ಟಿ20 ವಿಶ್ವಕಪ್: ಭಾನುವಾರ ಭಾರತ-ವೆಸ್ಟ್​ ಇಂಡೀಸ್​ ಕ್ವಾರ್ಟರ್​ಫೈನಲ್​! ಮಳೆ ಬಂದರೆ ವಿಂಡೀಸ್​ಗೆ ಲಾಭ!

ನವದೆಹಲಿ: ಟಿ20 ವಿಶ್ವಕಪ್​ನಲ್ಲಿ (T20 World Cup) ಗುರುವಾರದ ಪಂದ್ಯಗಳಲ್ಲಿ ವೆಸ್ಟ್​ ಇಂಡೀಸ್​ ತಂಡದ ಸೋಲು ಮತ್ತು ಭಾರತ ತಂಡದ ಗೆಲುವಿನಿಂದ, ಭಾನುವಾರ ಕೋಲ್ಕತದಲ್ಲಿ ನಡೆಯಲಿರುವ ಉಭಯ ತಂಡಗಳ ನಡುವಿನ ಸೂಪರ್​-8 ಹಂತದ ಕೊನೇ ಪಂದ್ಯ "ಕ್ವಾರ್ಟರ್​ಫೈನಲ್​' ಆಗಿ ಮಾರ್ಪಟ್ಟಿದೆ. ಯಾವುದೇ ರನ್​ರೇಟ್​ ಲೆಕ್ಕಾಚಾರದ ಅಗತ್ಯವಿಲ್ಲದೆ ಈಡನ್​ ಗಾರ್ಡನ್ಸ್​ನಲ್ಲಿ ಗೆದ್ದ ತಂಡ ಸೆಮಿಫೈನಲ್​ (semifinal) ಪ್ರವೇಶಿಸಲಿದೆ. ಇದರಿಂದ ಭಾರತ-ವಿಂಡೀಸ್​ ಪೈಕಿ ಭಾನುವಾರ ಒಂದು ತಂಡ ಮಾತ್ರ 3ನೇ ಬಾರಿ ಪ್ರಶಸ್ತಿ ಗೆಲ್ಲುವ ಆಸೆಯನ್ನು ಜೀವಂತ ಉಳಿಸಿಕೊಳ್ಳಲಿದೆ.

ಭಾರತ ತಂಡ ಜಿಂಬಾಬ್ವೆ ವಿರುದ್ಧ ಗೆಲುವು ಸಾಧಿಸುವುದರೊಂದಿಗೆ ದಕ್ಷಿಣ ಆಫ್ರಿಕಾ ತಂಡ ಸೂಪರ್-8ರ ಗ್ರೂಪ್-1ರಿಂದ ಮೊದಲ ತಂಡವಾಗಿ ಸೆಮಿಫೈನಲ್​ ಪ್ರವೇಶ ಖಚಿತಪಡಿಸಿಕೊಂಡಿದೆ. ದಕ್ಷಿಣ ಆಫ್ರಿಕಾ ಭಾನುವಾರ ಜಿಂಬಾಬ್ವೆ ವಿರುದ್ಧ ಸೂಪರ್-8 ಹಂತದ ತನ್ನ ಕೊನೇ ಪಂದ್ಯ ಆಡಲಿರುವುದರಿಂದ ಗ್ರೂಪ್​-1ರಲ್ಲಿ ಅಗ್ರಸ್ಥಾನವನ್ನೂ ಗಳಿಸುವುದು ಬಹುತೇಕ ಖಚಿತವೆನಿಸಿದೆ. ಇದರಿಂದ ಭಾರತ-ವಿಂಡೀಸ್​ ನಡುವಿನ ಪಂದ್ಯದಲ್ಲಿ ಗೆದ್ದ ತಂಡ ಗ್ರೂಪ್​-1ರ 2ನೇ ತಂಡವಾಗಿ ಸೆಮಿಫೈನಲ್​ಗೇರಲಿದೆ.

ಅತ್ತ ಗ್ರೂಪ್​-2ರಲ್ಲಿ ಇಂಗ್ಲೆಂಡ್ ಅಗ್ರಸ್ಥಾನ ಗಳಿಸುವ ನೆಚ್ಚಿನ ತಂಡವೆನಿಸಿದೆ. ಶುಕ್ರವಾರ ನ್ಯೂಜಿಲೆಂಡ್​ ವಿರುದ್ಧ ಸೋತರಷ್ಟೇ ಇಂಗ್ಲೆಂಡ್​ 2ನೇ ಸ್ಥಾನಕ್ಕೆ ಕುಸಿಯಲಿದೆ. ಹೀಗಾಗಿ ಭಾರತ ಉಪಾಂತ್ಯಕ್ಕೇರಿದರೆ ಇಂಗ್ಲೆಂಡ್​ ಎದುರಾಳಿಯಾಗುವ ಸಾಧ್ಯತೆ ಹೆಚ್ಚಿದೆ. ಭಾರತ ಸೆಮಿಫೈನಲ್​ಗೇರಿದರೆ ಮಾರ್ಚ್​ 5ಕ್ಕೆ ಮುಂಬೈನ ವಾಂಖೆಡೆ ಕ್ರೀಡಾಂಗಣದಲ್ಲಿ ಆಡಲಿದೆ. ಪಾಕ್​-ಲಂಕಾ ಉಪಾಂತ್ಯಕ್ಕೇರುವುದು ಅನುಮಾನ ಎನಿಸಿರುವುದರಿಂದ, ಮೊದಲ ಸೆಮಿಫೈನಲ್​ ಪಂದ್ಯ ಮಾರ್ಚ್​ 4ಕ್ಕೆ ಕೋಲ್ಕತದ ಈಡನ್ ಗಾರ್ಡನ್ಸ್​ನಲ್ಲಿ ನಡೆಯುವುದು ಬಹುತೇಕ ಖಚಿತವೆನಿಸಿದೆ.