ಭಾರತದ ಪೌರತ್ವ ಪಡೆದು ಇಲ್ಲೇ ಆಡು: ರಶೀದ್ ಖಾನ್‌ಗೆ ಸಿಕ್ಕಿದ್ದ ಆಫರ್ ಕೇಳಿ ದಂಗಾದ ಕ್ರಿಕೆಟ್ ಲೋಕ! | Rashid Khan

ಇತ್ತೀಚಿನ ಸಂದರ್ಶನವೊಂದರಲ್ಲಿ ಮಾತನಾಡಿರುವ ರಶೀದ್ ಖಾನ್, ತಮಗೆ ಭಾರತದ ಕಡೆಗಿರುವ ಪ್ರೀತಿ ಮತ್ತು ಭಾರತೀಯರು ತಮ್ಮ ಮೇಲೆ ತೋರುವ ಅಭಿಮಾನದ ಬಗ್ಗೆ ಭಾವುಕರಾಗಿ ಮಾತನಾಡಿದ್ದಾರೆ. ಈ ಸಂದರ್ಭದಲ್ಲೇ ಅವರು ಈ ಆಸಕ್ತಿದಾಯಕ ಘಟನೆಯನ್ನು ನೆನಪಿಸಿಕೊಂಡಿದ್ದಾರೆ.

"ಒಮ್ಮೆ ಭಾರತದ ಪ್ರಮುಖ ಕ್ರಿಕೆಟ್ ವ್ಯಕ್ತಿಯೊಬ್ಬರು ನನ್ನ ಬಳಿ ಬಂದು, 'ನೀನು ಅಫ್ಘಾನಿಸ್ತಾನ ಬಿಟ್ಟು ಭಾರತಕ್ಕೆ ಏಕೆ ಬರಬಾರದು? ಇಲ್ಲೇ ನೆಲೆಸು, ನಿನಗೆ ಭಾರತದ ಪೌರತ್ವ ಸಿಗುವಂತೆ ಮಾಡುತ್ತೇವೆ. ನೀನು ಭಾರತದ ಪರವಾಗಿಯೇ ಆಡಬಹುದು' ಎಂದು ಹೇಳಿದ್ದರು" ಎಂದು ರಶೀದ್ ಬಹಿರಂಗಪಡಿಸಿದ್ದಾರೆ.

ಭಾರತೀಯರ ಪ್ರೀತಿಯನ್ನು ಗೌರವಿಸಿದ ರಶೀದ್ ಖಾನ್, ಈ ಆಫರ್ ಅನ್ನು ಅತ್ಯಂತ ವಿನಮ್ರವಾಗಿ ತಿರಸ್ಕರಿಸಿದ್ದರಂತೆ. "ಭಾರತ ನನ್ನ ಎರಡನೇ ಮನೆ ಎಂಬುದು ನಿಜ. ಇಲ್ಲಿ ನನಗೆ ಸಿಗುವ ಗೌರವ ಬೇರೆಲ್ಲೂ ಸಿಗುವುದಿಲ್ಲ. ಆದರೆ, ನಾನು ಅಫ್ಘಾನಿಸ್ತಾನದವನು. ನನ್ನ ದೇಶದ ಪರವಾಗಿ ಆಡುವುದೇ ನನಗೆ ದೊಡ್ಡ ಹೆಮ್ಮೆ. ನನ್ನ ದೇಶದ ಜನರಿಗೆ ಕ್ರಿಕೆಟ್ ಮೂಲಕ ಸಂತೋಷ ನೀಡುವುದು ನನ್ನ ಮೊದಲ ಕರ್ತವ್ಯ" ಎಂದು ಅವರು ಉತ್ತರಿಸಿದ್ದಾಗಿ ತಿಳಿಸಿದ್ದಾರೆ.

ಐಪಿಎಲ್ ಆರಂಭವಾದಾಗಿನಿಂದಲೂ ರಶೀದ್ ಖಾನ್ ಭಾರತೀಯ ಕ್ರಿಕೆಟ್ ಅಭಿಮಾನಿಗಳ ನೆಚ್ಚಿನ ಆಟಗಾರರಾಗಿದ್ದಾರೆ. ಸನ್‌ರೈಸರ್ಸ್ ಹೈದರಾಬಾದ್ ಮತ್ತು ಗುಜರಾತ್ ಟೈಟಾನ್ಸ್ ಪರ ಆಡುವಾಗ ಅವರಿಗೆ ಸಿಕ್ಕ ಬೆಂಬಲ ಅಪಾರ. ಅಫ್ಘಾನಿಸ್ತಾನದಲ್ಲಿ ತಾಲಿಬಾನ್ ಆಡಳಿತ ಮತ್ತು ರಾಜಕೀಯ ಅಸ್ಥಿರತೆ ಇದ್ದಾಗಲೂ ರಶೀದ್ ಖಾನ್ ಅವರು ಭಾರತವನ್ನೇ ತಮ್ಮ ತರಬೇತಿ ನೆಲೆಯನ್ನಾಗಿ ಬಳಸಿಕೊಂಡಿದ್ದರು.

ಕ್ರೀಡಾ ವಿಶ್ಲೇಷಕರ ಪ್ರಕಾರ, ರಶೀದ್ ಖಾನ್ ಅವರಂತಹ ವಿಶ್ವದರ್ಜೆಯ ಆಟಗಾರ ಭಾರತದ ಪರ ಆಡಿದ್ದರೆ ಭಾರತೀಯ ಸ್ಪಿನ್ ವಿಭಾಗಕ್ಕೆ ಆನೆಬಲ ಬರುತ್ತಿತ್ತು. ಆದರೆ ರಶೀದ್ ತಮ್ಮ ದೇಶದ ಮೇಲಿಟ್ಟಿರುವ ನಿಷ್ಠೆಯನ್ನು ಕ್ರಿಕೆಟ್ ಜಗತ್ತು ಕೊಂಡಾಡುತ್ತಿದೆ. ಅಫ್ಘಾನಿಸ್ತಾನ ಕ್ರಿಕೆಟ್ ಇಂದು ಜಾಗತಿಕ ಮಟ್ಟದಲ್ಲಿ ಬೆಳೆದು ನಿಲ್ಲಲು ರಶೀದ್ ಖಾನ್ ಅವರ ಶ್ರಮ ಮತ್ತು ದೇಶಾಭಿಮಾನವೇ ಪ್ರಮುಖ ಕಾರಣ,(ಏಜೆನ್ಸೀಸ್​).