ಇದು ದೊಡ್ಡ ಸ್ಕ್ಯಾಮ್​! 'ಅಭಿ'ಗೆ ಅಭಿಮಾನಿಗಳ ಆಕ್ರೋಶ... ಇಂಗ್ಲೆಂಡ್​ ವಿರುದ್ಧದ ಸೆಮಿಫೈನಲ್​ ಪಂದ್ಯದಲ್ಲಿಯೂ ಮತ್ತದೇ ಮಿಸ್ಟೇಕ್​! | IND vs ENG

IND vs ENG: ಇಂದು (ಮಾ.05) ಮುಂಬೈನ ವಾಂಖೆಡೆ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಭಾರತ ಮತ್ತು ಇಂಗ್ಲೆಂಡ್​ ನಡುವಿನ ಸೆಮಿಫೈನಲ್ ಪಂದ್ಯದಲ್ಲಿ ಮತ್ತದೇ ಕಳಪೆ ಪ್ರದರ್ಶನವನ್ನು ಮುಂದುವರಿಸಿದ ಅಭಿಷೇಕ್​ ಶರ್ಮ ವಿರುದ್ಧ ಸದ್ಯ ಕ್ರಿಕೆಟ್​ ಪ್ರಿಯರು ತೀವ್ರ ಅಸಮಾಧಾನಗೊಂಡಿದ್ದಾರೆ.

ಟಾಸ್ ಗೆದ್ದು ಮೊದಲು ಬೌಲಿಂಗ್ ಆಯ್ಕೆ ಮಾಡಿಕೊಂಡ ಇಂಗ್ಲೆಂಡ್​, ಭಾರತಕ್ಕೆ ಬ್ಯಾಟ್​ ಮಾಡುವಂತೆ ಆಹ್ವಾನಿಸಿದೆ. ಅಂತೆಯೇ ಬ್ಯಾಟಿಂಗ್ ಶುರು ಮಾಡಿದ ಟೀಮ್ ಇಂಡಿಯಾಗೆ ಇವತ್ತಾದರೂ ಯುವ ಬ್ಯಾಟರ್​ ಅಭಿಷೇಕ್​ ಶರ್ಮರಿಂದ ಉತ್ತಮ ಇನ್ನಿಂಗ್ಸ್​ ಬರಲಿದೆ ಎಂದೇ ಕ್ರಿಕೆಟ್​ ಪ್ರಿಯರು ನಿರೀಕ್ಷಿಸಿದ್ದರು. ಆದರೆ, ಭಾರತೀಯ ಕ್ರಿಕೆಟ್​ ಅಭಿಮಾನಿಗಳ ಭರವಸೆಯನ್ನು ಇಂದಿನ ಪಂದ್ಯದಲ್ಲಿಯೂ ಛಿದ್ರಗೊಳಿಸಿದ ಅಭಿಷೇಕ್​, ಕೇವಲ 9 ರನ್​ಗೆ ಔಟ್​ ಆಗಿ ಪೆವಿಲಿಯನ್​ ಸೇರಿದರು.

ವಿಲ್​ ಜ್ಯಾಕ್ಸ್ ಬೌಲಿಂಗ್​ನಲ್ಲಿ ಫಿಲ್​ ಸಾಲ್ಟ್​ಗೆ ಕ್ಯಾಚ್​ ನೀಡುವ ಮೂಲಕ ಕೇವಲ 9 ರನ್​ಗೆ ಔಟ್​ ಆದ ಅಭಿಷೇಕ್​, ಹ್ಯಾರಿ ಬ್ರೂಕ್​ ಪಡೆಯ ಮುಂದೆಯೂ ಅಬ್ಬರಿಸಲು ವಿಫಲರಾದರು. ಅಷ್ಟಕ್ಕೂ, ಇದೇ ಮೊದಲಾಗಿದಿದ್ದರೆ ಯಾರಿಗೂ ಬೇಸರವಾಗುತ್ತಿರಲಿಲ್ಲ. ಆದ್ರೆ, ಗ್ರೂಪ್ ಸ್ಟೇಜ್​ ಹಂತದ ಮೂರು ಪಂದ್ಯಗಳಲ್ಲಿಯೂ ಸತತ ಡಕ್​ಔಟ್​ ಆದ ಅಭಿ, ಸೂಪರ್​-8 ಮ್ಯಾಚ್​ನಲ್ಲೂ ಫ್ಲಾಪ್​ ಆದರು. ಇಷ್ಟಾದರೂ ಅವರ ಮೇಲೆ ನಂಬಿಕೆಯಿಟ್ಟು, ಸೆಮೀಫೈನಲ್​ ಪಂದ್ಯದಲ್ಲಿ ಆಡಿಸಿದ ಗೌತಮ್​ ಗಂಭೀರ್​ಗೆ ಇದೀಗ ಮತ್ತೊಮ್ಮೆ ಭಾರೀ ಮುಖಭಂಗವೇ ಉಂಟಾಗಿದೆ.

ಈ ಟಿ20 ವಿಶ್ವಕಪ್​ ಟೂರ್ನಿಯಲ್ಲಿ ಒಂದು ಪಂದ್ಯವನ್ನು ಹೊರತುಪಡಿಸಿದರೆ ಉಳಿದೆಲ್ಲ ಪಂದ್ಯದಲ್ಲಿಯೂ ಫ್ಲಾಪ್​ ಆಗಿರುವ ಅಭಿಷೇಕ್ ಶರ್ಮ ವಿರುದ್ಧ ಭಾರತೀಯ ಕ್ರಿಕೆಟ್​ ಪ್ರಿಯರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಈ ಕುರಿತಂತೆ ಸೋಷಿಯಲ್ ಮೀಡಿಯಾದಲ್ಲಿ ಟೀಕಿಸಿರುವ ಫ್ಯಾನ್ಸ್​, ನಿಮ್ಮಿಂದ ಇದು ಸಾಧ್ಯವಿಲ್ಲ ಎಂದಿದ್ದಾರೆ. ಇನ್ನೂ ಕೆಲವರು, ಉತ್ತಮ ಇನ್ನಿಂಗ್ಸ್ ನೀಡಲು ಈತನಿಂದ ಆಗ್ತಿಲ್ಲ ಎಂದಮೇಲೆ ಇನ್ನೂ ಎಷ್ಟು ಅವಕಾಶಗಳನ್ನು ಕೊಡ್ತೀರಿ ಎಂದು ಕಿಡಿಕಾರಿದ್ದಾರೆ,(ಏಜೆನ್ಸೀಸ್).