“ನಾನು ಕ್ಷಮಿಸುತ್ತೇನೆ, ಆದರೆ ಮರೆಯುವುದಿಲ್ಲ”... “ನನ್ನೊಳಗೆ ಸಾಕಷ್ಟು ಕೋಪವಿದೆ”... ಕ್ರಿಕೆಟ್​ ಚೆಲುವೆ ಸ್ಮೃತಿ ಮಂಧನಾ ವಿಡಿಯೋ ವೈರಲ್​! Smriti Mandhana

ನವದೆಹಲಿ: ಭಾರತೀಯ ಮಹಿಳಾ ಕ್ರಿಕೆಟ್ ತಂಡದ ಸ್ಟಾರ್ ಓಪನರ್ ಸ್ಮೃತಿ ಮಂಧನಾ (Smriti Mandhana) ಎಂದರೆ  ಯಾರಿಗೆ ತಾನೇ ಇಷ್ಟವಿಲ್ಲ, ಹೇಳಿ? ಮೈದಾನದಲ್ಲಿ ಸಿಕ್ಸರ್ ಬೌಂಡರಿಗಳ ಸುರಿಮಳೆಗೈಯುವ ಈ ಚೆಲುವೆ, ಬ್ಯಾಟಿಂಗ್ ಮಾಡುವಾಗ ಎಷ್ಟು ಕೂಲ್ ಆಗಿರುತ್ತಾರೋ, ಹೊರಗಡೆಯೂ ಅಷ್ಟೇ ಸರಳವಾಗಿ ಕಾಣಿಸಿಕೊಳ್ಳುತ್ತಾರೆ. 

ಭಾನುವಾರ, ಸೆಪ್ಟೆಂಬರ್ 13 ರಂದು ಶ್ರೀಲಂಕಾ ವಿರುದ್ಧ ನಡೆಯಲಿರುವ ಹೈ-ವೋಲ್ಟೇಜ್ ಏಷ್ಯಾ ಕಪ್ ಫೈನಲ್ ಪಂದ್ಯಕ್ಕೆ ಭಾರತ ತಂಡ ಸಜ್ಜಾಗಿದ್ದು, ಮಂಧನಾ ಮೇಲೆ ಕೋಟ್ಯಂತರ ಅಭಿಮಾನಿಗಳು ದೊಡ್ಡ ನಿರೀಕ್ಷೆಯಿಟ್ಟುಕೊಂಡಿದ್ದಾರೆ. ಆದರೆ ಈ  ಪಂದ್ಯಕ್ಕೂ ಮುನ್ನವೇ ಸ್ಮೃತಿ ಮಂಧನಾ ಅವರ ಸಂದರ್ಶನವೊಂದರ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಸಖತ್ ವೈರಲ್ ಆಗಿದ್ದು, ಎಲ್ಲರ ಗಮನ ಸೆಳೆದಿದೆ.

ಮೈದಾನದಲ್ಲಿ ಸದಾ ನಗುತ್ತಾ, ಪ್ರಶಾಂತವಾಗಿ ಕಾಣುವ ಸ್ಮೃತಿ ಮಂಧನಾ ಅವರ ಮನಸ್ಸಿನ ಆಳದಲ್ಲಿ ಅದೆಷ್ಟೋ ನೋವುಗಳು, ಕೋಪಗಳು ಅಡಗಿವೆ ಎಂಬುದನ್ನು ಇತ್ತೀಚಿನ ಪಾಡ್‌ಕಾಸ್ಟ್ ಒಂದರಲ್ಲಿ ಅವರೇ ಖುದ್ದಾಗಿ ಬಿಚ್ಚಿಟ್ಟಿದ್ದಾರೆ. 

ಪಾಡ್‌ಕಾಸ್ಟ್ ಸಂದರ್ಶನದಲ್ಲಿ ನಿರೂಪಕರು ಸ್ಮೃತಿ ಅವರ ಜೀವನದ ಅತ್ಯಂತ ಕಠಿಣ ರಾತ್ರಿಯ ಬಗ್ಗೆ ಪ್ರಶ್ನೆ ಮಾಡಿದರು. ಈ ಪ್ರಶ್ನೆ ಕೇಳುತ್ತಿದ್ದಂತೆ ಸ್ಮೃತಿ ಮಂಧನಾ ಕೆಲಕ್ಷಣ ಸಂಪೂರ್ಣ ಮೌನವಾದರು. ಅವರ ಮುಖದಲ್ಲಿ ನೋವು ಸ್ಪಷ್ಟವಾಗಿ ಎದ್ದು ಕಾಣುತ್ತಿತ್ತು ಮತ್ತು ಕಣ್ಣುಗಳಲ್ಲಿ ನೀರು ತುಂಬಿಕೊಂಡಿತ್ತು! ಆ ಕಠಿಣ ರಾತ್ರಿ ಬಹುಶಃ ವಿಶ್ವಕಪ್ ಪಂದ್ಯಾವಳಿಯ ಸೋಲಿನ ಅಥವಾ ನೋವಿನ ಕ್ಷಣವಾಗಿರಬಹುದು ಎಂದು ಊಹಿಸಲಾಗಿದೆ. 

