ನಾನಿರೋದೇ ಹೀಗೆ... ಹ್ಯಾಟ್ರಿಕ್​ ಡಕ್​ ಟೀಕೆಗಳಿಗೆ ಸಿಡಿದೆದ್ದ ಅಭಿಷೇಕ್ ಶರ್ಮ! ಮುಟ್ಟಿ ನೋಡಿಕೊಳ್ಳುವಂತೆ ಉತ್ತರ

ಮುಂಬೈ: ಪ್ರಸ್ತುತ ನಡೆಯುತ್ತಿರುವ ಟಿ20 ವಿಶ್ವಕಪ್‌ ಟೂರ್ನಿಯಲ್ಲಿ ಟೀಮ್ ಇಂಡಿಯಾ ಆಡಿದ ನಾಲ್ಕು ಪಂದ್ಯಗಳಲ್ಲಿ 4 ಗೆದ್ದು ಇದೀಗ ಸೂಪರ್​ 8 ಹಂತಕ್ಕೆ ಪ್ರವೇಶ ಪಡೆದಿದೆ. ಈಗಾಗಲೇ ಸೂಪರ್​ 8 ಹಂತಕ್ಕೆ ನೇರ ಪ್ರವೇಶ ಪಡೆದಿರುವ ಸೂರ್ಯಕುಮಾರ್ ಯಾದವ್ ಪಡೆಗೆ ಕಾಡುತ್ತಿರುವ ಚಿಂತೆಯೇ ಅಭಿಷೇಕ್ ಶರ್ಮ. ಇದು ಕೇವಲ ತಂಡಕ್ಕೆ ಮಾತ್ರವಲ್ಲ, ಅಪಾರ ಸಂಖ್ಯೆಯ ಕ್ರಿಕೆಟ್​ ಅಭಿಮಾನಿಗಳಿಗೂ ಕೂಡ. ಮುಂದಿನ ಪಂದ್ಯದಲ್ಲಿ ಅವರನ್ನು ಆಡಿಸುತ್ತಾರೋ ಅಥವಾ ಪೆವಿಲಿಯನ್​ನಲ್ಲಿ ಕೂರಿಸುತ್ತಾರೋ ಎಂಬ ಪ್ರಶ್ನೆಗಳು ಮೂಡಿವೆ. ಈ ಮಧ್ಯೆ, ತಮ್ಮ​ ಸರಣಿ ಡಕ್​ಔಟ್​ ಕುರಿತು ಹರಿದುಬಂದ ಟೀಕೆಗಳ ಬಗ್ಗೆ ಕಡೆಗೂ ಅಭಿಷೇಕ್ ಮೌನ ಮುರಿದಿದ್ದಾರೆ.

ತಂಡದ ಪರ ಸ್ಫೋಟಕ ಇನ್ನಿಂಗ್ಸ್ ಆಡುವ ಅಭಿಷೇಕ್ ಶರ್ಮ ಟಿ20 ವಿಶ್ವಕಪ್​ನಲ್ಲಿ ಮಾತ್ರ ಡಕ್​ಔಟ್​ ಆಗುತ್ತಿರುವುದು ಈಗ ಕ್ರಿಕೆಟ್​ ಪ್ರಿಯರನ್ನು ಕೆರಳಿಸಿದೆ. ಉತ್ತಮ ಆರಂಭಿಕ ಬ್ಯಾಟರ್​ ಆಗಿ ಗುರುತಿಸಿಕೊಂಡಿರುವ ಅಭಿಷೇಕ್​, ಅದ್ಯಾಕೋ ಒಂದೇ ಒಂದು ರನ್​ ಕಲೆಹಾಕಲು ತೀರ ಪರದಾಡುವ ಪರಿಸ್ಥಿತಿ ತಲುಪಿದ್ದಾರೆ. ಯುಎಸ್​ಎ, ಪಾಕಿಸ್ತಾನ ಮತ್ತು ನೆದರ್​ಲ್ಯಾಂಡ್ಸ್​ ವಿರುದ್ಧದ ಪಂದ್ಯಗಳಲ್ಲಿ ಅಭಿಷೇಕ್​ ಶೂನ್ಯಕ್ಕೆ ಔಟ್​ ಆಗಿರುವುದು ಸದ್ಯ ಕ್ರಿಕೆಟ್​ ಪ್ರಿಯರ ಟೀಕೆಗಳಿಗೆ ಮಾತ್ರವಲ್ಲ, ಪಾಕಿಸ್ತಾನದ ಆಟಗಾರ ಮೊಹಮ್ಮದ್​ ಅಮೀರ್​ ಸೊಕ್ಕಿನ ಮಾತಿಗೂ ಕಾರಣವಾಯಿತು.

