77 ರನ್ or 8.4 ಓವರ್​... ಸೆಮೀಸ್​ ಆಸೆ ಜೀವಂತವಾಗಿಡಲು ಜಿಂಬಾಬ್ವೆ ವಿರುದ್ಧ ಭಾರತಕ್ಕಿದೆ ಈ 2 ಟಾರ್ಗೆಟ್​! IND vs ZIM

IND vs ZIM : ಪ್ರಸ್ತುತ ನಡೆಯುತ್ತಿರುವ ಟಿ20 ವಿಶ್ವಕಪ್‌ನಲ್ಲಿ ಲೀಗ್​ ಹಂತ ಯಶಸ್ವಿಯಾಗಿ ಮುಗಿದು, ಸೂಪರ್-8 ಹಂತವು ರೋಚಕ ಘಟ್ಟದಲ್ಲಿ ಸಾಗುತ್ತಿದೆ. ಗ್ರೂಪ್-1ರಲ್ಲಿರುವ ಭಾರತ ತಂಡವು ದಕ್ಷಿಣ ಆಫ್ರಿಕಾ ವಿರುದ್ಧ ಭಾರಿ ಅಂತರದಿಂದ ಸೋತಿದ್ದು, ಸೆಮಿಫೈನಲ್ ತಲುಪುವ ಆಸೆಗೆ ಭಂಗ ಉಂಟಾಗಿದೆ. ಅಲ್ಲದೆ, ವೆಸ್ಟ್ ಇಂಡೀಸ್ ತಂಡವು ಜಿಂಬಾಬ್ವೆ ವಿರುದ್ಧ ಭರ್ಜರಿ ಗೆಲುವು ಸಾಧಿಸಿರುವುದು ಕೂಡ ಟೀಮ್ ಇಂಡಿಯಾದ ಭರವಸೆಗಳಿಗೆ ತಣ್ಣೀರಾಕಿದೆ.

ಇದೀಗ ಭಾರತವು ತನ್ನ ಮುಂದಿನ ಎರಡೂ ಪಂದ್ಯಗಳನ್ನು ಸುಮ್ಮನೆ ಗೆದ್ದರೆ ಸಾಲುವುದಿಲ್ಲ, ಬದಲಾಗಿ ಭಾರಿ ಅಂತರದಲ್ಲಿ ಗೆಲವು ದಾಖಲಿಸಬೇಕಿದೆ. ಈಗ ಟೀಮ್ ಇಂಡಿಯಾದ ಸೆಮಿಫೈನಲ್ ಅವಕಾಶಗಳು ಸಂಪೂರ್ಣವಾಗಿ ಅಂಕಿಅಂಶಗಳ ಮೇಲೆ ಅವಲಂಬಿತವಾಗಿದೆ. ವಿಶೇಷವಾಗಿ ಮುಂದಿನ ಪಂದ್ಯದಲ್ಲಿ ಜಿಂಬಾಬ್ವೆ ವಿರುದ್ಧ ಗೆಲ್ಲುವ ರೀತಿಯು ನಿರ್ಣಾಯಕವಾಗಿದೆ. ಆ ಲೆಕ್ಕಾಚಾರಗಳು ಏನೆಂದು ನಾವೀಗ ತಿಳಿದುಕೊಳ್ಳೋಣ.

ಭಾರತ, ಜಿಂಬಾಬ್ವೆ ವಿರುದ್ಧ ಮೊದಲು ಬ್ಯಾಟ್ ಮಾಡಿದರೆ ಕನಿಷ್ಠ 200 ರನ್ ಗಳಿಸಬೇಕು. ಬಳಿಕ ಜಿಂಬಾಬ್ವೆಯನ್ನು 123 ರನ್‌ಗಳಿಗೆ ಸೀಮಿತಗೊಳಿಸಿ, 77 ರನ್‌ಗಳಿಂದ ಗೆಲ್ಲಬೇಕು. ಇಷ್ಟು ದೊಡ್ಡ ಅಂತರದಲ್ಲಿ ಗೆಲುವು ಸಾಧಿಸುವುದರಿಂದ ಮಾತ್ರ ನೆಟ್​ ರನ್ ರೇಟ್​ ಗಮನಾರ್ಹವಾಗಿ ಸುಧಾರಿಸುತ್ತದೆ. ಸೆಮಿಫೈನಲ್ ಆಸೆಯನ್ನು ಜೀವಂತವಾಗಿ ಇರಿಸಲು ಇದು ಮುಖ್ಯ ಮಾರ್ಗವಾಗಿದೆ.

