ಕಟಕ್​ನಲ್ಲಿ ಇಂದು ಮೊದಲ ಟಿ20: ಶುಭಾರಂಭದ ತವಕದಲ್ಲಿ ಭಾರತ

ಮುಂದಿನ ವರ್ಷ ಫೆಬ್ರವರಿ-ಮಾರ್ಚ್​ನಲ್ಲಿ ತವರಿನಲ್ಲೇ ನಡೆಯಲಿರುವ ವಿಶ್ವಕಪ್​ಗೆ ಮುನ್ನ ಭಾರತ 10 ಟಿ20 ಪಂದ್ಯಗಳನ್ನಷ್ಟೇ ಆಡಲಿದೆ. ಈ ಸರಣಿಯ ನಂತರ ತವರಿನಲ್ಲೇ ನ್ಯೂಜಿಲೆಂಡ್​ ವಿರುದ್ಧ ಮತ್ತೆ 5 ಟಿ20 ಪಂದ್ಯಗಳನ್ನು ಆಡಲಿದೆ. ಹೀಗಾಗಿ ಟಿ20 ವಿಶ್ವಕಪ್​ನಲ್ಲಿ ಪ್ರಶಸ್ತಿ ಉಳಿಸಿಕೊಳ್ಳುವ ಅಭಿಯಾನ ಆರಂಭಿಸುವ ಮುನ್ನ ತಂಡ ಸಂಯೋಜನೆಯನ್ನು ಅಂತಿಮಗೊಳಿಸಲು ಭಾರತಕ್ಕೆ ಇದು ಅತ್ಯುತ್ತಮ ಅವಕಾಶವೆನಿಸಿದೆ.

ಗೌತಮ್​ ಗಂಭೀರ್​ ಮುಖ್ಯ ಕೋಚ್​ ಆದ ಬಳಿಕ ಟೆಸ್ಟ್​-ಏಕದಿನದಲ್ಲಿ ಮಿಶ್ರ ಲ ಕಂಡಿರುವ ಭಾರತ ತಂಡ, ಟಿ20 ಕ್ರಿಕೆಟ್​ನಲ್ಲಿ ಭರ್ಜರಿ ಯಶಸ್ಸನ್ನೇ ಸಾಧಿಸಿದೆ. 2024ರ ಟಿ20 ವಿಶ್ವಕಪ್​ ಬಳಿಕ ಭಾರತ ತಂಡ ಆಡಿರುವ 26 ಟಿ20 ಪಂದ್ಯಗಳಲ್ಲಿ 4ರಲ್ಲಿ ಮಾತ್ರ ಸೋಲು ಕಂಡಿದೆ. ಈ ಪೈಕಿ ಒಂದೂ ಟಿ20 ಸರಣಿ ಸೋತಿಲ್ಲ. ಕಳೆದ ಸೆಪ್ಟೆಂಬರ್​ನಲ್ಲಿ ಏಷ್ಯಾಕಪ್​ ಟಿ20ಯಲ್ಲಿ ಭಾರತ ಸತತ 7 ಜಯದೊಂದಿಗೆ ಅಜೇಯವಾಗಿ ಪ್ರಶಸ್ತಿ ಜಯಿಸಿತ್ತು. ಇನ್ನು ಟಿ20 ವಿಶ್ವಕಪ್​ವರೆಗೂ ಭಾರತ ಇದೇ ಲಯವನ್ನು ಕಾಯ್ದುಕೊಳ್ಳಬೇಕಾಗಿದೆ.

