ಮೈದಾನದಲ್ಲೇ ಕಿತ್ತಾಡಿಕೊಂಡ ಇಂಡೋ-ಪಾಕ್​ ಆಟಗಾರರು: ವೈರಲ್​ ವಿಡಿಯೋ ಹಿಂದಿನ ಅಸಲಿಯತ್ತೇ ಬೇರೆ...Ind vs Pak

Ind vs Pak: ಯಾವುದೇ ಕ್ರೀಡೆ ಇರಲಿ ಭಾರತ ಮತ್ತು ಪಾಕಿಸ್ತಾನ ಎದುರಾಳಿಗಳಾದರೆ ಆ ಕ್ರೀಡೆ ಸಖತ್​ ರೋಮಾಂಚನಕಾರಿಯಾಗಿರುತ್ತವೆ. ಸಾಂಪ್ರದಾಯಿಕ ಎದುರಾಳಿಗಳ ನಡುವಿನ ಯಾವುದೇ ಪಂದ್ಯವನ್ನು ಪ್ರತಿಷ್ಠೆಯಿಂದ ನೋಡಲಾಗುತ್ತದೆ. ಅದರಲ್ಲೂ ಕ್ರಿಕೆಟ್‌ನಲ್ಲಿ ಉಭಯ ದೇಶಗಳ ನಡುವಿನ ಪಂದ್ಯಕ್ಕೆ ಭಾರಿ ಹೈಪ್​ ಕ್ರಿಯೆಟ್​ ಆಗಿರುತ್ತದೆ. ಸ್ವಲ್ಪ ವ್ಯತ್ಯಾಸವಾದರೆ ಸಾಕು ಇಡೀ ಪಂದ್ಯ ವಿವಾದ ಕೇಂದ್ರ ಬಿಂದುವಾಗಿಬಿಡುತ್ತದೆ.

ಎರಡು ಏಷ್ಯಾದ ದೇಶಗಳ ನಡುವಿನ ಸಂಬಂಧಗಳು ಬಹಳ ಸಮಯದಿಂದ ಹದಗೆಟ್ಟಿವೆ. ಈ ವರ್ಷದ ಆರಂಭದಲ್ಲಿ ನಡೆದ ಪಹಲ್ಗಾಮ್ ದಾಳಿಯ ಬಳಿಕ ಭಾರತ ಮತ್ತು ಪಾಕಿಸ್ತಾನದ ನಡುವಿನ ಸಂಬಂಧ ಮತ್ತಷ್ಟು ಹದಗೆಟ್ಟಿದೆ. ಹೀಗಾಗಿ ಉಭಯ ದೇಶಗಳ ನಡುವಿನ ಪಂದ್ಯಗಳು ಗಂಭೀರ ಸ್ವರೂಪ ಪಡೆದಿವೆ.

ಈಗಾಗಲೇ ಎರಡೂ ದೇಶಗಳ ನಡುವಿನ ಪಂದ್ಯಗಳಲ್ಲಿ ಅನೇಕ ವಿವಾದಾತ್ಮಕ ಘಟನೆಗಳು ಕೂಡ ನಡೆದಿವೆ. ಕೈ ಕುಲಕದೇ ಇರುವುದು ಮತ್ತು ಭಾರತ ಗೆದ್ದ ಮೇಲೆ ಟ್ರೋಫಿ ಹಸ್ತಾಂತರ ಮಾಡದಿರುವುದು ಹಾಗೂ ಪಾಕ್​ ಆಟಗಾರರು ಭಾರತೀಯರನ್ನು ಕೆರಳಿಸುವಂತಹ ಕೈ ಸನ್ನೆ ಮಾಡಿದಂತಹ ಘಟನೆಗಳನ್ನು ಇಂದಿಗೂ ಮರೆಯಲಾಗದು.

ಇನ್ನೂ ಇತ್ತೀಚೆಗೆ, ಭಾರತ ಮತ್ತು ಪಾಕಿಸ್ತಾನಿ ಕ್ರಿಕೆಟ್ ಆಟಗಾರರು ಮೈದಾನದಲ್ಲೇ ಜಗಳವಾಡುತ್ತಿರುವ ವಿಡಿಯೋವೊಂದು ವೈರಲ್ ಆಗಿದೆ. ಆ ವಿಡಿಯೋದಲ್ಲಿ, ಇಬ್ಬರು ಆಟಗಾರರು ಪರಸ್ಪರ ಕುತ್ತಿಗೆ ಪಟ್ಟಿ ಹಿಡಿದು ನಿಂದಿಸುತ್ತಿರುವುದನ್ನು ಕಾಣಬಹುದು.

