ನಮ್ಮ ಸೋಲಿಗೆ ಆ 2 ಮಿಸ್ಟೇಕ್​ ಕಾರಣ! ಇಂಗ್ಲೆಂಡ್​ ಎದುರು ಕ್ಲೀನ್ ಸ್ವೀಪ್​ ಬೆನ್ನಲ್ಲೇ ಕ್ಯಾಪ್ಟನ್ ಶ್ರೇಯಸ್​ ಅಚ್ಚರಿ ಹೇಳಿಕೆ

IND vs ENG: ನಿನ್ನೆ (ಜು.11) ಸೌತಾಂಪ್ಟನ್​ನಲ್ಲಿ ನಡೆದ ಭಾರತ ಮತ್ತು ಇಂಗ್ಲೆಂಡ್ ನಡುವಿನ ಕೊನೆಯ ಹಾಗೂ ಐದನೇ ಟಿ20 ಪಂದ್ಯದಲ್ಲಿಯೂ ಭಾರತ ಗೆಲುವು ದಾಖಲಿಸುವಲ್ಲಿ ಎಡವಿದ್ದು, ಕ್ಲೀನ್​ ಸ್ವೀಪ್​ ಆಗುವ ಮೂಲಕ ಸದ್ಯ ಭಾರಿ ಮುಖಭಂಗಕ್ಕೆ ಗುರಿಯಾಗಿದೆ. ಟಿ20 ಸರಣಿಯ ಹೀನಾಯ ಸೋಲಿನ ಬೆನ್ನಲ್ಲೇ ಮಾತನಾಡಿದ ಟೀಮ್ ಇಂಡಿಯಾ ಕ್ಯಾಪ್ಟನ್​ ಶ್ರೇಯಸ್​ ಅಯ್ಯರ್​, ಪಂದ್ಯದ ಸೋಲಿಗೆ ಏನು ಕಾರಣ ಎಂಬುದನ್ನು ಓಪನ್ ಆಗಿ ಮಾತನಾಡಿದ್ದಾರೆ. 

ಮೊದಲು ಬ್ಯಾಟಿಂಗ್ ಮಾಡಿದ ಇಂಗ್ಲೆಂಡ್ ನಿಗದಿತ 20 ಓವರ್‌ಗಳಲ್ಲಿ ಮೂರು ವಿಕೆಟ್‌ಗಳ ನಷ್ಟಕ್ಕೆ 257 ರನ್ ಗಳಿಸಿತು. ಜಾಸ್ ಬಟ್ಲರ್ (64 ಎಸೆತಗಳಲ್ಲಿ 131 ರನ್​, 12 ಬೌಂಡರಿ, 8 ಸಿಕ್ಸರ್‌) ಅದ್ಭುತ ಇನ್ನಿಂಗ್ಸ್ ಆಡಿದರೆ, ಕ್ಯಾಪ್ಟನ್​ ಹ್ಯಾರಿ ಬ್ರೂಕ್ (45 ಎಸೆತಗಳಲ್ಲಿ ಅಜೇಯ 95 ರನ್​, 4 ಬೌಂಡರಿ, 8 ಸಿಕ್ಸರ್‌) ಭಾರತೀಯ ಬೌಲರ್‌ಗಳನ್ನು ಹಿಗ್ಗಾಮುಗ್ಗಾ ಜಾಡಿಸಿದರು. ಈ ಜೋಡಿ ಕೇವಲ 103 ಎಸೆತಗಳಲ್ಲಿ ಎರಡನೇ ವಿಕೆಟ್‌ಗೆ 233 ರನ್‌ ಸೇರಿಸಿತು. ಈ ಬೃಹತ್ ಗುರಿಯನ್ನು ಬೆನ್ನಟ್ಟಿದ ಭಾರತಕ್ಕೆ ಎಂದಿನಂತೆ ಟಾಪ್​ ಆರ್ಡರ್​ ಬ್ಯಾಟರ್​ಗಳಿಂದ ಉತ್ತಮ ಪ್ರದರ್ಶನ ಬರಲಿಲ್ಲ.

20 ಓವರ್‌ಗಳಲ್ಲಿ 8 ವಿಕೆಟ್‌ಗಳ ನಷ್ಟಕ್ಕೆ ಕೇವಲ 201 ರನ್ ಗಳಿಸಲಷ್ಟೇ ಭಾರತ ಶಕ್ತವಾಯಿತು. ಇಶಾನ್ ಕಿಶನ್ (35 ಎಸೆತಗಳಲ್ಲಿ 56 ರನ್​, 7 ಬೌಂಡರಿ, 2 ಸಿಕ್ಸರ್) ಮತ್ತು ತಿಲಕ್ ವರ್ಮಾ (25 ಎಸೆತಗಳಲ್ಲಿ 53 ರನ್​, 3 ಬೌಂಡರಿ, 4 ಸಿಕ್ಸರ್) ಅರ್ಧಶತಕ ಗಳಿಸಿದರು. ಉಳಿದ ಬ್ಯಾಟ್ಸ್‌ಮನ್‌ಗಳು ಉತ್ತಮ ಪ್ರದರ್ಶನ ನೀಡಲು ವಿಫಲರಾದರು. ಇದರಿಂದ ಟೀಮ್ ಇಂಡಿಯಾ ಆಂಗ್ಲರ ವಿರುದ್ಧ ಒಂದೇ ಒಂದು ಪಂದ್ಯವನ್ನು ಗೆಲ್ಲದೆ ಸರಣಿಯನ್ನು ಕಳೆದುಕೊಂಡಿತು.

