ಇದೇನಾದ್ರೂ ಸಂಭವಿಸಿದ್ರೆ ಮತ್ತೊಮ್ಮೆ ಇಂಡೋ-ಪಾಕ್​ ಮುಖಾಮುಖಿ! ಮತ್ತೊಂದು ಹೈವೋಲ್ಟೇಜ್ ಪಂದ್ಯ ಖಚಿತ | IND vs PAK

IND vs PAK: ಪ್ರಸಕ್ತ ಭಾರತದಲ್ಲಿ ಮತ್ತು ಶ್ರೀಲಂಕಾದಲ್ಲಿ ನಡೆಯುತ್ತಿರುವ ಟಿ20 ವಿಶ್ವಕಪ್ ಪಂದ್ಯಗಳು ಕುತೂಹಲಕಾರಿ ಹಾಗೂ ರೋಚಕದತ್ತ ಸಾಗಿದ್ದು, ಟೀಮ್ ಇಂಡಿಯಾ ಮತ್ತು ಪಾಕಿಸ್ತಾನ ತಂಡಗಳು ಇದೀಗ ಸೂಪರ್ 8 ಹಂತಕ್ಕೆ ಪ್ರವೇಶ ಪಡೆದಿವೆ. ಇದು ಕ್ರಿಕೆಟ್​ ಅಭಿಮಾನಿಗಳ ಕೌತುಕವನ್ನು ಇನ್ನಷ್ಟು ಡಬಲ್ ಮಾಡಿದೆ.

ಫೆ.15ರಂದು ನಡೆದ ಇಂಡೋ-ಪಾಕ್​ ಹೈವೋಲ್ಟೇಜ್​ ಕದನದಲ್ಲಿ 61 ರನ್​ಗಳಿಂದ ಸೂರ್ಯಕುಮಾರ್ ಯಾದವ್ ಪಡೆ ಭರ್ಜರಿ ಗೆಲುವನ್ನು ದಾಖಲಿಸಿತು. ಇದು ಪಾಕಿಸ್ತಾನಕ್ಕೆ ಭಾರೀ ಮುಖಭಂಗ ಉಂಟುಮಾಡಿತು. ಈಗ ಈ ಎರಡೂ ತಂಡಗಳು ಸೂಪರ್ 8 ಹಂತವನ್ನು ಪ್ರವೇಶಿಸಿದ್ದೇ ಆದರೂ ಎರಡನೇ ಬಾರಿಗೆ ಮುಖಾಮುಖಿಯಾಗಲಿವೆಯೇ? ಎಂಬ ಪ್ರಶ್ನೆ, ಕುತೂಹಲ ಮೂಡಿದೆ. ಕ್ರಿಕೆಟ್ ವಿಶ್ಲೇಷಕರು ಭಾರತ-ಪಾಕ್​ ಮ್ಯಾಚ್​ ನಡೆಯೋದು ಖಚಿತ ಎಂದು ಭವಿಷ್ಯ ನುಡಿದಿದ್ದು, ಹೇಗೆ ಎಂಬುದನ್ನು ಸಹ ವಿವರಿಸಿದ್ದಾರೆ.

ಟಿ20 ವಿಶ್ವಕಪ್‌ನಲ್ಲಿ, ಪಾಕಿಸ್ತಾನ ಮತ್ತು ಭಾರತವನ್ನು ಎ ಗ್ರೂಪ್​ನಿಂದ, ಶ್ರೀಲಂಕಾ ಮತ್ತು ಜಿಂಬಾಬ್ವೆ ತಂಡಗಳನ್ನು ಬಿ ಗುಂಪಿನಿಂದ, ವೆಸ್ಟ್ ಇಂಡೀಸ್ ಮತ್ತು ಇಂಗ್ಲೆಂಡ್ ಅನ್ನು ಸಿ ಮತ್ತು ನ್ಯೂಜಿಲೆಂಡ್ ಮತ್ತು ದಕ್ಷಿಣ ಆಫ್ರಿಕಾವನ್ನು ಗ್ರೂಪ್​ 'ಡಿ'ಯಿಂದ ಆಯ್ಕೆ ಮಾಡಲಾಗಿದೆ. ಎ ಗ್ರೂಪ್​ನಿಂದ ಸೂಪರ್ 8 ಹಂತಕ್ಕೆ ಆಯ್ಕೆಯಾಗಿರುವ ಭಾರತ ಮತ್ತು ಪಾಕಿಸ್ತಾನ ತಲಾ ಮೂರು ಪಂದ್ಯಗಳನ್ನು ಎದುರಿಸಲಿವೆ. ಪಾಕ್​ ಈ ತಿಂಗಳ 21ರಂದು ನ್ಯೂಜಿಲೆಂಡ್, 24ರಂದು ಇಂಗ್ಲೆಂಡ್ ಮತ್ತು 28ರಂದು ಶ್ರೀಲಂಕಾ ವಿರುದ್ಧ ಆಡಲಿದೆ.

