ಭಾರತ-ಜಿಂಬಾಬ್ವೆ ಟಿ20 ಫೈಟ್​ಗೆ ವೇದಿಕೆ ಸಜ್ಜು; ಯಾವ ಚಾನಲ್​ನಲ್ಲಿ ಸರಣಿ ಪ್ರಸಾರವಾಗಲಿದೆ ಗೊತ್ತೇ?

ಸೂರ್ಯಕುಮಾರ್​ ಯಾದವ್​ರನ್ನು ಹೊರಗಿಟ್ಟು, ಶ್ರೇಯಸ್​ ಅಯ್ಯರ್​ಗೆ ಟಿ20 ನಾಯಕನ ಪಟ್ಟ ಕಟ್ಟಿದ ಪ್ರಯೋಗ ಇಷ್ಟರವರೆಗೆ ಸಂಪೂರ್ಣ ವೈಫಲ್ಯ ಕಂಡಿದೆ. ಟಿ20 ತಂಡದ ನಾಯಕರನ್ನಾಗಿ ಶ್ರೇಯಸ್​ರನ್ನು ಮುಂದುವರಿಸಬೇಕೇ, ಬೇಡವೇ ಎಂಬುದನ್ನು ನಿರ್ಧರಿಸುವ ನಿಟ್ಟಿನಲ್ಲಿ ಈ ಸರಣಿ ನಿರ್ಣಾಯಕವೆನಿಸಲಿದೆ.

ಕ್ರಿಕೆಟ್​ ಶಿಶು ಐರ್ಲೆಂಡ್​ನಲ್ಲಿ ಎರಡೂ ಪಂದ್ಯ ಸೋತ ಬಳಿಕ ಇಂಗ್ಲೆಂಡ್​ನಲ್ಲೂ 5 ಪಂದ್ಯಗಳ ಪೈಕಿ ಭಾರತ 4ರಲ್ಲಿ ಸೋತಿತ್ತು. 1 ಪಂದ್ಯ ಮಳೆಯಿಂದಾಗಿ ರದ್ದಾಗಿತ್ತು. ಇದೀಗ ಜಿಂಬಾಬ್ವೆಯಲ್ಲಿ ಸಮರ್ಥ ತಂಡ ಸಂಯೋಜನೆ ರೂಪಿಸದಿದ್ದರೆ ಟಿ20 ಕ್ರಿಕೆಟ್​ನಲ್ಲಿ ಭಾರತದ ಸಮಸ್ಯೆ ಹೆಚ್ಚಾಗಲಿದೆ. ಗಂಭೀರ್​ ಹೆಚ್ಚಿನ ಪ್ರಯೋಗಗಳಿಗೆ ಪ್ರಯತ್ನಿಸಿ ಕೈಸುಟ್ಟುಕೊಂಡಿದ್ದರೆ, ವಿವಿಎಸ್​ ಲಕ್ಷ್ಮಣ್​​ ಹಂಗಾಮಿ ಕೋಚ್​ ಆಗಿ ಸರಣಿಯಲ್ಲಿ ಅನುಸರಿಸಲಿರುವ ಕಾರ್ಯತಂತ್ರ ಕುತೂಹಲ ಕೆರಳಿಸಿದೆ. ಗಂಭೀರ್​ ಹೆಚ್ಚಿನ ಆಲ್ರೌಂಡರ್​ಗಳನ್ನು ಆಡಿಸಿದ್ದರೆ, ಲಕ್ಷ್ಮಣ್​ ತಜ್ಞ ಬ್ಯಾಟರ್​-ಬೌಲರ್​ಗಳಿಗೆ ಆದ್ಯತೆ ನೀಡುವ ನಿರೀಕ್ಷೆ ಇದೆ.

ಭಾರತ ತಂಡದ ಮುಖ್ಯ ಕೋಚ್​ ಗೌತಮ್​ ಗಂಭೀರ್​ಗೆ ಈ ಪ್ರವಾಸದಿಂದ ವಿಶ್ರಾಂತಿ ನೀಡಲಾಗಿದ್ದು, ಬೆಂಗಳೂರಿನ ಬಿಸಿಸಿಐ ಶ್ರೇಷ್ಠತಾ ಕೇಂದ್ರದ ಮುಖ್ಯಸ್ಥ ವಿವಿಎಸ್​ ಲಕ್ಷ್ಮಣ್​ ಹಂಗಾಮಿ ಕೋಚ್​ ಆಗಿ ಕಾರ್ಯನಿರ್ವಹಿಸಲಿದ್ದಾರೆ. ಅವರಿಗೆ ಬ್ಯಾಟಿಂಗ್​ ಕೋಚ್​ ಆಗಿ ಹೃಷಿಕೇಶ್​ ಕಾನಿಟ್ಕರ್​ ಮತ್ತು ಬೌಲಿಂಗ್​ ಕೋಚ್​ ಆಗಿ ಕನ್ನಡಿಗ ಸುನೀಲ್​ ಜೋಶಿ ನೆರವಾಗಲಿದ್ದಾರೆ.

