ಎಫ್​ಐಎಚ್​ ಹಾಕಿ ವಿಶ್ವಕಪ್: ಭಾರತದ ಪ್ರಶಸ್ತಿ ಕನಸು ಭಗ್ನ?

ಆಮ್‌ಸ್ಟೆಲ್ವೀನ್ (ನೆದರ್ಲ್ಯಾಂಡ್ಸ್): ಐವತ್ತು ವರ್ಷಗಳ ಪ್ರಶಸ್ತಿ ಬರ ನೀಗಿಸುವ ಹಂಬಲದಲ್ಲಿದ್ದ ಭಾರತ ಪುರುಷರ ತಂಡ ಎಫ್​ಐಎಚ್​ ಹಾಕಿ ವಿಶ್ವಕಪ್‌ನ (

FIH Men's Hockey World Cup)

ಎರಡನೇ ಸುತ್ತಿನ ಮೊದಲ ಪಂದ್ಯದಲ್ಲಿ ಒಲಿಂಪಿಕ್ಸ್ ಹಾಲಿ ಚಾಂಪಿಯನ್ ನೆದರ್ಲ್ಯಾಂಡ್ಸ್ ವಿರುದ್ಧ 1-3 ಅಂತರದಿಂದ ಮುಗ್ಗರಿಸಿತು. ಇದರೊಂದಿಗೆ ಹರ್ಮಾನ್‌ಪ್ರೀತ್ ಸಿಂಗ್ ಪಡೆ ಸೆಮಿಫೈನಲ್ ಪ್ರವೇಶಿಸುವ ಹಾದಿ ಕಠಿಣಗೊಂಡಿದ್ದು, ಗುಂಪಿನ ಇನ್ನೊಂದು ಪಂದ್ಯದಲ್ಲಿ ಅರ್ಜೆಂಟೀನಾ ಎದುರು ಇಂಗ್ಲೆಂಡ್ ಗೆಲುವು ಒಲಿಸಿಕೊಂಡರೆ, ಭಾರತ ಅಧಿಕೃತವಾಗಿ ಪ್ರಶಸ್ತಿ ರೇಸ್‌ನಿಂದ ಹೊರಗುಳಿಯಲಿದೆ.

ಆತಿಥೇಯ ನೆದರ್ಲ್ಯಾಂಡ್ಸ್ ತಂಡ ಇ ಗುಂಪಿನಿಂದ ಮೊದಲ ತಂಡವಾಗಿ ಸೆಮಿಫೈನಲ್ ಸ್ಥಾನ ಖಾತ್ರಿಪಡಿಸಿಕೊಂಡಿದೆ.

ವ್ಯಾಗನರ್ ಕ್ರೀಡಾಂಗಣದಲ್ಲಿ ಶನಿವಾರ ನಡೆದ ಪಂದ್ಯದಲ್ಲಿ ನೆದರ್ಲ್ಯಾಂಡ್ಸ್ ಪರ ಡ್ಯುಕೊ ಟೆಲ್‌ಗೆಕಾಂಪ್ (44ನೇ ನಿಮಿಷ), ಟೆಜೆಪ್ ಹೊಡೆಮೇಕರ್ಸ್‌ (51) ಹಾಗೂ ಥಿಜಿಸ್ ವಾನ್ ಡಮ್ (55) ತಲಾ ಒಂದು ಗೋಲು ಬಾರಿಸಿದರೆ, ಭಾರತ ಪರ ನಾಯಕ ಹರ್ಮಾನ್‌ಪ್ರೀತ್ ಸಿಂಗ್ (52) ಏಕೈಕ ಗೋಲುಗಳಿಸಿದರು. ಪಂದ್ಯದ ಮೊದಲಾರ್ಧದ ಗೋಲು ರಹಿತವಾಗಿ ಉಳಿದರೆ, ಹರ್ಮಾನ್‌ಪ್ರೀತ್ ಬೆನ್ನು ನೋವಿನ ಸಮಸ್ಯೆಯಿಂದ ಕೆಲ ಸಮಯ ಮೈದಾನದಾಚೆ ಉಳಿದಿದ್ದು ಭಾರತಕ್ಕೆ ಹಿನ್ನಡೆ ತಂದಿತು. ಪಂದ್ಯದಲ್ಲಿ ಸಿಕ್ಕ 8 ಪೆನಾಲ್ಟಿ ಕಾರ್ನರ್‌ನಲ್ಲಿ ಭಾರತ ಒಮ್ಮೆ ಮಾತ್ರ ಗೋಲುಗಳಿಸಲು ಸಾಧ್ಯವಾಯಿತು.

ದ್ರಾವಿಡ್, ಸ್ವೀವ್ ವಾ ಹಾಜರಿ

ಭಾರತ ಹಾಗೂ ನೆದರ್ಲ್ಯಾಂಡ್ಸ್ ನಡುವಿನ ಪಂದ್ಯದ ಪ್ರೇಕ್ಷಕರ ಸಾಲಿನಲ್ಲಿ ಕ್ರಿಕೆಟ್ ದಿಗ್ಗಜರಾದ ರಾಹುಲ್ ದ್ರಾವಿಡ್, ಸ್ಟೀವ್ ವಾ ಜತೆಗೆ ಬಾಲಿವುಡ್ ನಟ ಅಭಿಷೇಕ್ ಬಚ್ಚನ್ ಹಾಜರಿದ್ದರು. ಆ. 26ರಂದು ಆರಂಭವಾಗಲಿರುವ ಯುರೋಪಿಯನ್ ಟಿ20 ಪ್ರೀಮಿಯರ್ ಲೀಗ್‌ನ (ಇಟಿಪಿಎಲ್) ಪ್ರಚಾರ ಕಾರ್ಯಕ್ಕೆ ಅವರು ನೆದರ್ಲ್ಯಾಂಡ್ಸ್‌ಗೆ ತೆರಳಿದ್ದು, ಅಭಿಷೇಕ್ ಬಚ್ಚನ್ ಲೀಗ್‌ನ ಸಹ ಸಂಸ್ಥಾಪಕರಾಗಿದ್ದಾರೆ. ಕನ್ನಡಿಗ ರಾಹುಲ್ ದ್ರಾವಿಡ್ ಹಾಗೂ ಆಸ್ಟ್ರೇಲಿಯಾದ ಸ್ವೀವ್ ವಾ ಕ್ರಮವಾಗಿ ಡಬ್ಲಿನ್, ಆಮಸ್ಟರ್ ಡ್ಯಾಂ ಫ್ರಾಂಚೈಸಿಗಳ ಮಾಲೀಕತ್ವ ಹೊಂದಿದ್ದಾರೆ.