ತವರಿನಲ್ಲಿ ಟೀಮ್ ಇಂಡಿಯಾಗೆ.... ಟಿ20 ವಿಶ್ವಕಪ್​ ಫೈನಲ್​ಗೂ ಮುನ್ನ ನ್ಯೂಜಿಲೆಂಡ್​ ಕ್ಯಾಪ್ಟನ್​ ಅಚ್ಚರಿ ಹೇಳಿಕೆ

IND vs NZ Final: ಟೀಮ್ ಇಂಡಿಯಾ ಮೂರನೇ ಬಾರಿಗೆ ಟಿ20 ವಿಶ್ವಕಪ್ ಗೆಲ್ಲುವ ಹೊಸ್ತಿಲಲ್ಲಿದೆ. ಭಾರತ ತಂಡ ಸತತ ಎರಡನೇ ಬಾರಿಗೆ ಟಿ20 ವಿಶ್ವಕಪ್‌ನ ಫೈನಲ್ ತಲುಪಿದ್ದು, ಇದೇ ಭಾನುವಾರ (ಮಾ.06) ಅಹಮದಾಬಾದ್​​ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ಅಂತಿಮ ಕಾಳಗ ನಡೆಯಲಿದೆ. ನಾಳಿನ ಪಂದ್ಯಕ್ಕೂ ಮುನ್ನ ನಡೆಸಿದ ಪತ್ರಿಕಾಗೋಷ್ಠಿಯಲ್ಲಿ ಭಾಗವಹಿಸಿದ ಕಿವೀಸ್​ ಪಡೆಯ ನಾಯಕ ಮಿಚೆಲ್ ಸ್ಯಾಟ್ನರ್​, ಎದುರಾಳಿ ತಂಡದ ಬಗ್ಗೆ ಕುತೂಹಲಕಾರಿ ಹೇಳಿಕೆಗಳನ್ನೇ ನೀಡಿದ್ದಾರೆ.

ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ನಡೆಯಲಿರುವ ಪಂದ್ಯ ಕುರಿತಾಗಿ ಮಾತನಾಡಿದ ಸ್ಯಾಟ್ನರ್​, ಫೈನಲ್​ಗೆ ನಾವು ಸಿದ್ಧವಿದ್ದೇವೆ ಮತ್ತು ಬಹಳ ಉತ್ಸಾಹದಿಂದ ಕೂಡಿದ್ದೇವೆ. ನಮಗಿಂತ ಭಾರತಕ್ಕೆ ಹೆಚ್ಚು ಒತ್ತಡವಿದೆ. ಕಾರಣ, ತವರಿನ ಅಂಗಳದಲ್ಲಿ ವಿಶ್ವಕಪ್​ ಗೆಲ್ಲುವ ತವಕ ಎಂದರು. ಇದರ ನಡುವೆಯೇ, 2023ರಲ್ಲಿ ಆಸ್ಟ್ರೇಲಿಯಾ ನಾಯಕ ಪ್ಯಾಟ್​ ಕಮ್ಮಿನ್ಸ್​ ಹೇಳಿಕೆಯನ್ನು ರಿಪೀಟ್​ ಮಾಡಿದ ಮಿಚೆಲ್​, ನಾನು ಮತ್ತು ನನ್ನ ತಂಡ ಕ್ರೀಡಾಂಗಣದಲ್ಲಿರುವ ಭಾರತೀಯ ಅಭಿಮಾನಿಗಳನ್ನು ಸೈಲೆಂಟ್​ ಮಾಡ್ತೇವೆ ಎಂದರು.

ಇಲ್ಲಿ ಹಲವು ಸವಾಲುಗಳಿವೆ. ಪಿಚ್​ ಬ್ಯಾಟಿಂಗ್​ ಮಾಡಲು ಹೆಚ್ಚು ಅನುಕೂಲಕರವಿರುವಂತೆ ಕಾಣಿಸುತ್ತದೆ. ಬ್ಯಾಟರ್​ಗಳಿಗೆ ಹೆಚ್ಚಿನ ಸ್ಕೋರ್​ ಗಳಿಸಲು ಉತ್ತಮವಾಗಿದೆ ಅನಿಸುತ್ತದೆ ಎಂದರು. ಇನ್ನು ಬುಮ್ರಾ ಬಗ್ಗೆ ಪ್ರಶ್ನೆ ಕೇಳಿಬರುತ್ತಿದ್ದಂತೆ ಅಲರ್ಟ್ ಆದ ಮಿಚೆಲ್​, ಆತ ನಮಗೆ ಮಾತ್ರ ಬೆದರಿಕೆಯಲ್ಲ. ಎಲ್ಲ ಕ್ರಿಕೆಟ್​ ತಂಡಗಳಿಗೂ ಸವಾಲಿನ ಬೌಲರ್​ ಎಂದು ಹೇಳಿದರು.

ನನ್ನ ಪ್ರಕಾರ, ಇಂಗ್ಲೆಂಡ್​ ಗೆಲುವಿನ ಹಾದಿಯಲ್ಲಿತ್ತು. ಉತ್ತಮವಾಗಿ ಆಡುತ್ತಿದ್ದರು. ಆದರೆ, ಬುಮ್ರಾ ನಿಜಕ್ಕೂ ಪಂದ್ಯದ ಲೆಕ್ಕಾಚಾರವನ್ನೇ ಬದಲಿಸಿದರು. ಆ ರಾತ್ರಿ ಅವರು ಗೇಮ್​ ಚೇಂಜರ್ ಆದರು. ಜಸ್ಪ್ರಿತ್​ ಒಬ್ಬ ವರ್ಲ್ಡ್​ ಕ್ಲಾಸ್​ ಬೌಲರ್​. ಅವರೊಬ್ಬರೇ ಅಲ್ಲ, ತಂಡದಲ್ಲಿ ಹಲವರು ಉತ್ತಮ ಪ್ರದರ್ಶನ ನೀಡುತ್ತಿದ್ದಾರೆ. ಆ ಸಮಯಕ್ಕೆ ತಕ್ಕಂತೆ ಒಬ್ಬೊಬ್ಬರು ಒಂದೊಂದು ರೀತಿ ಕೊಡುಗೆ ನೀಡುತ್ತಿದ್ದಾರೆ ಎಂದರು,(ಏಜೆನ್ಸೀಸ್).