ಐದನೇ ಟಿ20 ಪಂದ್ಯವನ್ನು ಸೋತ ಬಳಿಕ ಮಾತನಾಡಿದ ನಾಯಕ ಶ್ರೇಯಸ್ ಅಯ್ಯರ್, ಈ ಸರಣಿಯಲ್ಲಿನ ಪ್ರತಿಯೊಂದು ಪಂದ್ಯದಲ್ಲೂ ಪರಿಸ್ಥಿತಿಗಳು ಬದಲಾಗುತ್ತಿವೆ. ಆದರೆ, ಕಳೆದ ಪಂದ್ಯದ ಪಿಚ್ ಅತ್ಯುತ್ತಮವಾಗಿತ್ತು. ಹೀಗಾಗಿಯೇ, ನಾವು ಬ್ಯಾಟಿಂಗ್ ಲೈನ್​ಅಪ್​ ಅನ್ನು ಬದಲಾಯಿಸಬೇಕಾಯಿತು. ವೃತ್ತಿಪರ ತಂಡವಾಗಿ ಪ್ರತಿಯೊಂದು ಪರಿಸ್ಥಿತಿಗೆ ಹೊಂದಿಕೊಳ್ಳುವುದು ಬಹಳ ಮುಖ್ಯ. ನಮ್ಮ ತಂಡವು ಫೀಲ್ಡಿಂಗ್‌ನಲ್ಲಿ ಸಾಕಷ್ಟು ತಪ್ಪುಗಳನ್ನು ಮಾಡಿದೆ. ಮುಖ್ಯವಾಗಿ, ಕೈಬಿಟ್ಟ ಎರಡು ಕ್ಯಾಚ್‌ಗಳು ಪಂದ್ಯದ ದಿಕ್ಕನ್ನೇ ಬದಲಿಸಿತು. ಆ ಅವಕಾಶಗಳನ್ನು ಸರಿಯಾಗಿ ಬಳಸಿಕೊಂಡಿದ್ದರೆ ಎದುರಾಳಿ ತಂಡವನ್ನು 220ರಿಂದ 225 ರನ್‌ಗೆ ಕಟ್ಟಿಹಾಕಬಹುದಿತ್ತು ಎಂದರು. 

ಇನ್ನು, ತಂಡದ ಬ್ಯಾಟಿಂಗ್ ಬಗ್ಗೆ ಮಾತನಾಡುತ್ತಾ, ಪವರ್‌ಪ್ಲೇಯಲ್ಲಿ ವಿಕೆಟ್‌ಗಳು ಹೋಗುವುದು ತಂಡಕ್ಕೆ ದೊಡ್ಡ ಹೊಡೆತ. ಇಂತಹ ಪಿಚ್‌ಗಳಲ್ಲಿ, ನೀವು ಮೊದಲು ಪರಿಸ್ಥಿತಿಗಳನ್ನು ಅರ್ಥಮಾಡಿಕೊಳ್ಳಬೇಕು. ಆ ನಿಟ್ಟಿನಲ್ಲಿ ನಾವು ವಿಫಲರಾಗಿದ್ದೇವೆ.  ಇಂಗ್ಲೆಂಡ್ ಬೌಲರ್‌ಗಳು ತಮ್ಮ ಪ್ಲ್ಯಾನ್​ ಅನ್ನು ಅದ್ಭುತವಾಗಿ ಎಕ್ಸಿಕ್ಯೂಟ್​ ಮಾಡಿದ್ದಾರೆ. ಅದಕ್ಕೆ ನನ್ನ ಮೆಚ್ಚುಗೆಯಿದೆ. ತವರಿನಲ್ಲಿ ಆಡುವ ಅನುಭವವೂ ಅವರಿಗಿದೆ. ಪಂದ್ಯದಲ್ಲಿ ಜಾಸ್ ಬಟ್ಲರ್ ಮತ್ತು ಹ್ಯಾರಿ ಬ್ರೂಕ್ ಅವರ ಪಾರ್ಟ್​ನರ್​ಶಿಪ್​ ಬ್ಯಾಟಿಂಗ್​ ಇಂಗ್ಲೆಂಡ್‌ನ ಇನ್ನಿಂಗ್ಸ್‌ಗೆ ಬಲವಾದ ಅಡಿಪಾಯವನ್ನು ಹಾಕಿಕೊಟ್ಟಿತು. ಕೊನೆಯದಾಗಿ, ಈ ಸರಣಿಯಲ್ಲಿ ಪಡೆದ ಅನುಭವಗಳು ಭವಿಷ್ಯದ ವಿದೇಶ ಪ್ರವಾಸಗಳಲ್ಲಿ ಖಂಡಿತವಾಗಿಯೂ ಉಪಯೋಗವಾಗಲಿವೆ ಮತ್ತು ಈ ಪಾಠಗಳನ್ನು ಮರೆಯುವಂತಿಲ್ಲ ಎಂದು ಹೇಳಿದರು,(ಏಜೆನ್ಸೀಸ್).