ಇರೋದೊಂದೇ ಹೃದಯ ಎಷ್ಟು ಬಾರಿ ಗೆಲ್ತೀರಾ ಕೊಹ್ಲಿ: ಗೌತಿ ಎದುರು ವಿರಾಟ್​ ವರ್ತಿಸಿದ ರೀತಿಗೆ ಬಹುಪರಾಕ್​! Virat Kohli

ನವದೆಹಲಿ : ಆತಿಥೇಯ ಭಾರತ ಮತ್ತು ಪ್ರವಾಸಿ ನ್ಯೂಜಿಲೆಂಡ್ ನಡುವೆ ನಡೆದ ಮೂರು ಪಂದ್ಯಗಳ ಏಕದಿನ ಸರಣಿಯನ್ನು ಕಿವೀಸ್​ ಪಡೆ 2-1 ಅಂತರದಲ್ಲಿ ಗೆದ್ದು ಬೀಗಿದೆ. ಮೊದಲ ಪಂದ್ಯವನ್ನು ಗೆದ್ದ ಭಾರತ, ಎರಡು ಮತ್ತು ಮೂರನೇ ಏಕದಿನ ಪಂದ್ಯಗಳಲ್ಲಿ ಸತತ ಸೋಲು ಅನುಭವಿಸುವ ಮೂಲಕ ಏಕದಿನ ಸರಣಿಯನ್ನು ಕೈಚೆಲ್ಲಿತು. ಈ ಸೋಲಿನ ಬೆನ್ನಲ್ಲೇ, ಟೀಮ್​ ಇಂಡಿಯಾದ ಪ್ರದರ್ಶನದ ಬಗ್ಗೆ ಸಾಕಷ್ಟು ಟೀಕೆಗಳು ವ್ಯಕ್ತವಾಗುತ್ತಿವೆ. ಆದಾಗ್ಯೂ, ಮೂರು ಪಂದ್ಯಗಳ ಸರಣಿಯಲ್ಲಿ ಮೊದಲ ಪಂದ್ಯದಲ್ಲಿ 93, ಎರಡನೇ ಪಂದ್ಯದಲ್ಲಿ 23 ಮತ್ತು ಕೊನೆಯ ಪಂದ್ಯದಲ್ಲಿ 124 ರನ್ ಗಳಿಸಿದ ವಿರಾಟ್ ಕೊಹ್ಲಿ ( Virat Kohli ), ಸ್ವಲ್ಪ ಮಟ್ಟಿಗೆ ಟೀಕೆಗಳಿಂದ ಪಾರಾಗಿದ್ದಾರೆ.

ಇನ್ನು ಈ ಸರಣಿ ಸೋಲು ಟೀಮ್​ ಇಂಡಿಯಾದ ಮುಖ್ಯ ಕೋಚ್ ಗೌತಮ್ ಗಂಭೀರ್ ಮೇಲಿನ ಒತ್ತಡವನ್ನು ಮತ್ತಷ್ಟು ಹೆಚ್ಚಿಸಿದೆ. ಗಂಭೀರ್​ ಅವಧಿಯಲ್ಲಿ ತವರಿನಲ್ಲಿ ಎದುರಾದ ಮತ್ತೊಂದು ಸರಣಿ ಸೋಲು, ಅಭಿಮಾನಿಗಳ ಕೋಪಕ್ಕೆ ಕಾರಣವಾಗಿದೆ. ಈ ಕೋಪವನ್ನು ಗಂಭೀರ್​ ಮುಂದೆಯೇ ಅಭಿಮಾನಿಗಳು ವ್ಯಕ್ತಪಡಿಸಿದ್ದಾರೆ. ಮೂರನೇ ಏಕದಿನ ಪಂದ್ಯದ ನಂತರ ಇಂದೋರ್‌ನ ಹೋಳ್ಕರ್ ಕ್ರೀಡಾಂಗಣದಲ್ಲಿ ಟ್ರೋಫಿ ಹಸ್ತಾಂತರ ಕಾರ್ಯಕ್ರಮ ನಡೆಯಿತು. ಈ ವೇಳೆ ಕ್ರೀಡಾಂಗಣದಲ್ಲಿದ್ದ ಕೆಲವು ಅಭಿಮಾನಿಗಳು "ಗಂಭೀರ್ ಹಾಯೆ ಹಾಯೆ" ಎಂದು ಘೋಷಣೆ ಕೂಗಿದರು. ಈ ಮೂಲಕ ಗಂಭೀರ್​ ಅವರನ್ನು ಅವಮಾನಿಸಿದರು.