ಇತ್ತೀಚೆಗೆ ಶಾರ್ಜಾದಲ್ಲಿ ನಡೆದ ಕ್ರಿಕೆಟ್ ಪಂದ್ಯದ ವೇಳೆ ಭಾರತ ಮತ್ತು ಪಾಕಿಸ್ತಾನದ ಇಬ್ಬರು ಆಟಗಾರರು ಮೈದಾನದಲ್ಲೇ ಕಿತ್ತಾಡಿಕೊಂಡಿದ್ದಾರೆ ಎಂಬ ಬರಹವುಳ್ಳ ವಿಡಿಯೋ ವೈರಲ್ ಆಗಿದೆ. ತಮ್ಮ ತಮ್ಮ ತಂಡದ ಜರ್ಸಿಯಲ್ಲಿ ತೀವ್ರ ವಾಗ್ವಾದ ನಡೆಸುತ್ತಿರುವಾಗ ಎರಡೂ ತಂಡಗಳ ಇನ್ನುಳಿದ ಆಟಗಾರರು ಅವರನ್ನು ಬಿಡಿಸಲು ಪ್ರಯತ್ನಿಸುತ್ತಾರೆ. ಈ ವಿಡಿಯೋವನ್ನು 'vijayma70555375' ಹೆಸರಿನ ಎಕ್ಸ್​ ಖಾತೆಯಲ್ಲಿ ಹಂಚಿಕೊಳ್ಳಲಾಗಿದೆ. ಸದ್ಯ ಈ ವಿಡಿಯೋವನ್ನು ಲಕ್ಷಾಂತರ ಜನರು ವೀಕ್ಷಿಸಿದ್ದು, ಆಟಗಾರರು ಮೈದಾನದಲ್ಲಿ ನಿಜವಾಗಿಯೂ ಜಗಳವಾಡಿದ್ದಾರೆಯೇ? ಎಂದು ಪ್ರಶ್ನಿಸುತ್ತಿದ್ದಾರೆ. ಆದರೆ, ವಿಡಿಯೋ ಹಿಂದಿನ ಅಸಲಿಯತ್ತೇ ಬೇರೆ ಇದೆ. ಅದೇನೆಂದು ನಾವೀಗ ತಿಳಿದುಕೊಳ್ಳೋಣ.

ಎರಡೂ ದೇಶಗಳ ಆಟಗಾರರು ಮೈದಾನದಲ್ಲಿ ಕಿತ್ತಾಡುತ್ತಿರುವುದನ್ನು ತೋರಿಸುವ ವೈರಲ್​ ವಿಡಿಯೋ ನಕಲಿ. ಈ ವಿಡಿಯೋಗೂ ವಾಸ್ತವಕ್ಕೂ ಯಾವುದೇ ಸಂಬಂಧವೇ ಇಲ್ಲ. ಇದನ್ನು AI (ಕೃತಕ ಬುದ್ಧಿಮತ್ತೆ) ಬಳಸಿ ರಚಿಸಲಾಗಿದೆ. ವೈರಲ್ ವಿಡಿಯೋದಲ್ಲಿ ನೋಡಿದಂತೆ, ಮೈದಾನದಲ್ಲಿ ಯಾವುದೇ ಕಿತ್ತಾಟ ನಡೆದಿಲ್ಲ. ಜಗಳ ಆಡುತ್ತಿರುವ ಆ ಇಬ್ಬರು ಆಟಗಾರರು ನಿಜವಾದ ಆಟಗಾರರಲ್ಲ. ಅವರು AI-ಸೃಷ್ಟಿಸಿದ ಪಾತ್ರಗಳು. ವಿಡಿಯೋ ಆರಂಭವಾದ 0.07 ಸೆಕೆಂಡುಗಳಲ್ಲಿ ಅದು ನಕಲಿ ಎಂದು ಸ್ಪಷ್ಟವಾಗುತ್ತದೆ, (ಏಜೆನ್ಸೀಸ್​).