ಭಾನುವಾರ (ಫೆ.22) ದಕ್ಷಿಣ ಆಫ್ರಿಕಾ ವಿರುದ್ಧ ಟೀಮ್ ಇಂಡಿಯಾ ತನ್ನ ಮೊದಲ ಸೂಪರ್ 8 ಹಂತದ ಪಂದ್ಯವನ್ನಾಡಲಿದೆ. ಇದರ ಬೆನ್ನಲ್ಲೇ ಮೈದಾನದಲ್ಲಿ ಅಭ್ಯಾಸ ನಡೆಸುತ್ತಿರುವ ಅಭಿಷೇಕ್, ನನ್ನ ಆಟದ ಶೈಲಿಯಲ್ಲಿ ಯಾವುದೇ ಬದಲಾವಣೆ ಇರೋದಿಲ್ಲ ಎಂದು ತಮ್ಮ ಪ್ರದರ್ಶನಕ್ಕೆ ವ್ಯಕ್ತವಾದ ಟೀಕೆಗಳಿಗೆ ಖಡಕ್ ಉತ್ತರವನ್ನೇ ನೀಡಿದ್ದಾರೆ. “ನಾನು ಯಾವಾಗಲೂ ನನ್ನ ಬ್ಯಾಟಿಂಗ್ ಅನ್ನು ಎಂಜಾಯ್​ ಮಾಡ್ತೇನೆ. ಎರಡು ವರ್ಷಗಳ ಹಿಂದೆಯೇ ಒತ್ತಡ ಹೇರಿಕೊಳ್ಳುವುದನ್ನು ಬಿಟ್ಟಿದ್ದೇನೆ. ಯಾಕೆಂದರೆ, ಪ್ರಕ್ರಿಯೆ ಮಾತ್ರ ನನ್ನ ಕೈಯಲ್ಲಿದೆ. ಅದು ಅಭ್ಯಾಸ ಪಂದ್ಯಗಳಲ್ಲಿಯೇ ಇರಲಿ ಅಥವಾ ಟ್ರೇನಿಂಗ್​ ಇರಲಿ ಎಂದಿದ್ದಾರೆ.

ನನ್ನ ಪ್ರಕ್ರಿಯೆ ಮತ್ತು ಮನಸ್ಥಿತಿಯನ್ನು ಯಾವುದೇ ಕಾರಣಕ್ಕೂ ಬದಲಾಯಿಸುವುದಿಲ್ಲ. ಒಬ್ಬ ಬ್ಯಾಟ್ಸ್‌ಮನ್ ಕರಿಯರ್​ನಲ್ಲಿ ಏರಿಳಿತಗಳು ಸಹಜ. ಕೆಲವೊಮ್ಮೆ ನಾವು ಚೆನ್ನಾಗಿ ಸ್ಕೋರ್ ಮಾಡುತ್ತೇವೆ. ಅದೇ ಕೆಲವೊಮ್ಮೆ ಮಾಡೋದಿಲ್ಲ. ಹೀಗೆ ಆಡಬೇಕು ಎಂಬ ಉದ್ದೇಶದಿಂದ ಮೈದಾನಕ್ಕೆ ಇಳಿದಿರುತ್ತೇನೆ. ಆದರೆ, ಇದು ಎಲ್ಲಾ ಸಂದರ್ಭಗಳಲ್ಲಿಯೂ ನನಗೆ ಪಾಸಿಟಿವ್​ ಫಲಿತಾಂಶ ಕೊಡದಿರಬಹುದು. ಈ ನಿಟ್ಟಿನಲ್ಲಿ, ನಾನು ಯಾವುದೇ ಸಂದರ್ಭದಲ್ಲೂ ನನ್ನ ಉದ್ದೇಶ ಅಥವಾ ಪ್ರಕ್ರಿಯೆಯನ್ನು ಬದಲಾಯಿಸುವುದಿಲ್ಲ" ಎಂದು ಹೇಳಿರುವ ವಿಡಿಯೋ ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದೆ,(ಏಜೆನ್ಸೀಸ್).