ಅಫ್ಘಾನಿಸ್ತಾನ ವಿರುದ್ಧ ಟೆಸ್ಟ್​, ಏಕದಿನ ಸರಣಿಗೆ ಮೇ 19ರಂದು ಭಾರತ ತಂಡ ಆಯ್ಕೆ

ಜೂನ್​ 6ರಿಂದ ಮುಲ್ಲನ್​ಪುರದಲ್ಲಿ ನಡೆಯಲಿರುವ ಏಕೈಕ ಟೆಸ್ಟ್​ಗೆ ಅಜಿತ್​ ಅಗರ್ಕರ್​ ನೇತೃತ್ವದ ಆಯ್ಕೆ ಸಮಿತಿ, ವೇಗಿ ಜಸ್​ಪ್ರೀತ್​ ಬುಮ್ರಾ ಹೊರತಾಗಿ ಇತರ ಎಲ್ಲ ಪ್ರಮುಖ ಆಟಗಾರರನ್ನೇ ಆಯ್ಕೆ ಮಾಡುವ ಸಾಧ್ಯತೆ ಇದೆ. ಈ ಪಂದ್ಯ ಐಸಿಸಿ ವಿಶ್ವ ಟೆಸ್ಟ್​ ಚಾಂಪಿಯನ್​ಷಿಪ್​ ಭಾಗವಾಗಿಲ್ಲ. ಆದರೆ ಬ್ಯಾಟಿಂಗ್​ ವಿಭಾಗದಲ್ಲಿ ನಾಯಕ ಶುಭಮಾನ್​ ಗಿಲ್​ ಸಹಿತ ಎಲ್ಲ ಪ್ರಮುಖ ಆಟಗಾರರು ಸ್ಥಾನ ಪಡೆಯುವ ನಿರೀಕ್ಷೆ ಇದೆ. ಬುಮ್ರಾಗೆ ಮಾತ್ರ ವಿಶ್ರಾಂತಿ ಸಿಗಲಿದೆ ಎನ್ನಲಾಗಿದೆ. ವೇಗಿ ಗುರ್​ನೂರ್​ ಬ್ರಾರ್​ ಸಹಿತ ಕೆಲ ಹೊಸಬರಿಗೂ ಸ್ಥಾನ ಒಲಿಯುವ ನಿರೀಕ್ಷೆ ಇದೆ.

ಜೂನ್​ 14, 17, 20ರಂದು ಕ್ರಮವಾಗಿ ಧರ್ಮಶಾಲಾ, ಲಖನೌ, ಚೆನ್ನೈನಲ್ಲಿ ನಡೆಯಲಿರುವ 3 ಏಕದಿನ ಪಂದ್ಯಗಳಲ್ಲೂ ಬಲಿಷ್ಠ ತಂಡವೇ ಕಣಕ್ಕಿಳಿಯಲಿದ್ದು, 2ನೇ ವಿಕೆಟ್​ ಕೀಪರ್​ ಯಾರೆಂಬುದು ಕುತೂಹಲ ಸೃಷ್ಟಿಸಿದೆ. ರಿಷಭ್​ ಪಂತ್​ ಹೊರಬೀಳುವ ಸಾಧ್ಯತೆ ಇದ್ದು, ಅವರ ಬದಲಿಗೆ ಸಂಜು ಸ್ಯಾಮ್ಸನ್​ ಅಥವಾ ಇಶಾನ್​ ಕಿಶನ್​ ಸ್ಥಾನ ಪಡೆಯುವ ನಿರೀಕ್ಷೆ ಇದೆ. ಕನ್ನಡಿಗ ಕೆಎಲ್​ ರಾಹುಲ್​ ಮೊದಲ ಆದ್ಯತೆಯ ವಿಕೆಟ್​ ಕೀಪರ್​ ಆಗಿ ಮುಂದುವರಿಯಲಿದ್ದಾರೆ.

ಏಕದಿನ ತಂಡದಲ್ಲಿ ಗೊಂದಲದಲ್ಲಿರುವ ಮತ್ತೊಂದು ಪ್ರಮುಖ ಪಾತ್ರವೆಂದರೆ ಸ್ಪಿನ್​ ಬೌಲಿಂಗ್​ ಆಲ್ರೌಂಡರ್​. ಅನುಭವಿ ರವೀಂದ್ರ ಜಡೇಜಾ, ಫಾರ್ಮ್​ನಲ್ಲಿಲ್ಲದ ಅಕ್ಷರ್​ ಪಟೇಲ್​, ವಾಷಿಂಗ್ಟನ್​ ಸುಂದರ್​ ಜತೆಗೆ ಇತರರ ಆಯ್ಕೆ ಬಗ್ಗೆ ಹೆಚ್ಚಿನ ಚರ್ಚೆ ನಡೆಯುವ ನಿರೀಕ್ಷೆ ಇದೆ. ಮುಂದಿನ ವರ್ಷದ ಏಕದಿನ ವಿಶ್ವಕಪ್​ಗೆ ಬಲಿಷ್ಠ ತಂಡ ಕಟ್ಟುವ ಕಾರ್ಯ ಈ ಸರಣಿಯಿಂದ ಶುರುವಾಗಲಿದೆ.