ಐಪಿಎಲ್​ ಮಿಂಚಿದ ಬೆನ್ನಲ್ಲೇ ಇಂಗ್ಲೆಂಡ್​ನಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್​ಗೆ ಪದಾರ್ಪಣೆ ಮಾಡುವ ಅವಕಾಶ ಪಡೆದಿದ್ದ 15 ವರ್ಷದ ಬ್ಯಾಟಿಂಗ್​ ಸೆನ್ಸೇಶನ್​ ವೈಭವ್​ ಸೂರ್ಯವಂಶಿ ಆಡಿದ 3 ಪಂದ್ಯಗಳಲ್ಲೂ ತನ್ನ ವಯಸ್ಸಿಗಿಂತ ಹೆಚ್ಚು ರನ್​ ಗಳಿಸಿರಲಿಲ್ಲ. ಪ್ರತಿ ಎಸೆತಕ್ಕೂ ಸಿಕ್ಸರ್​ ಸಿಡಿಸುವುದಕ್ಕೆ ಹಪಹಪಿಸುತ್ತಿದ್ದ ವೈಭವ್​, ಜಿಂಬಾಬ್ವೆಯಲ್ಲಿ ಪಕ್ವ ಆಟವಾಡಿದರಷ್ಟೇ ತಂಡದಲ್ಲಿ ಉಳಿದುಕೊಳ್ಳಲು ಸಾಧ್ಯ. ವೈಭವ್​ ವರ್ಷಾರಂಭದಲ್ಲಿ 19 ವಯೋಮಿತಿ ವಿಶ್ವಕಪ್​ ಫೈನಲ್​ನಲ್ಲಿ ಇದೇ ಮೈದಾನದಲ್ಲಿ ಇಂಗ್ಲೆಂಡ್​ ವಿರುದ್ಧ ಅಬ್ಬರದ ಶತಕ ಸಿಡಿಸಿದ್ದರು. ಅದೇ ಈ ಬಾರಿ ಅವರಿಗೆ ಸ್ಫೂರ್ತಿ ತುಂಬಲಿದೆ. ಇನ್ನು ಉಪನಾಯಕ ತಿಲಕ್​ ವರ್ಮ ರನ್​ಬರದ ಬಗ್ಗೆಯೂ ಕಳವಳ ಎದ್ದಿದೆ.

ಭಾರತ: ಸಂಜು ಸ್ಯಾಮ್ಸನ್​ಗೆ ಜಿಂಬಾಬ್ವೆ ಪ್ರವಾಸದಿಂದ ವಿಶ್ರಾಂತಿ ನೀಡಿರುವುದದರಿಂದ ಅಭಿಷೇಕ್​ ಶರ್ಮ ಜತೆ ಮತ್ತೆ ವೈಭವ್​ ಸೂರ್ಯವಂಶಿ ಇನಿಂಗ್ಸ್​ ಆರಂಭಿಸುವುದು ಖಚಿತವೆನಿಸಿದೆ. ತಿಲಕ್​ ವರ್ಮ ಇತ್ತೀಚೆಗೆ 5ನೇ ಕ್ರಮಾಂಕದಲ್ಲಿ ಆಡಿದ್ದು, ರಿಂಕು ಸಿಂಗ್​ ಮರಳಿದಾಗಲೂ ಅವರು ಅದೇ ಕ್ರಮಾಂಕದಲ್ಲಿ ಮುಂದುವರಿಯುವರೇ ಎಂಬ ಗೊಂದಲವಿದೆ. ಆಲ್ರೌಂಡರ್​ಗಳಾದ ಹರ್ಷ್​ ದುಬೆ, ಶಿವಂ ದುಬೆ, ಸೂರ್ಯಾಂಶ್​ ಶೆಡ್ಗೆ ಪೈಕಿ ಇಬ್ಬರಷ್ಟೇ ಆಡಬಹುದು. ಪ್ರಿನ್ಸ್​ ಯಾದವ್​ ಜತೆಗೆ ಮಯಾಂಕ್​ ಯಾದವ್​ ಪ್ರಮುಖ ವೇಗಿಯಾಗಿದ್ದರೆ, 3ನೇ ವೇಗಿಯ ಸ್ಥಾನಕ್ಕೆ ಅಶೋಕ್​ ಶರ್ಮ&ಯಶ್​ ಠಾಕೂರ್​ ನಡುವೆ ಪೈಪೋಟಿ ಇದೆ.

