ಒಂದು ಫೋಟೋಗೆ 100 ರೂ. ಕೇಳಿದ ವೈಭವ್​ ಸೂರ್ಯವಂಶಿ! ಮುಂದೇನಾಯ್ತು ನೀವೇ ನೋಡಿ... Vaibhav Sooryavanshi

Vaibhav Sooryavanshi : ವೈಭವ್​ ಸೂರ್ಯವಂಶಿ ಬಗ್ಗೆ ವಿಶೇಷವಾಗಿ ಹೇಳಬೇಕಿಲ್ಲ. ಏಕಂದರೆ, ಪ್ರಸ್ತುತ ಭಾರತದಲ್ಲಿ ಹೆಚ್ಚು ಬಳಕೆಯಲ್ಲಿರುವ ಹೆಸರಿದು. ತನ್ನ ಅಬ್ಬರದ ಬ್ಯಾಟಿಂಗ್​ ಮೂಲಕವೇ ವಿಶ್ವದ ಗಮನ ಸೆಳೆದಿರುವ 15 ವರ್ಷದ ಈ ಬಾಲಕ, ಟೀಮ್​ ಇಂಡಿಯಾದ ಭವಿಷ್ಯದ ಸ್ಟಾರ್​ ಆಟಗಾರ. ಪ್ರಸ್ತುತ ಐಪಿಎಲ್​ನಲ್ಲಿ ಅಬ್ಬರಿಸಿ, ಬೊಬ್ಬಿರಿಯುತ್ತಿರುವ ವೈಭವ್, ಅನುಭವಿ ಬೌಲರ್​ಗಳನ್ನೂ ಬೆಂಡೆತ್ತುತ್ತಿದ್ದಾರೆ​. ಮೈದಾನಕ್ಕೆ ಇಳಿದಾಗಲೆಲ್ಲ ಬೌಂಡರಿ, ಸಿಕ್ಸರ್​ ಮಳೆ ಸುರಿಸುವ ಮೂಲಕ ಅನೇಕ ದಾಖಲೆಗಳನ್ನು ತನ್ನ ಹೆಸರಿಗೆ ಬರೆದುಕೊಂಡಿರುವ ವೈಭವ್​, ಕೇವಲ 15 ವರ್ಷದಲ್ಲೇ ತನ್ನದೇಯಾದ ಅಭಿಮಾನಿ ಬಳಗವನ್ನು ಕಟ್ಟಿಕೊಂಡಿದ್ದಾರೆ.

ಅಂದಹಾಗೆ, ಎದುರಾಳಿ ಬೌಲರ್ ಎಷ್ಟೇ ಅನುಭವಿಯಾಗಿದ್ದರೂ ಅಂಜದೆ ಆಡುವ ಮನೋಭಾವ ಹೊಂದಿರುವ ವೈಭವ್​, ವೈಯಕ್ತಿಕ ಜೀವನದಲ್ಲಿ ತುಂಬಾ ತಮಾಷೆಯ ಸ್ವಭಾವದವರು. ಸದ್ಯ ಸಾಮಾಜಿಕ ಜಾಲತಾಣದಲ್ಲಿ ವೈಭವ್ ಮಾಡಿದ ಒಂದು ಪ್ರಾಂಕ್ (Prank) ವಿಡಿಯೋ ಸಖತ್ ವೈರಲ್ ಆಗುತ್ತಿದೆ.

ವಿಡಿಯೋದಲ್ಲಿ ವೈಭವ್​ ಅವರ ತುಂಟಾಟವನ್ನು ಕಂಡು ಕ್ರೀಡಾಭಿಮಾನಿಗಳು ಫಿದಾ ಆಗಿದ್ದಾರೆ. ಮೈದಾನದಲ್ಲಿ ತುಂಬಾ ಗಂಭೀರವಾಗಿ ಕಾಣುವ ಈ ಪ್ರತಿಭಾನ್ವಿತ ಆಟಗಾರ, ಮೈದಾನದ ಹೊರಗೆ ಅಷ್ಟೇ ತಮಾಷೆಯಾಗಿ ಇರುತ್ತಾರೆ ಎಂಬುದು ಈ ವಿಡಿಯೋ ಮೂಲಕ ಸಾಬೀತಾಗಿದೆ.

ವಿಮಾನ ನಿಲ್ದಾಣದಲ್ಲಿ ಕುಳಿತಿದ್ದ ಅವರನ್ನು ಗಮನಿಸಿದ ಇಬ್ಬರು ಮಕ್ಕಳು ಸೆಲ್ಫಿಗಾಗಿ ವಿನಂತಿಸಿದಾಗ, ಅವರು ತಮಾಷೆಯಾಗಿ "ನೀವು ಫೋಟೋ ತೆಗೆದುಕೊಳ್ಳಬೇಕಾದರೆ ನಾನು ಹಣ ಪಡೆಯುತ್ತೇನೆ, ಒಂದು ಫೋಟೋಗೆ 100 ರೂಪಾಯಿ ನೀಡಬೇಕು" ಎಂದು ಹೇಳುತ್ತಾರೆ.

ಮೊದಲಿಗೆ ಮಕ್ಕಳು ಇದನ್ನು ನಿಜವೆಂದು ನಂಬಿ 200 ರೂ. ನೀಡಲು ಒಪ್ಪುತ್ತಾರೆ. ಈ ವೇಳೆ ಅವರ ಮುಗ್ಧತೆಯನ್ನು ಕಂಡು ನಸುನಗುವ ಸೂರ್ಯವಂಶಿ, ಇದೊಂದು ತಮಾಷೆ ಎಂದು ಹೇಳುತ್ತಾ ಮಕ್ಕಳೊಂದಿಗೆ ಫೋಟೋಗೆ ಫೋಸ್ ನೀಡುತ್ತಾರೆ. ಈ ಆಕರ್ಷಕ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಅಭಿಮಾನಿಗಳ ಮನಗೆದ್ದಿದೆ.