ಇದೇ ವೇಳೆ ಗಂಭೀರ್​ ಅವರ ಪಕ್ಕದಲ್ಲೇ ವಿರಾಟ್ ಕೊಹ್ಲಿ, ಶ್ರೇಯಸ್ ಅಯ್ಯರ್, ಕೆ.ಎಲ್. ರಾಹುಲ್, ನಿತೀಶ್ ಕುಮಾರ್ ರೆಡ್ಡಿ, ಹರ್ಷಿತ್ ರಾಣಾ, ರವೀಂದ್ರ ಜಡೇಜಾ ಮತ್ತು ಬ್ಯಾಟಿಂಗ್ ಕೋಚ್ ಸೀತಾಂಶು ಕೋಟಕ್ ಕೂಡ ಇದ್ದರು. ಅಭಿಮಾನಿಗಳು ಕೂಗುವುದನ್ನು ಕೇಳಿ ಎಲ್ಲರು ಆಶ್ಚರ್ಯ ವ್ಯಕ್ತಪಡಿಸಿದರು. ಇದಕ್ಕೆ ಸಂಬಂಧಿಸಿದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಇನ್ನು ಗಂಭೀರ್​ ಅವರನ್ನು ಟೀಕಿಸುವಾಗ ಕೊಹ್ಲಿ ಅವರು ಕ್ರೀಡಾಂಗಣದತ್ತ ನೋಡಿ, ಅಭಿಮಾನಿಗಳನ್ನು ಸುಮ್ಮನಿರುವಂತೆ ಕೈ ಸನ್ನೆ ಮಾಡುತ್ತಾರೆ. ಇದನ್ನು ನೋಡಿದ ಕೊಹ್ಲಿ ಅಭಿಮಾನಿಗಳು, ನಮ್ಮ ಬಳಿ ಇರೋದು ಒಂದೇ ಹೃದಯ ಅದನ್ನು ಎಷ್ಟು ಸಾರಿ ಅಂತ ಗೆಲ್ತೀರಾ ಎಂದು ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ.

ಅಂದಹಾಗೆ, ಗಂಭೀರ್​ ಮೇಲಿನ ಟೀಕೆ ಕೇವಲ ಕ್ರೀಡಾಂಗಣಕ್ಕೆ ಮಾತ್ರ ಸೀಮಿತವಾಗಲಿಲ್ಲ. ಸಾಮಾಜಿಕ ಜಾಲತಾಣದಲ್ಲಿಯೂ ಗಂಭೀರ್ ಅವರನ್ನು ನೆಟ್ಟಿಗರು ತೀವ್ರವಾಗಿ ಟೀಕಿಸುತ್ತಿದ್ದಾರೆ. ಇತ್ತೀಚಿನ ದಿನಗಳಲ್ಲಿ ಟೀಮ್​ ಇಂಡಿಯಾದ ಕಳಪೆ ಪ್ರದರ್ಶನ ಮತ್ತು ಮಾಜಿ ನಾಯಕರಾದ ರೋಹಿತ್ ಶರ್ಮ ಮತ್ತು ವಿರಾಟ್ ಕೊಹ್ಲಿ ಅವರನ್ನು ಗಂಭೀರ್ ನಡೆಸಿಕೊಂಡ ರೀತಿಯ ಬಗ್ಗೆ ಅಭಿಮಾನಿಗಳು ಅತೃಪ್ತಿ ವ್ಯಕ್ತಪಡಿಸುತ್ತಿದ್ದಾರೆ.

ಈ ಸರಣಿ ಗೆಲುವಿನೊಂದಿಗೆ, ನ್ಯೂಜಿಲೆಂಡ್ 37 ವರ್ಷಗಳ ನಂತರ ಭಾರತದಲ್ಲಿ ಏಕದಿನ ಸರಣಿಯನ್ನು ಗೆದ್ದಿದೆ. ಇದಲ್ಲದೆ, ಕಳೆದ ವರ್ಷ ಟೆಸ್ಟ್ ಸರಣಿಯಲ್ಲಿ ಟೀಮ್ ಇಂಡಿಯಾವನ್ನು 3-0 ಅಂತರದಿಂದ ಕಿವೀಸ್​ ಪಡೆ ವೈಟ್‌ವಾಶ್ ಮಾಡಿತ್ತು. ಇದನ್ನು ನೋಡಿದರೆ, ಭಾರತದ ಮೇಲೆ ನ್ಯೂಜಿಲೆಂಡ್​ ತಂಡ ತಮ್ಮ ಪ್ರಾಬಲ್ಯವನ್ನು ಸ್ಪಷ್ಟವಾಗಿ ಪ್ರದರ್ಶಿಸಿದೆ. 2027ರ ಏಕದಿನ ವಿಶ್ವಕಪ್ ಇನ್ನೂ ಒಂದು ವರ್ಷಕ್ಕಿಂತ ಹೆಚ್ಚು ಸಮಯವಿದ್ದರೂ, ಭಾರತ ತಂಡ ಪ್ರಸ್ತುತ ಸರಿಯಾದ ದಿಕ್ಕಿನಲ್ಲಿ ಸಾಗುತ್ತಿಲ್ಲ ಎಂಬ ಬಲವಾದ ಭಾವನೆ ಅಭಿಮಾನಿಗಳಲ್ಲಿ ಇದೆ. ತಂಡದ ಸಮತೋಲನ, ನಾಯಕತ್ವ, ತರಬೇತಿಯ ನೀತಿಗಳು ಮತ್ತು ಆಯ್ಕೆಯ ನೀತಿಗಳ ಸಮಗ್ರ ಪರಿಶೀಲನೆಗೆ ಅಭಿಮಾನಿಗಳು ಬೇಡಿಕೆ ಇಟ್ಟಿದ್ದಾರೆ, (ಏಜೆನ್ಸೀಸ್​).