ಸಂಗೀತ ನಿರ್ದೇಶಕ ಪಲಾಶ್ ಮುಚ್ಚಲ್ ಅವರೊಂದಿಗಿನ ಸಂಬಂಧ ಹಾಗೂ ಅದು ಮುರಿದುಬಿದ್ದಿದೆ ಎಂದು ಸೋಷಿಯಲ್ ಮೀಡಿಯಾದಲ್ಲಿ ಹರಿದಾಡುತ್ತಿರುವ ಗಾಸಿಪ್‌ಗಳ ಬಗ್ಗೆ ಮಂಧನಾ ಎಂದಿಗೂ ಎಲ್ಲೂ ಬಾಯಿಬಿಟ್ಟಿಲ್ಲ. 

ಈ ಸಂದರ್ಶನದಲ್ಲೂ ಕೂಡ ಅವರು ತಮ್ಮ ವೈಯಕ್ತಿಕ ಮತ್ತು ವೃತ್ತಿಪರ ಜೀವನದ ನಡುವೆ ಅಂತರವನ್ನು ಕಾಯ್ದುಕೊಂಡರು. ವೈಯಕ್ತಿಕ ನೋವುಗಳನ್ನು ಹೊರಹಾಕಿ ಯಾರ ಅನುಕಂಪವನ್ನೂ ಪಡೆಯಲು ಅವರು ಎಂದಿಗೂ ಬಯಸುವುದಿಲ್ಲ ಎಂಬುದನ್ನು ಅವರ ಮಾತುಗಳು ಸ್ಪಷ್ಟಪಡಿಸಿವೆ.

ಜನರು ಹೊರನೋಟಕ್ಕೆ ನನ್ನನ್ನು ತುಂಬಾ ಶಾಂತ ಮತ್ತು ಮುಗ್ಧ ವ್ಯಕ್ತಿ ಎಂದುಕೊಳ್ಳುತ್ತಾರೆ. ಆದರೆ ನನ್ನೊಳಗೆ ಸಾಕಷ್ಟು ಕೋಪವಿದೆ. ಹಾಗಂತ ಆ ಕೋಪವನ್ನು ತೀರಿಸಿಕೊಳ್ಳಲು ನಾನು ಯಾರ ಮೇಲೂ ಸೇಡು ತೀರಿಸಿಕೊಳ್ಳುವುದಿಲ್ಲ. ನಾನು ಯಾರಿಂದಲೂ ಸಹಾನುಭೂತಿಯನ್ನು ನಿರೀಕ್ಷಿಸುವುದಿಲ್ಲ, ಯಾರೂ ನನ್ನನ್ನು ಕರುಣೆಯಿಂದ ನೋಡುವುದೂ ನನಗೆ ಇಷ್ಟವಿಲ್ಲ ಎಂದು ಸ್ಮೃತಿ ಮುಕ್ತವಾಗಿ ನುಡಿದಿದ್ದಾರೆ. 

ಯಾರಾದರೂ ತಪ್ಪು ಮಾಡಿದರೆ ಅವರನ್ನು ಸುಲಭವಾಗಿ ಕ್ಷಮಿಸುತ್ತೀರಾ ಎಂಬ ಪ್ರಶ್ನೆಗೆ ಸ್ಮೃತಿ ನೀಡಿದ ಉತ್ತರ ಈಗ ಎಲ್ಲಡೆ ಭಾರಿ ಚರ್ಚೆಗೆ ಗ್ರಾಸವಾಗಿದೆ.  ನಾನು ತಪ್ಪು ಮಾಡಿದವರನ್ನು ಕ್ಷಮಿಸುತ್ತೇನೆ, ಆದರೆ ಎಂದಿಗೂ ಮರೆಯುವುದಿಲ್ಲ! ಎಂದು ಅವರು ಖಡಕ್ ಆಗಿ ಹೇಳಿದ್ದಾರೆ. 

ಇದರರ್ಥ ಯಾರ ಜತೆಗೂ ಅನಾವಶ್ಯಕ ಜಗಳವಾಡಿ ಸಮಯ ವ್ಯರ್ಥ ಮಾಡದೆ ಜೀವನದಲ್ಲಿ ಮುಂದೆ ಸಾಗುವುದು ಅವರಿಗೆ ಚೆನ್ನಾಗಿ ಗೊತ್ತು, ಆದರೆ ತಮಗೆ ಯಾರು, ಏನು ಮಾಡಿದ್ದರು ಎಂಬುದನ್ನು ಅವರು ಎಂದಿಗೂ ಮರೆಯುವುದಿಲ್ಲ ಎನ್ನವ ಅರ್ಥದಲ್ಲಿ ಈ ಮಾತನ್ನು ಹೇಳಿದ್ದಾರೆ. 

ಒಟ್ಟಿನಲ್ಲಿ, ಎಷ್ಟೇ ಕಷ್ಟಗಳು, ನೋವುಗಳು ಎದುರಾದರೂ ಅವೆಲ್ಲವನ್ನೂ ನಗುತ್ತಲೇ ನುಂಗಿಕೊಂಡು ದೇಶಕ್ಕಾಗಿ ಮೈದಾನದಲ್ಲಿ ಬೆವರು ಹರಿಸುವ ಸ್ಮೃತಿ ಮಂಧನಾ ನಿಜಕ್ಕೂ ಪ್ರತಿಯೊಬ್ಬರಿಗೂ ದೊಡ್ಡ ಸ್ಫೂರ್ತಿಯಾಗಿದ್ದಾರೆ ಎನ್ನುವುದು ನೆಟ್ಟಿಗರ ಅಭಿಪ್ರಾಯವಾಗಿದೆ, (ಏಜೆನ್ಸೀಸ್​).