ನ್ಯೂಜಿಲೆಂಡ್​ ಬಗ್ಗಿಸಲು ಈತನೇ ಬೆಸ್ಟ್​! ಟಿ20 ವಿಶ್ವಕಪ್​ ಗೆಲ್ಲಲು ತಂಡದಲ್ಲಿ ಇದೊಂದು ಬದಲಾವಣೆ ಬೇಕೇ ಬೇಕು... | IND vs NZ Final

IND vs NZ Final: ಟೀಮ್ ಇಂಡಿಯಾ ಮೂರನೇ ಬಾರಿಗೆ ಟಿ20 ವಿಶ್ವಕಪ್ ಗೆಲ್ಲುವ ಹೊಸ್ತಿಲಲ್ಲಿದೆ. ಭಾರತ ತಂಡ ಸತತ ಎರಡನೇ ಬಾರಿಗೆ ಟಿ20 ವಿಶ್ವಕಪ್‌ನ ಫೈನಲ್ ತಲುಪಿದ್ದು, ಇದೇ ಭಾನುವಾರ (ಮಾ.06) ಅಹಮದಾಬಾದ್​​ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ಅಂತಿಮ ಹಣಾಹಣಿ ನಡೆಯಲಿದೆ. ಈ ಪಂದ್ಯಕ್ಕಾಗಿ ಬಹಳ ಕುತೂಹಲದಿಂದ ಕಾಯುತ್ತಿರುವ ಕ್ರಿಕೆಟ್​ ಪ್ರಿಯರು ಸದ್ಯ ಟೀಮ್ ಇಂಡಿಯಾಗೆ ತಂಡದಲ್ಲಿ ಒಂದೇ ಒಂದು ಬದಲಾವಣೆ ಮಾಡಿಕೊಳ್ಳಿ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಒತ್ತಾಯಿಸುತ್ತಿದ್ದಾರೆ.  

ಇಂಗ್ಲೆಂಡ್​ ವಿರುದ್ಧದ ಸೆಮಿಫೈನಲ್​ ಪಂದ್ಯದಲ್ಲಿ ಆಂಗ್ಲರ ಬ್ಯಾಟ್​ನಿಂದ ಹರಿಯುತ್ತಿದ್ದ ರನ್​ಗಳ ಹೊಳೆಯನ್ನು ಟೀಮ್ ಇಂಡಿಯಾ ಬೌಲರ್​ಗಳಿಂದ ತಡೆಯಲು ಸಾಧ್ಯವಾಗಲಿಲ್ಲ. ಕೊನೆಯ 18 ಮತ್ತು 19ನೇ ಓವರ್​ನಲ್ಲಿ ಬುಮ್ರಾ ಹಾಗೂ ಪಾಂಡ್ಯ ಇಂಗ್ಲೆಂಡ್​ ಬ್ಯಾಟರ್​ಗಳನ್ನು ಗೆಲುವಿನ ದಡ ಸೇರದಂತೆ ಕಟ್ಟಿಹಾಕಿದ್ದು ಮೆಚ್ಚುವಂತದ್ದು. ಆದರೆ, ಅದಕ್ಕೂ ಹಿಂದಿನ ಅಂದರೆ ಮಧ್ಯದ ಓವರ್​ಗಳಲ್ಲಿ ಹೆಚ್ಚುವರಿ ರನ್​ಗಳನ್ನು ನೀಡಿದ ಸ್ಪಿನ್​ ಮಾಂತ್ರಿಕ ವರುಣ್​ ಚಕ್ರವರ್ತಿ, ವಿಕೆಟ್​ ಕಬಳಿಸುವುದಕ್ಕಿಂತ ನಿರೀಕ್ಷೆಗೂ ಮೀರಿದ ರನ್​ಗಳನ್ನೇ ನೀಡಿದರು. ಇದು ತಂಡದ ಬೇಸರಕ್ಕೆ ಕಾರಣವಾಯಿತು.