ಮತ್ತೊಂದೆಡೆ ಟಿ20 ವಿಶ್ವಕಪ್​ ರನ್ನರ್​ಅಪ್​ ಸ್ಥಾನದ ಬಳಿಕ ಹರಿಣಗಳ ಚುಟುಕು ಕ್ರಿಕೆಟ್​ ನಿರ್ವಹಣೆ ನೀರಸವೆನಿಸಿದೆ. ನಂತರ ಆಡಿರುವ 25 ಪಂದ್ಯಗಳಲ್ಲಿ 9ರಲ್ಲಿ ಮಾತ್ರ ಗೆದ್ದು, 16ರಲ್ಲಿ ಸೋತಿದೆ. ಈ ಪಂದ್ಯಗಳಲ್ಲಿ ಬಲಿಷ್ಠ ತಂಡವನ್ನು ಕಣಕ್ಕಿಳಿಸದಿರುವುದು ಕೂಡ ಇದಕ್ಕೆ ಕಾರಣವಾಗಿದೆ. ಹೀಗಾಗಿ ಏಡನ್​ ಮಾರ್ಕ್ರಮ್​ ಬಳಗಕ್ಕೂ ಟಿ20 ವಿಶ್ವಕಪ್​ಗೆ ಮುನ್ನ ತಂಡ ಸಂಯೋಜನೆ ಸರಿಪಡಿಸಿಕೊಳ್ಳಲು ಇದು ಅತ್ಯುತ್ತಮ ಅವಕಾಶವೆನಿಸಿದೆ.

ದಣ ಆಫ್ರಿಕಾ ವಿರುದ್ಧದ ಮೊದಲ ಟೆಸ್ಟ್​ ವೇಳೆ ಕುತ್ತಿಗೆ ನೋವಿಗೆ ಒಳಗಾಗಿದ್ದ ಶುಭಮಾನ್​ ಗಿಲ್​ (Shubhman Gill) ಇದೀಗ ಸಂಪೂರ್ಣ ಫಿಟ್​ ಆಗಿದ್ದಾರೆ. ಜತೆಗೆ ಮುಂಬರುವ ದಿನಗಳಲ್ಲಿ ಸತತ ಟಿ20 ಪಂದ್ಯಗಳನ್ನು (ಟಿ20 ವಿಶ್ವಕಪ್​, ಐಪಿಎಲ್​) ಆಡಲು ಸಜ್ಜಾಗಿದ್ದಾರೆ. ಇದುವರೆಗೆ ಆಡಿರುವ 33 ಟಿ20 ಪಂದ್ಯಗಳಲ್ಲಿ ಕೇವಲ 29.89ರ ಸರಾಸರಿಯಲ್ಲಿ 837 ರನ್​ ಮಾತ್ರ ಗಳಿಸಿರುವ ಗಿಲ್​ಗೆ ತನ್ನ ದಾಖಲೆ ಸುಧಾರಿಸಿಕೊಳ್ಳಲು ಇದು ಅತ್ಯುತ್ತಮ ಅವಕಾಶವೂ ಆಗಿದೆ. ಇನ್ನು ಹಾರ್ದಿಕ್​ ಪಾಂಡ್ಯ ಗಾಯದಿಂದಾಗಿ ಏಷ್ಯಾಕಪ್​ ಫೈನಲ್​ನಿಂದ ಹೊರಗುಳಿದ ಬಳಿಕ ಇದೇ ಮೊದಲ ಬಾರಿಗೆ ಕಣಕ್ಕಿಳಿಯಲಿದ್ದಾರೆ. ಈಗಾಗಲೆ ಸಯ್ಯದ್​ ಮುಷ್ತಾಕ್​ ಅಲಿ ಟ್ರೋಫಿ ದೇಶೀಯ ಟಿ20 ಟೂರ್ನಿಯಲ್ಲಿ ಆಡಿ ತನ್ನ ಫಿಟ್ನೆಸ್​ ಕೂಡ ಸಾಬೀತುಪಡಿಸಿದ್ದಾರೆ. ಟಿ20 ವಿಶ್ವಕಪ್​ಗೆ ಮುನ್ನ ಅವರ ವಾಪಸಾತಿ ಭಾರತ ತಂಡಕ್ಕೆ ಹೆಚ್ಚಿನ ಸಮತೋಲನವನ್ನೂ ತರಲಿದೆ.

