ಆ ನೋವಿನಿಂದ ಅಲ್ಲೇ ಬಿದ್ದು ಸಾಯಲಿ! ಮಾಜಿ ಸಿಎಸ್​ಕೆ ಕ್ರಿಕೆಟಿಗನಿಂದ ಇದೆಂಥಾ ಮಾತು; RCB ಫ್ಯಾನ್ಸ್​ ಛೀಮಾರಿ

Krunal Pandya: ನಿನ್ನೆ ರಾಯ್ಪುರದ ಅತಿದೊಡ್ಡ ಕ್ರೀಡಾಂಗಣದಲ್ಲಿ ನಡೆದ 19ನೇ ಆವೃತ್ತಿಯ ಐಪಿಎಲ್​ ಪಂದ್ಯದಲ್ಲಿ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ಭರ್ಜರಿ ಗೆಲುವು ದಾಖಲಿಸಿತು. ಕೊನೆಯ ಬಾಲ್​ವರೆಗೂ ತಲುಪಿದ ಪಂದ್ಯದಲ್ಲಿ ರೋಚಕ ಜಯ ಸಾಧಿಸಿದ ರಜತ್ ಪಾಟಿದಾರ್​ ಪಡೆ ಅಂಕಪಟ್ಟಿಯಲ್ಲಿ ಅಗ್ರ ಸ್ಥಾನಕ್ಕೇರುವುದರ ಜೊತೆಗೆ ಮುಂಬೈ ಇಂಡಿಯನ್ಸ್ ತಂಡವನ್ನು ಲೀಗ್​ನಿಂದ ಹೊರನೂಕಿತು. ತಂಡದ ಪರ ಏಕಾಂಗಿ ಹೋರಾಟ ನಡೆಸಿದ ಕೃನಾಲ್​ ಪಾಂಡ್ಯ ಬಗ್ಗೆ ಲೈವ್​ನಲ್ಲಿ ಮಾಜಿ ಸಿಎಸ್​ಕೆ ಆಟಗಾರ ಆಡಿದ ಮಾತು ಸದ್ಯ ಆರ್​ಸಿಬಿ ಅಭಿಮಾನಿಗಳ ಪಿತ್ತವನ್ನು ನೆತ್ತಿಗೇರಿಸಿದೆ.

73 ರನ್​ಗಳನ್ನು ಬಾರಿಸಿದ ಕೃನಾಲ್​ ಪಾಂಡ್ಯ, ಆರ್​ಸಿಬಿ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು. ಏಕಾಂಗಿ ಹೋರಾಟದ ಮಧ್ಯೆ ಓಡಲಾಗದೆ, ಕೆಲ ಸಮಯ ಮೈದಾನದಲ್ಲಿ ವಿಶ್ರಾಂತಿ ಪಡೆದ ಕೃನಾಲ್​, ವಿಪರೀತ ನೋವಿನಿಂದ ನೆಲದ ಮೇಲೆಯೇ ಕಾಲು ಚಾಚಿ ಮಲಗಿದ್ದರು. ಈ ವೇಳೆ, ಮುಂಬೈ ಇಂಡಿಯನ್ಸ್ ಕೀಪರ್​-ಬ್ಯಾಟರ್​ ರಿಕಲ್ಟನ್​ ಕೃನಾಲ್​ ನೋವಿಗೆ ಸ್ಪಂದಿಸಿದಾಗ ತಮಿಳಿನಲ್ಲಿ ಲೈವ್​ ಕಾಮೆಂಟ್ರಿ ಮಾಡುತ್ತಿದ್ದ ಮಾಜಿ ಸಿಎಸ್​ಕೆ ಆಟಗಾರ ಸುಬ್ರಮಣಿಯಂ ಬದ್ರಿನಾಥ್​, ಆತನಿಗೆ ಮೊದಲೇ ನೋವಿತ್ತು. ನಾನೇನಾದರೂ ಆಗಿದ್ದಿದ್ರೆ, ಆ ನೋವಿನಿಂದಲೇ ಸಾಯಲಿ ಬಿಡು ಎನ್ನುತ್ತಿದ್ದೆ. ಪರವಾಗಿಲ್ಲ, ರಿಕಲ್ಟನ್ ಅವರಿಗೆ ಸಹಾಯ ಮಾಡಿದರು ಎಂದು ನಗುತ್ತಲೇ ಹೇಳಿದರು.

ಒಬ್ಬ ಕಮೆಂಟೇಟರ್​ ಆಗಿ ಬದ್ರಿನಾಥ್ ಆಡಿದ ಮಾತುಗಳು ಆ ಕ್ಷಣಕ್ಕೆ ಅವರಿಗೆ ಹಾಸ್ಯಸ್ಪದ ಅನಿಸಿದ್ದೇ ಆದರೂ ಅಪಾರ ಸಂಖ್ಯೆಯ ಕ್ರಿಕೆಟ್​ ಅಭಿಮಾನಿಗಳಿಗೆ ಇದು ತೀರ ವ್ಯಂಗ್ಯ ಅನಿಸಿದೆ. ಜೊತೆಗೆ ಅವರಿಗೆ ನೋವುಂಟು ಮಾಡಿದೆ. ಹಿರಿಯ ಕ್ರಿಕೆಟಿಗನಾಗಿ ಜವಾಬ್ದಾರಿಯಿಂದ ಮಾತನಾಡಬೇಕಿದ್ದ ಸುಬ್ರಮಣಿಯಂ ಸದ್ಯ ಆರ್​ಸಿಬಿ ಫ್ಯಾನ್ಸ್​ಗಳ ಸಾಲು ಸಾಲು ಛೀಮಾರಿಗೆ ಗುರಿಯಾಗಿದ್ದಾರೆ. ಕೆಲವರಂತು, ಕಡೆಗೂ ನಿಮ್ಮ ಸಿಎಸ್​ಕೆ ಬುದ್ಧಿಯನ್ನು ತೋರಿಸಿಬಿಟ್ಟಿರಲ್ಲ ಎಂದೆಲ್ಲ ಬೇಸರದಿಂದ ಕಮೆಂಟ್​ ಮಾಡುತ್ತಿದ್ದಾರೆ.