ಒಂದು ವೇಳೆ ಭಾರತ ಚೇಸಿಂಗ್​ ಮಾಡಿದರೆ, ಲೆಕ್ಕಾಚಾರಗಳು ಇನ್ನಷ್ಟು ಕಠಿಣವಾಗುತ್ತವೆ. ಉದಾಹರಣೆಗೆ, ಜಿಂಬಾಬ್ವೆ 120 ರನ್ ಗಳಿಸಿದರೆ, ಭಾರತ 8.4 ಓವರ್‌ಗಳಲ್ಲಿ ಆ ಗುರಿಯನ್ನು ಬೆನ್ನಟ್ಟಬೇಕಾಗುತ್ತದೆ. ಇದರರ್ಥ ಅವರು ಪ್ರತಿ ಓವರ್‌ನಲ್ಲಿ ಹೆಚ್ಚಿನ ರನ್ ಗಳಿಸಬೇಕಾಗುತ್ತದೆ. ಒಟ್ಟಾರೆಯಾಗಿ, ಸರಳ ಗೆಲುವಂತೂ ಟೀಮ್​ ಇಂಡಿಯಾಗೆ ಸಾಕಾಗುವುದಿಲ್ಲ, ವೇಗವಾದ ಚೇಸ್ ಅತ್ಯಗತ್ಯವಾಗಿದೆ.

ಒಟ್ಟಾರೆ ಹೇಳಬೇಕೆಂದರೆ, ಭಾರತಕ್ಕೆ ಈಗ ಎದುರಾಳಿ ಜಿಂಬಾಬ್ವೆ ತಂಡವಲ್ಲ, ಬದಲಾಗಿ ಲೆಕ್ಕಚಾರಗಳು ಎದುರಾಳಿಗಳಾಗಿವೆ. ಕೇವಲ ಗೆಲ್ಲುವುದಲ್ಲ, ದೊಡ್ಡ ಗೆಲುವು ಮುಖ್ಯವಾಗಿದೆ. ಇದು ನಡೆದರೆ ಮಾತ್ರ ಭಾರತದ ಸೆಮೀಸ್‌ ಆಸೆ ಜೀವಂತವಾಗಿ ಇರುತ್ತದೆ. ಅಭಿಮಾನಿಗಳು ಜಿಂಬಾಬ್ವೆ ವಿರುದ್ಧದ ಪಂದ್ಯಕ್ಕಾಗಿ ಕಾತರದಿಂದ ಕಾಯುತ್ತಿರುವಾಗ, ಈ ಪಂದ್ಯವು ಟೀಮ್ ಇಂಡಿಯಾದ ಭವಿಷ್ಯವನ್ನು ನಿರ್ಧರಿಸುವ ನಿರ್ಣಾಯಕ ಯುದ್ಧವಾಗಲಿದೆ.

ಅಂದಹಾಗೆ, ನಾಳೆ (ಫೆ.26) ಜಿಂಬಾಬ್ವೆ ವಿರುದ್ಧ ನಡೆಯಲಿರುವ ಪಂದ್ಯಕ್ಕೆ ಚೆನ್ನೈನ ಚಿದಂಬರಂ ಸ್ಟೇಡಿಯಂ ವೇದಿಕೆಯಾಗಿದೆ, (ಏಜೆನ್ಸೀಸ್​).