ಟಿ20 ತಂಡದಲ್ಲಿ ಭಾರತಕ್ಕಿರುವ ಪ್ರಮುಖ ಚಿಂತೆ, ನಾಯಕ ಸೂರ್ಯಕುಮಾರ್​ ಅವರ ಬ್ಯಾಟಿಂಗ್​ ಫಾರ್ಮ್​ನದ್ದಾಗಿದೆ. ಕಳೆದ ವರ್ಷ ಜುಲೈನಲ್ಲಿ ಟಿ20 ತಂಡದ ನಾಯಕರಾದ ಬಳಿಕ ಆಡಿರುವ 15 ಇನಿಂಗ್ಸ್​ಗಳಲ್ಲಿ ಅವರು ಕೇವಲ 15.33ರ ಸರಾಸರಿಯಲ್ಲಿ 184 ರನ್​ ಮಾತ್ರ ಗಳಿಸಿದ್ದಾರೆ. ಕಳೆದ 20 ಪಂದ್ಯಗಳಲ್ಲಿ ಅವರು ಒಂದೂ ಅರ್ಧಶತಕವನ್ನೂ ಬಾರಿಸಿಲ್ಲ. ಅವರ ಸ್ಟ್ರೆಕ್​ರೇಟ್​ ಕೂಡ 187ರಿಂದ 127ಕ್ಕೆ ಕುಸಿದಿದೆ. ಇತ್ತೀಚೆಗೆ ಸಯ್ಯದ್​ ಮುಷ್ತಾಕ್​ ಅಲಿ ಟ್ರೋಫಿ ದೇಶೀಯ ಟಿ20 ಟೂರ್ನಿಯಲ್ಲಿ ಆಡಿದಾಗಲೂ 5 ಪಂದ್ಯಗಳಲ್ಲಿ ಒಂದೂ ಅರ್ಧಶತಕವಿಲ್ಲದೆ 165 ರನ್​ಗಳನ್ನಷ್ಟೇ ಗಳಿಸಿದ್ದರು. ಮುಂದಿನ 10 ಟಿ20 ಪಂದ್ಯಗಳಲ್ಲಿ ಅವರು ಲಯಕ್ಕೆ ಮರಳಿದರೆ, ತವರಿನ ವಿಶ್ವಕಪ್​ನಲ್ಲಿ ಆತ್ಮವಿಶ್ವಾಸದಿಂದ ಹಾಲಿ ಚಾಂಪಿಯನ್​ ತಂಡವನ್ನು ಮುನ್ನಡೆಸಬಹುದಾಗಿದೆ.

