ಆ ಕಷ್ಟ ಧೋನಿಗೆ ಬೇಡ! ಐಪಿಎಲ್​ ಶುರುವಿಗೂ ಮುನ್ನ ಸಿಎಸ್​​ಕೆ ತಂಡಕ್ಕೆ ಮಿ.360 ಕಿವಿಮಾತು | MS Dhoni

ನವದೆಹಲಿ: ಇತ್ತೀಚೆಗಷ್ಟೇ ನ್ಯೂಜಿಲೆಂಡ್​ ವಿರುದ್ಧ ಭಾರತ ಟಿ20 ವಿಶ್ವಕಪ್ ಗೆದ್ದು ಇತಿಹಾಸ ನಿರ್ಮಿಸಿತು. ಪ್ರಸ್ತುತ, ಟಿ20 ವಿಶ್ವಕಪ್ ಟೂರ್ನಿ ಮುಕ್ತಾಯಗೊಂಡಿದ್ದು, ಕ್ರಿಕೆಟ್​ ಪ್ರಿಯರ ಕಣ್ಣು ಐಪಿಎಲ್​ ಮೇಲೆ ಬಿದ್ದಿದೆ. 10 ತಂಡಗಳ ಹಣಾಹಣಿಯನ್ನು ಕಣ್ತುಂಬಿಕೊಳ್ಳಲು ಅಭಿಮಾನಿಗಳು ಸದ್ಯ ತೀವ್ರ ಕಾತರ ವ್ಯಕ್ತಪಡಿಸಿದ್ದಾರೆ. ಈ ಟಿ20 ಲೀಗ್​ ಇನ್ನೂ ಒಂದೆರೆಡು ತಿಂಗಳ ಕಾಲ ಕ್ರಿಕೆಟ್​ ಪ್ರಿಯರಿಗಂತು ಭರಪೂರ ಮನರಂಜನೆ ನೀಡಲಿದೆ (MS Dhoni).

ಇದೇ ಮಾ.28ರಿಂದ ಐಪಿಎಲ್​ 19ನೇ ಆವೃತ್ತಿ ಆರಂಭವಾಗಲಿದ್ದು, ಕಿಕ್​ಸ್ಟಾರ್ಟ್​ ಪಂದ್ಯದಲ್ಲಿ ಕಳೆದ ಬಾರಿ ಚೊಚ್ಚಲ ಟ್ರೋಫಿಗೆ ಮುತ್ತಿಟ್ಟ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮತ್ತು ಸನ್​ರೈರ್ಸ್​ ಹೈದರಾಬಾದ್ ತಂಡಗಳು ಮುಖಾಮುಖಿ ಆಗಲಿವೆ. ಐಪಿಎಲ್​ ಎಂದರೆ, ಬಹುತೇಕ ಕ್ರಿಕೆಟ್​ ಪ್ರಿಯರು ಹುಚ್ಚೆದ್ದು ಕುಣಿಯುವುದು ಹಾಗೂ ಕುತೂಹಲದಿಂದ ಕಾಯುವುದೇ ಮೂವರು ದಿಗ್ಗಜರನ್ನು ನೋಡಲು. ಅದು ಮಹೇಂದ್ರ ಸಿಂಗ್ ಧೋನಿ, ರೋಹಿತ್ ಶರ್ಮ ಮತ್ತು ವಿರಾಟ್​ ಕೊಹ್ಲಿ.

ಈ ಮೂವರ ಪೈಕಿ ಎಲ್ಲರ ಅಚ್ಚುಮೆಚ್ಚು 'ಕ್ಯಾಪ್ಟನ್ ಕೂಲ್'​, ಚೆನ್ನೈ ಸೂಪರ್​ ಕಿಂಗ್ಸ್​ನ ರೂವಾರಿ ಎಂ.ಎಸ್​. ಧೋನಿ. 2008ರಿಂದ ಸಿಎಸ್​ಕೆ ತಂಡವನ್ನು ಪ್ರತಿನಿಧಿಸುತ್ತ ಬಂದಿರುವ ಮಾಹಿ, ಕಳೆದ ಎರಡು ವರ್ಷಗಳಿಂದ ನಾಯಕತ್ವ ಬಿಟ್ಟು ತಂಡದಲ್ಲಿ ಕೇವಲ ಒಬ್ಬ ಆಟಗಾರನಾಗಿ, ರುತುರಾಜ್ ಗಾಯಕ್ವಾಡ್​ ಅವರ ಕ್ಯಾಪ್ಟನ್ಸಿಯಲ್ಲಿ ಆಡುತ್ತಿರುವುದು ನಿಜಕ್ಕೂ ಮೆಚ್ಚುವಂತದ್ದು. 44ನೇ ವಯಸ್ಸಿನಲ್ಲಿ ತಂಡದ ಪರ ಮೈದಾನಕ್ಕಿಳಿಯಲು ದಿಗ್ಗಜನಿಗೆ ಆರ್​ಸಿಬಿಯ ಮಾಜಿ ಕ್ರಿಕೆಟಿಗ ಎಬಿ ಡಿವಿಲಿಯರ್ಸ್​ ಒಂದೊಳ್ಳೆ ಸಲಹೆ ನೀಡಿದ್ದಾರೆ.

ಎಂಎಸ್ ಬ್ಯಾಟಿಂಗ್​ ವಿಷಯದಲ್ಲಿ 8 ಅಥವಾ 9ನೇ ಕ್ರಮಾಂಕದಲ್ಲಿ ತಂಡದ ಪರ ಕ್ರೀಸ್​ಗೆ ಇಳಿಯುವುದು ಬೇಡ. ತಮ್ಮ ಸ್ಥಾನವನ್ನು ತುಂಬಲು ಅವರು ಒತ್ತಡದಲ್ಲಿ ಸಿಲುಕುವುದು ಅವಶ್ಯಕತೆಯಿಲ್ಲ. ಅಷ್ಟಕ್ಕೂ, ಧೋನಿ ಆಡಬೇಕಿರುವ ಕ್ರಮಾಂಕ ಕೂಡ ಅದಲ್ಲ. ಮಾಹಿ ಕನಿಷ್ಠ 5-6 ಸ್ಥಾನದಲ್ಲಿ ಬಂದು ಬ್ಯಾಟಿಂಗ್ ಮಾಡಿದರೆ ಉತ್ತಮ. ವೈಯಕ್ತಿಕವಾಗಿ ನಾನು ಅವರನ್ನು 4ನೇ ಕ್ರಮಾಂಕದಲ್ಲಿ ನೋಡಲು ಬಯಸುತ್ತೇನೆ ಎಂದಿದ್ದಾರೆ,(ಏಜೆನ್ಸೀಸ್).