53 ವರ್ಷಗಳಿಂದ ಪದ್ಮಶ್ರೀಗಾಗಿ ಕಾಯುತ್ತಿರುವ ಮಾಜಿ ಕ್ರಿಕೆಟಿಗ ಫಾರೂಖ್​ ಇಂಜಿನಿಯರ್​!

ಫಾರೂಖ್​ ಇಂಜಿನಿಯರ್​ ಅವರಿಗೆ ಇನ್ನೂ ಸಕ್ರಿಯ ಕ್ರಿಕೆಟಿಗರಾಗಿರುವಾಗ 1973ರಲ್ಲೇ ಪದ್ಮಶ್ರೀ ಪ್ರಶಸ್ತಿ ಘೋಷಣೆಯಾಗಿತ್ತು. ಈ ಬಗ್ಗೆ ದಿನಪತ್ರಿಕೆಗಳಲ್ಲಿ ಪ್ರಕಟವಾದ ಸುದ್ದಿಯಿಂದ ಅವರಿಗೆ ತಿಳಿದಿತ್ತು. ಆದರೆ ನಂತರದ ದಿನಗಳಲ್ಲಿ ಸರ್ಕಾರದಿಂದ ಅವರಿಗೆ ಯಾವುದೇ ಅಧಿಕೃತ ಮಾಹಿತಿ ತಲುಪಲಿಲ್ಲ.

"ಪ್ರಶಸ್ತಿ ಘೋಷಣೆಯಾದ ಸಮಯದಲ್ಲಿ ನಾನು ಇಂಗ್ಲೆಂಡ್​ನಲ್ಲಿ ಆಡುತ್ತಿದ್ದೆ. ಈ ಬಗ್ಗೆ ಎಲ್ಲ ದಿನಪತ್ರಿಕೆಗಳಲ್ಲಿ ಸುದ್ದಿ ಪ್ರಕಟವಾಗಿರುವ ಬಗ್ಗೆ ನಮ್ಮ ತಂಡದ ಮ್ಯಾನೇಜರ್​ ಹೇಮು ಅಧಿಕಾರಿ ನನಗೆ ಮಾಹಿತಿ ನೀಡಿದ್ದರು. ಗೆಳೆಯರಿಂದ ಅಭಿನಂದನೆಯ ಸಂದೇಶಗಳ ಬಂದಿದ್ದವು. ಆಗ ವಿವಿ ಗಿರಿ ರಾಷ್ಟ್ರಪತಿಯಾಗಿದ್ದರು. ಆದರೆ ನನಗೆ ಬಳಿಕ ಸರ್ಕಾರದಿಂದ ಈ ಬಗ್ಗೆ ಯಾವುದೇ ಮಾಹಿತಿ ಅಥವಾ ಸಂವಹನ ಬರಲಿಲ್ಲ. ಅಲ್ಲಿಂದ ಇದುವರೆಗೂ ನಾನು ಆ ಪ್ರಶಸ್ತಿ ಸ್ವೀಕಾರಕ್ಕಾಗಿ ಕಾಯುತ್ತಲೇ ಇರುವೆ' ಎಂದು ಫಾರೂಖ್​ ತಿಳಿಸಿದ್ದಾರೆ.

"ಆ ದಿನಗಳಲ್ಲಿ ದಿನಪತ್ರಿಕೆಗಳೇ ಮಾಹಿತಿಯ ಪ್ರಮುಖ ಮೂಲವಾಗಿತ್ತು. ಕೇಂದ್ರ ಸರ್ಕಾರದಿಂದ ನನಗೆ ಯಾವುದೇ ಸೂಚನೆ ಬಂದಿಲ್ಲ ಎಂದು ಹೇಮುಗೆ ತಿಳಿಸಿದೆ. ಆಗ ಅವರು ಸರ್ಕಾರದಿಂದಲೇ ಅಧಿಕೃತ ಮಾಹಿತಿ ಬರಲಿದೆ ಎಂದಿದ್ದರು. ಆದರೆ ಇದುವರೆಗೂ ನನಗೆ ಯಾವುದೇ ಪತ್ರವೂ ಬಂದಿಲ್ಲ. ನನಗೆ ಯಾರಿಗೆ ತಿಳಿಸಬೇಕೆಂದೂ ಗೊತ್ತಾಗಲಿಲ್ಲ. ಹೀಗಾಗಿ ಹಲವಾರು ವರ್ಷಗಳ ಕಾಲ ಕಾಯುತ್ತಲೇ ಇದ್ದೆ. ಅರುಣ್​ ಜೇಟ್ಲಿ (ಮಾಜಿ ಕೇಂದ್ರ ಸಚಿವ, ಬಿಸಿಸಿಐ ಉಪಾಧ್ಯಕ್ಷ) ನಿಧನರಾಗುವ ಮುನ್ನ ಅವರಿಗೆ ಈ ಬಗ್ಗೆ ತಿಳಿಸಿದ್ದೆ. ಇತ್ತೀಚೆಗೆ ಐಸಿಸಿ ಅಧ್ಯಕ್ಷ ಜಯ್​ ಷಾ ಅವರಿಗೂ ತಿಳಿಸಿದ್ದೆ. ಅವರು ನನಗೆ ನೆರವಾಗುವ ಭರವಸೆ ನೀಡಿದ್ದಾರೆ. ಪ್ರಶಸ್ತಿ ಸಿಗದೆ 50ಕ್ಕಿಂತಲೂ ಹೆಚ್ಚು ವರ್ಷ ಕಳೆದಿದೆ. ಈಗ ಮತ್ತೊಮ್ಮೆ ಪ್ರಯತ್ನಿಸುತ್ತಿರುವೆ' ಎಂದು ಫಾರೂಖ್​ ವಿವರಿಸಿದ್ದಾರೆ.

