ದಕ್ಷಿಣ ಆಫ್ರಿಕಾ ವಿರುದ್ಧ ಟಿ20 ಸರಣಿಗೆ ಶುಭಮಾನ್​ ಗಿಲ್​ ಫಿಟ್​ ನಿರೀಕ್ಷೆ

ಕಳೆದ ತಿಂಗಳು ಕೋಲ್ಕತದಲ್ಲಿ ನಡೆದ ದ. ಆಫ್ರಿಕಾ ವಿರುದ್ಧದ ಮೊದಲ ಟೆಸ್ಟ್​ ಪಂದ್ಯದ 2ನೇ ದಿನದಾಟದ ವೇಳೆ ಗಿಲ್​ ಕುತ್ತಿಗೆ ನೋವಿಗೀಡಾಗಿದ್ದರು. ನಂತರ ಅವರು ಸರಣಿಯ 2ನೇ ಟೆಸ್ಟ್​ ಮತ್ತು ಪ್ರಸಕ್ತ ನಡೆಯುತ್ತಿರುವ ಏಕದಿನ ಸರಣಿಗೂ ಅಲಭ್ಯರಾಗಿದ್ದರು.

ಕಳೆದ ಆಸ್ಟ್ರೆಲಿಯಾ ಪ್ರವಾಸದಲ್ಲಿ ಸರಣಿ ಗೆಲುವು ಸಾಧಿಸಿದ ಭಾರತ ಟಿ20 ತಂಡದಲ್ಲಿ ಹೆಚ್ಚಿನ ಬದಲಾವಣೆಯ ಸಾಧ್ಯತೆ ಇಲ್ಲ. ಗಾಯ ಅಥವಾ ಬೇರೇನಾದರೂ ವೈಯಕ್ತಿಕ ಕಾರಣಗಳಿದ್ದರೆ ಮಾತ್ರ ಆಟಗಾರರ ಬದಲಾವಣೆಯಾಗಬಹುದು ಎನ್ನಲಾಗಿದೆ.

"ಗಿಲ್​ಗೆ ಚುಚ್ಚು ಮದ್ದು ಒಂದನ್ನು ನೀಡಲಾಗಿತ್ತು ಮತ್ತು 21 ದಿನಗಳ ವಿಶ್ರಾಂತಿ ಮತ್ತು ಪುನಶ್ಚೇತನವನ್ನು ಸೂಚಿಸಲಾಗಿತ್ತು. ಬಿಸಿಸಿಐ ಸಿಒಇನಲ್ಲಿ ಕ್ರೀಡಾ ವಿಜ್ಞಾನ ತಂಡ ಗಿಲ್​ ಫಿಟ್ನೆಸ್​ ಪರಿಶೀಲಿಸಿದ ಬಳಿಕ ಅವರಿಗೆ ಅಭ್ಯಾಸ ಆರಂಭಿಸಲು ಸೂಚಿಸುವ ಬಗ್ಗೆ ನಿರ್ಧರಿಸಲಿದೆ. ಅವರು ಬ್ಯಾಟಿಂಗ್​ ಅಭ್ಯಾಸ ಆರಂಭಿಸಿದ ಬಳಿಕ ಫಿಟ್ನೆಸ್​ ಬಗ್ಗೆ ಅಂತಿಮ ಅಭಿಪ್ರಾಯ ಹೊರಬೀಳಲಿದೆ' ಎಂದು ಬಿಸಿಸಿಐ ಮೂಲಗಳು ತಿಳಿಸಿವೆ.

ಶುಭಮಾನ್​ ಗಿಲ್​ ಅವರ ಫಿಟ್ನೆಸ್​ ಪರೀೆ ಮುಗಿದ ಬಳಿಕ ಅಜಿತ್​ ಅಗರ್ಕರ್​ ಸಾರಥ್ಯದ ಆಯ್ಕೆ ಸಮಿತಿ ತಂಡವನ್ನು ಪ್ರಕಟಿಸುವ ನಿರೀಕ್ಷೆ ಇದೆ. ಸದ್ಯಕ್ಕೆ ಗಿಲ್​ ಟಿ20 ಸರಣಿಗೆ ಫಿಟ್​ ಆಗುವ ಸಾಧ್ಯತೆ 50-50 ಎಂದೇ ಹೇಳಲಾಗುತ್ತಿದೆ.

ಆಲ್ರೌಂಡರ್​ ಹಾರ್ದಿಕ್​ ಪಾಂಡ್ಯ (Hardik Pandya) ಟಿ20 ಪಂದ್ಯಗಳನ್ನು ಆಡಲು ಫಿಟ್​ ಆಗಿದ್ದಾರೆ ಎಂದು ಬಿಸಿಸಿಐ ಶ್ರೇಷ್ಠತಾ ಕೇಂದ್ರ ಹಸಿರು ನಿಶಾನೆ ತೋರಿದೆ. ಅವರಿಗೆ ಬೌಲಿಂಗ್​ ಕೂಡ ಮಾಡಲು ಅನುಮತಿ ನೀಡಲಾಗಿದೆ. ಇದರಿಂದ ಅವರು ಮಂಗಳವಾರ ಹೈದರಾಬಾದ್​ನಲ್ಲಿ ನಡೆಯಲಿರುವ ಸಯ್ಯದ್​ ಮುಷ್ತಾಕ್​ ಅಲಿ ಟ್ರೋಫಿ ದೇಶೀಯ ಟಿ20 ಟೂನಿಯಲ್ಲಿ ಬರೋಡ ಪರ ಪಂಜಾಬ್​ ವಿರುದ್ಧದ ಪಂದ್ಯದಲ್ಲಿ ಆಡಲಿದ್ದಾರೆ. ನಂತರ ಡಿಸೆಂಬರ್​ 4ಕ್ಕೆ ನಡೆಯಲಿರುವ ಬರೋಡ ವಿರುದ್ಧದ ಪಂದ್ಯದಲ್ಲೂ ಅವರು ಆಡಲಿದ್ದು, ಈ ವೇಳೆ ಆಯ್ಕೆಗಾರ ಪ್ರಜ್ಞಾನ್​ ಓಜಾ ಹಾಜರಿರಲಿದ್ದಾರೆ. ಹಾರ್ದಿಕ್​ ಫಿಟ್ನೆಸ್​ ಬಗ್ಗೆ ಪ್ರಜ್ಞಾನ್​ ಓಜಾ ಸಮಗ್ರವಾಗಿ ಗಮನಿಸಿದ ಬಳಿಕ ದ. ಆಫ್ರಿಕಾ ವಿರುದ್ಧದ ಟಿ20 ಸರಣಿಗೆ ಭಾರತ ತಂಡ ಪ್ರಕಟಗೊಳ್ಳಲಿದೆ ಎನ್ನಲಾಗಿದೆ. ಹಾರ್ದಿಕ್​ ಡಿ.6ಕ್ಕೆ ಹರಿಯಾಣ ವಿರುದ್ಧದ ಪಂದ್ಯದಲ್ಲೂ ಆಡಲಿದ್ದಾರೆ.