ಅದೇ ಭಾರತ, ಈ ತಿಂಗಳ 22ರಂದು ದಕ್ಷಿಣ ಆಫ್ರಿಕಾ, 26ರಂದು ಜಿಂಬಾಬ್ವೆ ಮತ್ತು ಮಾರ್ಚ್ 1ರಂದು ವೆಸ್ಟ್ ಇಂಡೀಸ್ ತಂಡಗಳ ವಿರುದ್ಧ ಸೆಮಿಫೈನಲ್​ಗೆ ಲಗ್ಗೆಯಿಡಲು ಆಡಲಿದೆ. ಇಲ್ಲಿ ಸೂರ್ಯಕುಮಾರ್ ಯಾದವ್ ಪಡೆ, ಸೂಪರ್ 8ರ ಗ್ರೂಪ್​ 1ರಲ್ಲಿ ಮೊದಲ ಸ್ಥಾನ ಪಡೆಯಬೇಕು ಮತ್ತು ಪಾಕಿಸ್ತಾನ ಗುಂಪು 2ರಲ್ಲಿ ಎರಡನೇ ಸ್ಥಾನ ಪಡೆಯಬೇಕು. ಇದೇನಾದರೂ ಸಂಭವಿಸಿದರೆ, ಸೆಮಿಫೈನಲ್‌ನಲ್ಲಿ ಪಾಕಿಸ್ತಾನ ಮತ್ತು ಭಾರತ ನಡುವೆ ಮತ್ತೊಂದು ಹೈ-ವೋಲ್ಟೇಜ್ ಪಂದ್ಯ ನಡೆಯಲಿದೆ. ಅಕಸ್ಮಾತ್​ ಇದು ನಡೆಯದಿದ್ದರೆ ಏನಾಗುತ್ತೆ? ಎಂಬ ಪ್ರಶ್ನೆಗೂ ಇದೇ ಉತ್ತರ.

ಇದೇನಾದರೂ ಸಂಭವಿಸದಿದ್ದರೆ, ಎರಡೂ ತಂಡಗಳು ತಮ್ಮ ತಮ್ಮ ಸೆಮಿಫೈನಲ್‌ ಪಂದ್ಯಗಳಲ್ಲಿ ಗೆಲುವು ಸಾಧಿಸಬೇಕು. ಆಗ ಫೈನಲ್ ತಲುಪುವ ಸಾಧ್ಯತೆಯಿದೆ. ಭಾರತ ಮತ್ತು ಪಾಕಿಸ್ತಾನ ಫೈನಲ್ ತಲುಪಿದರೆ, ಕೊಲಂಬೊದಲ್ಲಿ ಹೈವೋಲ್ಟೇಜ್​ ಅಲ್ಲ, ಪವರ್​ಹೌಸ್​ ಪಂದ್ಯಕ್ಕೆ ಸಾಕ್ಷಿಯಾಗಲಿದೆ. ಆದಾಗ್ಯೂ, ಕ್ರಿಕೆಟ್ ತಜ್ಞರ ಪ್ರಕಾರ, ತಂಡಗಳ ಬಲಾಬಲವನ್ನು ಆಧರಿಸಿ ಹೇಳುವುದಾದರೆ, ಭಾರತ, ದಕ್ಷಿಣ ಆಫ್ರಿಕಾ, ಶ್ರೀಲಂಕಾ ಮತ್ತು ಪಾಕಿಸ್ತಾನ ಸೆಮಿಫೈನಲ್​ಗೆ ಲಗ್ಗೆಯಿಡುವ ಸಾಧ್ಯತೆಗಳು ಹೆಚ್ಚಿವೆ,(ಏಜೆನ್ಸೀಸ್).