1961ರಿಂದ 1975ರ ನಡುವೆ 46 ಟೆಸ್ಟ್​ಗಳಲ್ಲಿ 2 ಶತಕಗಳ ಸಹಿತ 2,611 ರನ್​, 5 ಏಕದಿನಗಳಲ್ಲಿ 114 ರನ್​ ಗಳಿಸಿರುವ ಫಾರೂಖ್, ಭಾರತ ಪರ ಆಡಿರುವ ಕೊನೇ ಪಾರ್ಸಿ ಸಮುದಾಯದ ಕ್ರಿಕೆಟಿಗರಾಗಿದ್ದಾರೆ. ಬಿಷನ್​ ಸಿಂಗ್​ ಬೇಡಿ, ಎರಾಪಳ್ಳಿ ಪ್ರಸನ್ನ, ಭಾಗ್ವತ್​ ಚಂದ್ರಶೇಖರ್​, ಎಸ್​. ವೆಂಕಟರಾವನ್​ರಂಥ ಸ್ಪಿನ್​ ದಿಗ್ಗಜರಿಗೆ ವಿಕೆಟ್​ ಕೀಪಿಂಗ್​ ಮಾಡುವಂಥ ಸವಾಲನ್ನು ಅವರು ಸಮರ್ಥವಾಗಿ ನಿಭಾಯಿಸಿದ್ದರು. ಫಾರೂಖ್​ ಕಳೆದ ಕೆಲ ವರ್ಷಗಳಿಂದ ಇಂಗ್ಲೆಂಡ್​ ನಿವಾಸಿಯಾಗಿದ್ದಾರೆ.

ಫಾರೂಖ್​ ಇಂಜಿನಿಯರ್​ಗೆ ಪದ್ಮಶ್ರೀ ಪ್ರಶಸ್ತಿ ಸ್ವೀಕರಿಸಲು ಬಿಸಿಸಿಐ ನೆರವು ನೀಡಲು ಮುಂದಾಗಿದೆ. ಈ ಸಂಬಂಧ ಕೇಂದ್ರ ಸರ್ಕಾರಕ್ಕೆ ಪತ್ರ ಬರೆಯಲು ಬಿಸಿಸಿಐ ಸಿದ್ಧವಾಗಿದೆ. "ರಾಷ್ಟ್ರಪತಿ ಭವನಕ್ಕೆ ತೆರಳಿ ಪದ್ಮಶ್ರೀ ಪ್ರಶಸ್ತಿ ಸ್ವೀಕರಿಸಲು ಇಷ್ಟಪಡುತ್ತಿರುವೆ. ಬಳಿಕ ಅದನ್ನು ಹೆಮ್ಮೆಯಿಂದ ಪ್ರದರ್ಶಿಸುವೆ' ಎಂದು ಫಾರೂಖ್​ ತಿಳಿಸಿದ್ದಾರೆ. ಅವರಿಗೆ 2024ರಲ್ಲಿ ಬಿಸಿಸಿಐನಿಂದ ಕರ್ನಲ್​ ಸಿಕೆ ನಾಯ್ಡು ಜೀವಮಾನ ಸಾಧನೆ ಪ್ರಶಸ್ತಿ ಲಭಿಸಿತ್ತು.