ಫೀಲ್ಡಿಂಗ್​ ಮಾಡುವಾಗ ಮೈದಾನಕ್ಕೆ ಪ್ಲ್ಯಾಸ್ಟಿಕ್​ ಬ್ಯಾಟ್​ ಎಸೆದ ಅಭಿಮಾನಿ: ಈ ವೇಳೆ ಕೊಹ್ಲಿ ಕೊಟ್ಟ ರಿಯಾಕ್ಷನ್​ ವೈರಲ್​! Virat Kohli

ನವದೆಹಲಿ: ಟೀಮ್​​ ಇಂಡಿಯಾದ ಸ್ಟಾರ್ ಬ್ಯಾಟರ್ ವಿರಾಟ್ ಕೊಹ್ಲಿ ( Virat Kohli ) ವಿಶ್ವಕಂಡ ಶ್ರೇಷ್ಠ ಆಟಗಾರ ಎನ್ನುವುದರಲ್ಲಿ ಎರಡು ಮಾತಿಲ್ಲ. ತಮ್ಮ ಅದ್ಭುತ ಆಟದಿಂದ ಕ್ರೀಡಾಭಿಮಾನಿಗಳ ಮನದಲ್ಲಿ ತಮ್ಮದೇಯಾದ ಸ್ಥಾನ ಗಿಟ್ಟಿಸಿದ್ದಾರೆ. ಆದರೆ, ವಿಶೇಷ ಸಂಗತಿ ಏನು ಗೊತ್ತಾ? ಕೊಹ್ಲಿಯ ಆಟ ಮಾತ್ರವಲ್ಲದೇ ಮೈದಾನದಲ್ಲಿನ ಅವರ ಪ್ರತಿನಡೆಯು ಕೂಡ ಎಲ್ಲರ ಗಮನ ಸೆಳೆಯುತ್ತದೆ. ಅದಕ್ಕೆ ತಾಜಾ ಉದಾಹರಣೆಯೇ ನಿನ್ನೆ (ನ.07) ನ್ಯೂಜಿಲೆಂಡ್​ ಪಂದ್ಯದ ವೇಳೆ ನಡೆದ ಘಟನೆ.

ನ್ಯೂಜಿಲೆಂಡ್ ವಿರುದ್ಧ ವೆಲ್ಲಿಂಗ್ಟನ್‌ನಲ್ಲಿ ನಡೆದ 2ನೇ ಏಕದಿನ ಪಂದ್ಯದ ವೇಳೆ ಮೈದಾನದಲ್ಲಿ ಪುಟ್ಟ ಅಭಿಮಾನಿಯೊಬ್ಬ ತೋರಿದ ವರ್ತನೆಗೆ ವಿರಾಟ್ ಕೊಹ್ಲಿ ಅಸಮಾಧಾನ ವ್ಯಕ್ತಪಡಿಸಿದ್ದು, ಈ ಘಟನೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿದೆ. ಪುಟ್ಟ ಅಭಿಮಾನಿಯ ನಡವಳಿಕೆಗೆ ಕೊಹ್ಲಿ ನೀಡಿದ ಪ್ರತಿಕ್ರಿಯೆ ಮತ್ತು ಅದೇ ಪಂದ್ಯದಲ್ಲಿ ಭಾರತ ಸಾಧಿಸಿದ ರೋಚಕ ಗೆಲುವು ಕ್ರೀಡಾಭಿಮಾನಿಗಳ ನಡುವೆ ದೊಡ್ಡ ಮಟ್ಟದ ಚರ್ಚೆಗೆ ಗ್ರಾಸವಾಗಿದೆ.

ಪಂದ್ಯದ ಸಮಯದಲ್ಲಿ ವಿರಾಟ್ ಕೊಹ್ಲಿ ಬೌಂಡರಿ ಗೆರೆಯ ಬಳಿ ಫೀಲ್ಡಿಂಗ್ ಮಾಡುತ್ತಿದ್ದಾಗ, ಪ್ರೇಕ್ಷಕರ ಗ್ಯಾಲರಿಯಲ್ಲಿದ್ದ ಪುಟ್ಟ ಅಭಿಮಾನಿಯೊಬ್ಬ ಆಟೋಗ್ರಾಫ್​ ಪಡೆಯಲು ಕೊಹ್ಲಿಯ ಗಮನ ಸೆಳೆಯುವ ಉದ್ದೇಶದಿಂದ ಮೈದಾನದ ಒಳಗಡೆ ಪ್ಲಾಸ್ಟಿಕ್ ಬ್ಯಾಟ್ ಒಂದನ್ನು ಎಸೆದನು. ಅಭಿಮಾನಿಯ ಈ ಅನಗತ್ಯ ವರ್ತನೆಯನ್ನು ಕಂಡು ವಿರಾಟ್ ಕೊಹ್ಲಿ ಬೇಸರಗೊಂಡರು. ತಕ್ಷಣವೇ ನೆಲದ ಮೇಲಿದ್ದ ಪ್ಲಾಸ್ಟಿಕ್ ಬ್ಯಾಟ್ ಅನ್ನು ಕೈಗೆತ್ತಿಕೊಂಡ ಕೊಹ್ಲಿ, ಅದನ್ನು ಮೈದಾನದಿಂದ ಆಚೆಗೆ ದೂರಕ್ಕೆ ಎಸೆದು ತಮ್ಮ ಅಸಮಾಧಾನವನ್ನು ಹೊರಹಾಕಿದರು.