ಭಾರತ: ಆಡುವ 11ರ ಬಳಗದಲ್ಲಿ ಹೆಚ್ಚಿನ ಗೊಂದಲಗಳಿಲ್ಲ. ಆದರೆ ವಿಕೆಟ್​ ಕೀಪರ್​ ಸ್ಥಾನದ ಬಗ್ಗೆ ಸ್ವಲ್ಪ ಗೊಂದಲವಿದೆ. ಸಂಜು ಸ್ಯಾಮ್ಸನ್​ ಮತ್ತು ಜಿತೇಶ್​ ಶರ್ಮ ನಡುವೆ ಕೀಪರ್​ ಸ್ಥಾನಕ್ಕೆ ನಿಕಟ ಪೈಪೋಟಿ ಇದೆ. ಕಳೆದ ಆಸೀಸ್​ ವಿರುದ್ಧ ಸರಣಿಯಲ್ಲಿ ಸ್ಯಾಮ್ಸನ್​ ಒಮ್ಮೆ ಮಾತ್ರ ಬ್ಯಾಟಿಂಗ್​ ಅವಕಾಶ ಪಡೆದಿದ್ದರೆ, ಸರಣಿಯ ಕೊನೇ 3 ಪಂದ್ಯಗಳಲ್ಲಿ ಜಿತೇಶ್​ ಆಡಿದ್ದರು. ಸ್ಯಾಮ್ಸನ್​ ಟಿ20ಯಲ್ಲಿ ಆರಂಭಿಕರಾಗಿ 3 ಶತಕ ಸಿಡಿಸಿದ ಸಾಧನೆ ಮಾಡಿದ್ದರೂ, ಗಿಲ್​ ವಾಪಸಾತಿಯಿಂದ ಆರಂಭಿಕನ ಸ್ಥಾನ ಖಾಲಿ ಇಲ್ಲದೆ ಇರುವುದೇ ಅವರಿಗೆ ದೊಡ್ಡ ಹಿನ್ನಡೆ ಎನಿಸಿದೆ. ಆದರೆ ಇತ್ತೀಚೆಗೆ ದೇಶೀಯ ಟಿ20ಯಲ್ಲಿ ಸ್ಯಾಮ್ಸನ್​ 2 ಅರ್ಧಶತಕ ಸಿಡಿಸಿ ಮಿಂಚಿದ್ದರೆ, ಜಿತೇಶ್​ 6 ಇನಿಂಗ್ಸ್​ಗಳಲ್ಲಿ 41 ರನ್​ ಗಳಿಸಿದ್ದೇ ಗರಿಷ್ಠವಾಗಿತ್ತು. ಜತೆಗೆ 8ನೇ ಕ್ರಮಾಂಕಕ್ಕೆ ಹರ್ಷಿತ್​-ವಾಷಿಂಗ್ಟನ್​-ಶಿವಂ ದುಬೆ ನಡುವೆ ತ್ರಿಕೋನ ಸ್ಪರ್ಧೆ ಇದೆ.

ಸಂಭಾವ್ಯ ತಂಡ: ಅಭಿಷೇಕ್​, ಗಿಲ್​, ಸೂರ್ಯಕುಮಾರ್​ (ನಾಯಕ), ತಿಲಕ್​ ವರ್ಮ, ಜಿತೇಶ್​/ಸ್ಯಾಮ್ಸನ್​ (ವಿ.ಕೀ), ಹಾರ್ದಿಕ್​ ಪಾಂಡ್ಯ, ಅಕ್ಷರ್​ ಪಟೇಲ್​, ಹರ್ಷಿತ್​ ರಾಣಾ/ವಾಷಿಂಗ್ಟನ್​/ಶಿವಂ ದುಬೆ, ಕುಲದೀಪ್​ ಯಾದವ್​, ವರುಣ್​ ಚಕ್ರವರ್ತಿ, ಜಸ್​ಪ್ರೀತ್​ ಬುಮ್ರಾ.

ದ. ಆಫ್ರಿಕಾ: ಕಳೆದ ವರ್ಷದ ಟಿ20 ವಿಶ್ವಕಪ್ ಫೈನಲ್​ನಲ್ಲಿ ಭಾರತ ವಿರುದ್ಧ ಮುಗ್ಗರಿಸಿದ್ದ ದ. ಆಫ್ರಿಕಾ ಇದೀಗ ಸೇಡಿನ ತವಕದಲ್ಲಿದೆ. ವೇಗಿ ಅನ್ರಿಚ್​ ನೋರ್ಕಿಯಾ ಫಿಟ್​ ಆಗಿ ಮರಳುತ್ತಿರುವುದು ಹರಿಣಗಳಿಗೆ ಬಲ ತುಂಬಲಿದೆ. ಮಾರ್ಕೋ ಯಾನ್ಸೆನ್​ ಆಲ್ರೌಂಡರ್​ ಆಗಿ ಮಿಂಚುತ್ತಿರುವುದು ತಂಡಕ್ಕೆ ಹೆಚ್ಚಿನ ಸಮತೋಲನ ತಂದಿದೆ. ಸ್ಪಿನ್ನರ್​ ಕೇಶವ್​ ಮಹಾರಾಜ್​ ಟಿ20ಗೂ ಮರಳುತ್ತಿದ್ದರೆ, ಟೋನಿ ಡಿ ಜಾರ್ಜಿ ಮತ್ತು ಯುವ ವೇಗಿ ಕ್ವೆನಾ ಮಾಕ ಗಾಯದಿಂದಾಗಿ ಅಲಭ್ಯರಾಗಿದ್ದಾರೆ. 