ಜಿಂಬಾಬ್ವೆ: ಐರ್ಲೆಂಡ್​ ತಂಡದ ಸ್ಫೂರ್ತಿಯಲ್ಲಿ ಜಿಂಬಾಬ್ವೆ ಕೂಡ ಭಾರತಕ್ಕೆ ಆಘಾತ ನೀಡಲು ಪ್ರಯತ್ನಿಸಲಿದ್ದು, ರಯಾನ್​ ರ್ಬಲ್​, ಮುಜರಬಾನಿ, ಎನ್​ಗರವ, ಬ್ರಿಯಾನ್​ ಬೆನ್ನೆಟ್​ ಪ್ರಮುಖ ಆಟಗಾರರಾಗಿದ್ದಾರೆ. ಆಲ್ರೌಂಡರ್​ ಸಿಕಂದರ್​ ರಾಜಾ ನಾಯಕತ್ವದಲ್ಲಿ ತವರಿನ ಲಾಭ ಪಡೆಯಲು ಜಿಂಬಾಬ್ವೆ ತಂಡ ಬಯಸಿದೆ.

ಸ್ಥಳಿಯ ಕಾಲಮಾನ ಪ್ರಕಾರ ಮಧ್ಯಾಹ್ನದ ನಂತರ ಪಂದ್ಯ ನಡೆಯಲಿದ್ದು, ಹರಾರೆ ಸ್ಪೋರ್ಟ್ಸ್​ ಕ್ಲಬ್​ನ ಬೌನ್ಸಿ ಪಿಚ್​ ಭಾರತೀಯ ಬ್ಯಾಟರ್​ಗಳಿಗೆ ಸವಾಲೊಡ್ಡುವ ನಿರೀಕ್ಷೆ ಇದೆ. ಬ್ಲೆಸಿಂಗ್​ ಮುಜರಬಾನಿ ಮತ್ತು ರಿಚರ್ಡ್​ ಎನ್​ಗರವ ಅವರಂಥ ಲಂಬೂ ವೇಗಿಗಳು ಈ ಪಿಚ್​ನಲ್ಲಿ ಭಾರತೀಯ ಬ್ಯಾಟರ್​ಗಳಿಗೆ ಸತ್ವಪರೀಕ್ಷೆ ಒಡ್ಡಬಲ್ಲರು.

*ಉಭಯ ತಂಡಗಳು ಸರಣಿಯಲ್ಲಿ ಗೆಲುವಿನ ಸಮಾನ ಅವಕಾಶವನ್ನು ಹೊಂದಿವೆ. ನಾವು ಇತ್ತೀಚೆಗೆ ಸ್ಥಿರ ನಿರ್ವಹಣೆ ತೋರುತ್ತ ಬಂದಿದ್ದೇವೆ. ಭಾರತ ತಂಡ ಈಗ ಸ್ಥಿತ್ಯಂತರದಲ್ಲಿದೆ. ಹೀಗಾಗಿ ಈ ಸರಣಿ ಏಕಪಯವಾಗಿ ಇರುವುದಿಲ್ಲ.

*ಕಳೆದ 4 ತಿಂಗಳಲ್ಲಿ ಹಲವು ಏಳು&ಬೀಳುಗಳನ್ನು ಕಂಡಿರುವೆ. ಆದರೆ ನನ್ನ ಆತ್ಮವಿಶ್ವಾಸ ಈಗಲೂ ಅಚಲವಾಗಿದೆ. ತಂಡಕ್ಕಾಗಿ ಶೇ. 100 ನಿರ್ವಹಣೆ ತೋರುವ ಹಂಬಲವಿದೆ. 19 ವಯೋಮಿತಿ ವಿಶ್ವಕಪ್​ ಗೆದ್ದ ಮೈದಾನದಲ್ಲೇ ಮತ್ತೆ ಆಡಲಿರುವೆ. ಆದರೆ ಇದು ಸಂಪೂರ್ಣ ಭಿನ್ನ ಅನುಭವ.