ಭಾರತ ನಿರೀಕ್ಷಿಸಿದ ರೀತಿಯಲ್ಲಿಯೇ ಟೂರ್ನಿ ಆರಂಭವಾಯಿತು.  ಗ್ರೂಪ್​ ಸ್ಟೇಜ್​ನ ನಾಲ್ಕು ಪಂದ್ಯಗಳಲ್ಲಿ 12 ವಿಕೆಟ್‌ಗಳನ್ನು ಕಬಳಿಸಿದ ವರುಣ್​ ಚಕ್ರವರ್ತಿ, ಎದುರಾಳಿ ತಂಡದ ಬ್ಯಾಟ್ಸ್‌ಮನ್‌ಗಳು ರನ್​ ಹೊಡೆಯಲು ಹೆಣಗಾಡುವಂತೆ ಮಾಡಿದರು. ತಮ್ಮ ಸ್ಪಿನ್​ ದಾಳಿಯಿಂದ ಮಿಡಲ್​ ಓವರ್​ಗಳಲ್ಲಿ ಫುಲ್​ ಕಂಟ್ರೋಲ್​ ಮಾಡುತ್ತಿದ್ದ ಚಕ್ರವರ್ತಿ ಅದ್ಯಾಕೋ ಸೂಪರ್​-8 ಹಂತಕ್ಕೆ ಹೋಗುತ್ತಿದ್ದಂತೆ ತಮ್ಮ ಲಯ ಕಳೆದುಕೊಂಡಿದ್ದಾರೆ. 

ದಕ್ಷಿಣ ಆಫ್ರಿಕಾ, ಜಿಂಬಾಬ್ವೆ ಮತ್ತು ವೆಸ್ಟ್ ಇಂಡೀಸ್ ವಿರುದ್ಧದ ಪಂದ್ಯಗಳಲ್ಲಿ ಕಂಟ್ರೋಲ್​ ಕಳೆದುಕೊಂಡ ವರುಣ್​, ವಿಕೆಟ್​ ಪಡೆಯುವುದಕ್ಕಿಂತ ಹೆಚ್ಚುವರಿ ರನ್​ಗಳನ್ನು ನೀಡಿದರು. ಸಾಮಾನ್ಯವಾಗಿ ಡಾಟ್ ಬಾಲ್‌ಗಳ ಮೂಲಕ ನಿರ್ಮಿಸುತ್ತಿದ್ದ ಒತ್ತಡ ಈಗ ನಿಧಾನವಾಗಿ ಮರೆಯಾಗಿದೆ. ಇದೆಲ್ಲವೂ ಅವರ ಬೌಲಿಂಗ್​ ಮೇಲಿನ ಭರವಸೆಯನ್ನು ಕುಸಿಯುವಂತೆ ಮಾಡಿದೆ. ಈ ಮಧ್ಯೆ, ಅಹಮದಾಬಾದ್​ ಪಿಚ್​​ಗೆ ಕುಲದೀಪ್​ ಯಾದವ್​ ಅವರೇ ಉತ್ತಮ ಎಂದು ಕ್ರಿಕೆಟ್​ ಪ್ರೇಮಿಗಳು ಹೇಳುತ್ತಿದ್ದಾರೆ.

ನ್ಯೂಜಿಲೆಂಡ್​ ತಂಡವನ್ನು ಕಟ್ಟಿಹಾಕಿ, ಟಿ20 ವಿಶ್ವಕಪ್​ ಟ್ರೋಫಿಯನ್ನು ಎತ್ತಿಹಿಡಿಯುವ ಆಸೆಯಿದ್ದರೆ ಮೊದಲು ತಂಡಕ್ಕೆ ಕುಲದೀಪ್​ ಯಾದವ್ ಅವರನ್ನು ಕರೆತರಬೇಕು. ವರುಣ್ ಚಕ್ರವರ್ತಿ ಸ್ಥಾನಕ್ಕೆ ಕುಲದೀಪ್​ರನ್ನು ಆಡಿಸುವುದು ಬಹಳ ಒಳ್ಳೆಯ ಕೆಲಸ. ನರೇಂದ್ರ ಮೋದಿ ಕ್ರೀಡಾಂಗಣದ ಪಿಚ್​ಗೆ ಅವರ ಬೌಲಿಂಗ್​ ಸರಿಯಾಗಿ ಕೆಲಸ ಮಾಡುತ್ತೆ ಎಂದಿದ್ದಾರೆ. ತಂಡದಲ್ಲಿ ಇದೊಂದು ಬದಲಾವಣೆ ತನ್ನಿ ಎಂದು ಹಲವರು ಸೋಷಿಯಲ್ ಮೀಡಿಯಾದಲ್ಲಿ ಟೀಮ್ ಇಂಡಿಯಾಗೆ ಸಲಹೆ ನೀಡಿರುವುದು ಗಮನಾರ್ಹ,(ಏಜೆನ್ಸೀಸ್).