ಸಂಭಾವ್ಯ ತಂಡ: ಡಿಕಾಕ್​ (ವಿ.ಕೀ), ಮಾರ್ಕ್ರಮ್​ (ನಾಯಕ), ರೀಜಾ ಹೆಂಡ್ರಿಕ್ಸ್​, ಬ್ರೆವಿಸ್​, ಡೇವಿಡ್​ ಮಿಲ್ಲರ್​, ಸ್ಟಬ್ಸ್​, ಬಾಷ್​/ಲಿಂಡೆ, ಯಾನ್ಸೆನ್​, ಕೇಶವ್​, ಎನ್​ಗಿಡಿ, ನೋರ್ಕಿಯಾ.

ರಾಯ್​ಪುರದಲ್ಲಿ ನಡೆದ ದ. ಆಫ್ರಿಕಾ ವಿರುದ್ಧದ ಏಕದಿನ ಸರಣಿಯ 2ನೇ ಪಂದ್ಯದಲ್ಲಿನ ನಿಧಾನಗತಿ ಓವರ್​ಗಾಗಿ ಭಾರತ ತಂಡಕ್ಕೆ ಐಸಿಸಿ, ಪಂದ್ಯ ಸಂಭಾವನೆಯ ಶೇ. 10 ದಂಡ ವಿಧಿಸಿದೆ. ಕೆಎಲ್​ ರಾಹುಲ್​ ಬಳಗ ಸೋಲು ಕಂಡ ಆ ಪಂದ್ಯದಲ್ಲಿ ನಿಗದಿತ ಸಮಯದ ವೇಳೆ 2 ಓವರ್​ ಹಿಂದೆ ಬಿದ್ದಿತ್ತು. ಹೀಗಾಗಿ ಐಸಿಸಿ ನೀತಿಸಂಹಿತೆಯ ಪ್ರಕಾರ, ಆಟಗಾರರಿಗೆ ಪ್ರತಿ ಓವರ್​ಗೆ ಶೇ. 5ರಂತೆ ದಂಡ ಶಿಕ್ಷೆ ವಿಧಿಸಲಾಗಿದೆ. 

*100: ಜಸ್​ಪ್ರೀತ್​ ಬುಮ್ರಾ ಇನ್ನು 1 ಮತ್ತು ಹಾರ್ದಿಕ್​ ಪಾಂಡ್ಯ ಇನ್ನು 2 ವಿಕೆಟ್​ ಪಡೆದರೆ, ಟಿ20 ಕ್ರಿಕೆಟ್​ನಲ್ಲಿ 100 ವಿಕೆಟ್​ ಪೂರೈಸಲಿದ್ದಾರೆ.

*13: ದ. ಆಫ್ರಿಕಾ ಸರಣಿಯಲ್ಲಿ ಒಂದು ಪಂದ್ಯ ಗೆದ್ದರೂ, ಭಾರತ ವಿರುದ್ಧ ಗರಿಷ್ಠ ಟಿ20 ಪಂದ್ಯ ಗೆದ್ದ ತಂಡವೆನಿಸಲಿದೆ. ಸದ್ಯ ಆಸ್ಟ್ರೆಲಿಯಾ, ಇಂಗ್ಲೆಂಡ್​ ಜತೆ ಗರಿಷ್ಠ ತಲಾ 12 ಗೆಲುವಿನ ದಾಖಲೆ ಹಂಚಿಕೊಂಡಿದೆ.