದ್ದ ಭಾರತ ತಂಡ: 2024ರ ಸೋಲಿಗೆ ಮುಯ್ಯಿ ತೀರಿಸಿಕೊಂಡ ಹರ್ಮಾನ್​ಪ್ರೀತ್ ಪಡೆ!

ದುಬೈ ಸ್ಟೇಡಿಯಂನಲ್ಲಿ ನಡೆದ ಪ್ರಶಸ್ತಿ ಕದನದಲ್ಲಿ ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ದುಕೊಂಡ ಭಾರತ ತಂಡಕ್ಕೆ ಶೆಫಾಲಿ-ಸ್ಮತಿ ಜೋಡಿ ಮೊದಲ ವಿಕೆಟ್‌ಗೆ 77 ಎಸೆತಗಳಲ್ಲಿ 129 ರನ್ ಕೂಡಿಹಾಕುವ ಮೂಲಕ ಭದ್ರ ಬುನಾದಿ ಹಾಕಿಕೊಟ್ಟಿತು. ಇದರಿಂದ ಭಾರತ ತಂಡ 5 ವಿಕೆಟ್‌ಗೆ 183 ರನ್‌ಗಳ ಬೃಹತ್ ಮೊತ್ತ ಕಲೆಹಾಕುವಲ್ಲಿ ಯಶಸ್ವಿಯಾಯಿತು. 

ಪ್ರತಿಯಾಗಿ ಶ್ರೀಚರಣಿ (20ಕ್ಕೆ 4) ಹಾಗೂ ಅನುಭವಿ ದೀಪ್ತಿ ಶರ್ಮ (19ಕ್ಕೆ 3) ಸ್ಪಿನ್ ದಾಳಿಗೆ ತತ್ತರಿಸಿದ ಶ್ರೀಲಂಕಾ ಭರ್ತಿ 20 ಓವರ್‌ಗಳಲ್ಲಿ 111 ರನ್‌ಗಳಿಗೆ ಸರ್ವಪತನ ಕಂಡಿತು. ಈ ಮೂಲಕ 2024ರ ಸೋಲಿಗೆ ಮುಯ್ಯಿ ತೀರಿಸಿಕೊಂಡ ಭಾರತ ಟಿ20 ಮಾದರಿಯಲ್ಲಿ 4ನೇ ಬಾರಿಗೆ ಪ್ರಶಸ್ತಿ ಜಯಿಸಿತು. ಭಾರತ ಹಾಗೂ ಶ್ರೀಲಂಕಾ ತಂಡಗಳು ಫೈನಲ್‌ನಲ್ಲಿ ಎದುರಾದ 7ನೇ ದೃಷ್ಟಾಂತ ಇದಾಗಿತ್ತು.

ಭಾರತ: 5 ವಿಕೆಟ್‌ಗೆ 183 (ಸ್ಮತಿ 59, ಶೆಫಾಲಿ 68, ಹರ್ಮಾನ್‌ಪ್ರೀತ್ 14, ರಿಚಾ 17, ದೀಪ್ತಿ 5, ಭಾರತಿ 2*, ಜಿ. ಕಮಲಿನಿ 15*, ಮಿಥಾಲಿ 33ಕ್ಕೆ 1, ಚಾಮರಿ 34ಕ್ಕೆ 1, ಚಾಮುಡಿ 40ಕ್ಕೆ 1). ಶ್ರೀಲಂಕಾ: 20 ಓವರ್‌ಗಳಲ್ಲಿ 111 (ಇಮಿಷಾ 4, ಚಾಮರಿ 36, ವಿಶ್ಮಿ 20, ಹರ್ಷಿತಾ 9, ನಿಲಾಕ್ಷಿಕಾ 22, ಕವಿಷಾ 7, ಶ್ರೀಚರಣಿ 20ಕ್ಕೆ 4, ದೀಪ್ತಿ ಶರ್ಮ 19ಕ್ಕೆ 3). ಗರಿಷ್ಠ ರನ್ ಸ್ಕೋರರ್: ಶೆಫಾಲಿ ವರ್ಮ (236 ರನ್), ಗರಿಷ್ಠ ವಿಕೆಟ್ ಟೇಕರ್: ದೀಪ್ತಿ ಶರ್ಮ (14).

8. ಭಾರತ ತಂಡ 8ನೇ ಬಾರಿಗೆ ಮಹಿಳೆಯರ ಏಷ್ಯಾಕಪ್ ಜಯಿಸಿತು. ಇದಕ್ಕೆ ಮುನ್ನ 4 ಬಾರಿ (2004, 2005, 2006, 2008) ಏಕದಿನ ಹಾಗೂ 3 ಸಲ (2012, 2016, 2022) ಟಿ20ಯಲ್ಲಿ ಚಾಂಪಿಯನ್ ಎನಿಸಿತ್ತು.