ಈ ಬಾರಿ ಟೀಮ್​ ಇಂಡಿಯಾ ಏಕದಿನ ವಿಶ್ವಕಪ್​ ಗೆಲ್ಲಬೇಕಾದ್ರೆ ಈ ಇಬ್ಬರು ಆಟಗಾರರು ತುಂಬಾನೇ ಮುಖ್ಯವೆಂದ ಜಾಂಟಿ ರೋಡ್ಸ್​! World Cup 2027

ನವದೆಹಲಿ: ಕ್ರಿಕೆಟ್ ಜಗತ್ತಿನ ಕಣ್ಣು ಈಗ 2027ರ ಏಕದಿನ ವಿಶ್ವಕಪ್ ( World Cup 2027 ) ಮೇಲೆ ನೆಟ್ಟಿದೆ. 2023ರ ಫೈನಲ್ ಸೋಲಿನ ನೋವನ್ನು ಮರೆತು ಈ ಬಾರಿ ಟ್ರೋಫಿ ಜಯಿಸುವ ಸಿದ್ಧತೆಯಲ್ಲಿರುವ ಟೀಮ್ ಇಂಡಿಯಾಗೆ ದಕ್ಷಿಣ ಆಫ್ರಿಕಾದ ದಿಗ್ಗಜ ಜಾಂಟಿ ರೋಡ್ಸ್ ಕೆಲವು ಅಮೂಲ್ಯ ಸಲಹೆಗಳನ್ನು ನೀಡಿದ್ದು, ರೋಹಿತ್ ಶರ್ಮಾ ಮತ್ತು ವಿರಾಟ್​ ಕೊಹ್ಲಿ ಅನುಭವವೇ ತಂಡದ ಅತಿ ದೊಡ್ಡ ಬಲ ಎಂದು ಬಣ್ಣಿಸಿದ್ದಾರೆ.

ಕೇವಲ ಪ್ರತಿಭೆ ಮತ್ತು ಉತ್ತಮ ಫಾರ್ಮ್, ವಿಶ್ವಕಪ್‌ನಂತಹ ಮಹಾಸಂಗ್ರಾಮದಲ್ಲಿ ಗೆಲುವನ್ನು ತಂದುಕೊಡಲಾರದು ಎಂದು ಜಾಂಟಿ ರೋಡ್ಸ್ ಸ್ಪಷ್ಟಪಡಿಸಿದ್ದಾರೆ. ನಾಲ್ಕು ವಿಶ್ವಕಪ್‌ಗಳನ್ನು ಆಡಿದ ಅನುಭವವಿರುವ ರೋಡ್ಸ್ ಪ್ರಕಾರ, ಇಂತಹ ದೊಡ್ಡ ಟೂರ್ನಿಗಳಲ್ಲಿ ಎದುರಾಗುವ ತೀವ್ರ ಒತ್ತಡವನ್ನು ಮೆಟ್ಟಿ ನಿಲ್ಲಲು ಅಗಾಧವಾದ ಮಾನಸಿಕ ದೃಢತೆ ಬೇಕು. ಆಟಗಾರರು ದೈಹಿಕವಾಗಿ ಎಷ್ಟೇ ಫಿಟ್ ಆಗಿದ್ದರೂ, ಮೈದಾನದ ಒತ್ತಡವನ್ನು ನಿಯಂತ್ರಿಸುವ ಮಾನಸಿಕ ಸ್ಥೈರ್ಯವೇ ಮುಖ್ಯ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ತಂಡದಲ್ಲಿ ರೋಹಿತ್ ಶರ್ಮಾರಂತಹ ಹಿರಿಯ ಮತ್ತು ಅನುಭವಿ ಆಟಗಾರ ಇರುವುದು ಟೀಮ್ ಇಂಡಿಯಾಗೆ ನೈತಿಕ ಸ್ಥೈರ್ಯವನ್ನು ತುಂಬಲಿದೆ ಎಂದು ರೋಡ್ಸ್ ಬಣ್ಣಿಸಿದ್ದಾರೆ. ಒತ್ತಡದ ಸನ್ನಿವೇಶಗಳಲ್ಲಿ ತಂಡವನ್ನು ಮುನ್ನಡೆಸಲು ಹಾಗೂ ಕಿರಿಯ ಆಟಗಾರರಿಗೆ ಮಾರ್ಗದರ್ಶನ ನೀಡಲು ರೋಹಿತ್ ಅವರ ಸುದೀರ್ಘ ಕ್ರಿಕೆಟ್ ಅನುಭವವು ನಿರ್ಣಾಯಕ ಪಾತ್ರ ವಹಿಸಲಿದೆ. ರೋಹಿತ್ ಅವರ ಉಪಸ್ಥಿತಿಯೇ ಎದುರಾಳಿ ಬೌಲಿಂಗ್ ಪಡೆಗೆ ಒಂದು ರೀತಿಯ ನಡುಕ ಹುಟ್ಟಿಸುತ್ತದೆ ಎಂಬುದರಲ್ಲಿ ಸಂದೇಹವಿಲ್ಲ ಎಂದಿದ್ದಾರೆ ಜಾಂಟಿ ರೋಡ್ಸ್​.

ಸದ್ಯ ಭಾರತೀಯ ಬ್ಯಾಟ್ಸ್‌ಮನ್‌ಗಳು ಸ್ಕೂಪ್ (Scoop) ಮತ್ತು ರಾಂಪ್ (Ramp) ನಂತಹ ಆಧುನಿಕ ಕ್ರಿಕೆಟ್ ಶಾಟ್‌ಗಳನ್ನು ಅತ್ಯಂತ ಪರಿಣಾಮಕಾರಿಯಾಗಿ ಆಡುತ್ತಿದ್ದಾರೆ. ಬ್ಯಾಟಿಂಗ್ ಶೈಲಿಯಲ್ಲಿನ ಈ ಹೊಸತನವು ಆಫ್ರಿಕನ್ ಪಿಚ್‌ಗಳಲ್ಲಿ ಟೀಮ್ ಇಂಡಿಯಾಗೆ ಮಹತ್ವದ ಲಾಭವನ್ನು ತಂದುಕೊಡಲಿದೆ. ಒಟ್ಟಾರೆಯಾಗಿ, ರೋಹಿತ್ ಅನುಭವ, ಆಟದ ಮೇಲಿನ ಕೊಹ್ಲಿ ಹಸಿವು , ಗಿಲ್ ನಾಯಕತ್ವ ಮತ್ತು ಮಾಡರ್ನ್ ಬ್ಯಾಟಿಂಗ್ ಶೈಲಿಯ ಸಂಯೋಜನೆಯೇ 2027ರ ವಿಶ್ವಕಪ್‌ನಲ್ಲಿ ಭಾರತದ ಗೆಲುವಿನ ಪ್ರಮುಖ ಸೂತ್ರವಾಗಲಿದೆ ಎಂದು ರೋಡ್ಸ್​ ಅಭಿಪ್ರಾಯಪಟ್ಟಿದ್ದಾರೆ, (ಏಜೆನ್ಸೀಸ್​).