ಬ್ಯಾಟ್ ಅನ್ನು ಮೈದಾನದಿಂದ ಹೊರಗೆ ಎಸೆದ ನಂತರವೂ ಕೊಹ್ಲಿ ಸುಮ್ಮನಾಗದೆ, ಪ್ರೇಕ್ಷಕರತ್ತ ಕಟ್ಟುನಿಟ್ಟಾಗಿ ಸನ್ನೆ ಮಾಡುತ್ತಾ ಕ್ರೀಡಾಂಗಣದಲ್ಲಿ ಇಂತಹ ನಡವಳಿಕೆಗಳು ಮತ್ತು ಅನುಚಿತ ವರ್ತನೆಗಳು ಯಾವುದೇ ಕಾರಣಕ್ಕೂ ಸ್ವೀಕಾರಾರ್ಹವಲ್ಲ ಎಂದು ಸೂಚಿಸಿದರು. ಕ್ರೀಡಾಪಟುಗಳ ಗಮನ ಭಂಗ ಮಾಡುವ ಇಂತಹ ಪ್ರೇಕ್ಷಕರ ಕಾರ್ಯಕ್ಕೆ ಕೊಹ್ಲಿ ನೀಡಿದ ನೇರ ಪ್ರತ್ಯುತ್ತರದ ದೃಶ್ಯಾವಳಿಗಳನ್ನು ಕ್ಯಾಮೆರಾಗಳು ಸೆರೆಹಿಡಿದಿದ್ದು, ಈ ಘಟನೆಯ ವಿಡಿಯೋಗಳು ಈಗ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿ ನೆಟ್ಟಿಗರ ಗಮನ ಸೆಳೆಯುತ್ತಿವೆ.

ಮತ್ತೊಂದೆಡೆ, ಮಳೆಯಿಂದಾಗಿ ಪದೇ ಪದೇ ಅಡಚಣೆ ಎದುರಿಸಿದ ಈ ಪಂದ್ಯದಲ್ಲಿ ಭಾರತ ತಂಡವು ನ್ಯೂಜಿಲೆಂಡ್ ವಿರುದ್ಧ 4 ವಿಕೆಟ್‌ಗಳ ರೋಚಕ ಜಯ ಸಾಧಿಸಿತು. ಭಾರತದ ಯುವ ವೇಗದ ಬೌಲರ್‌ಗಳ ಅತ್ಯುತ್ತಮ ಬೌಲಿಂಗ್ ದಾಳಿ ಹಾಗೂ ಮಧ್ಯಮ ಕ್ರಮಾಂಕದಲ್ಲಿ ಕೆ.ಎಲ್. ರಾಹುಲ್ ತೋರಿದ ಜವಾಬ್ದಾರಿಯುತ ಬ್ಯಾಟಿಂಗ್ ಪ್ರದರ್ಶನ ಭಾರತದ ಈ ಗೆಲುವಿಗೆ ಪ್ರಮುಖ ಕಾರಣವಾಯಿತು. ಈ ಗೆಲುವಿನೊಂದಿಗೆ ಐದು ಪಂದ್ಯಗಳ ಏಕದಿನ ಸರಣಿಯಲ್ಲಿ ಭಾರತ ತಂಡವು 2-0 ಅಂತರದ ಮುನ್ನಡೆ ಸಾಧಿಸಿದ್ದು, ಸರಣಿಯ ಮೂರನೇ ಪಂದ್ಯವು ಮಂಗಳವಾರ ಹ್ಯಾಮಿಲ್ಟನ್‌ನಲ್ಲಿ ನಡೆಯಲಿದೆ.

ಈ ಪಂದ್ಯದಲ್ಲಿ ಮಳೆಯ ಕಾರಣದಿಂದಾಗಿ 47 ಓವರ್‌ಗಳಿಗೆ 135 ರನ್‌ಗಳ ಗುರಿಯನ್ನು ಭಾರತಕ್ಕೆ ನಿಗದಿಪಡಿಸಲಾಗಿತ್ತು. ಚೇಸಿಂಗ್ ಆರಂಭಿಸಿದ ಭಾರತ 26 ಓವರ್‌ಗಳಲ್ಲಿ 7 ವಿಕೆಟ್ ನಷ್ಟಕ್ಕೆ 113 ರನ್ ಗಳಿಸಿದ್ದಾಗ ಮತ್ತೆ ಭಾರಿ ಮಳೆ ಸುರಿಯಲು ಪ್ರಾರಂಭಿಸಿತು. ಆ ವೇಳೆಗೆ ಕೆ.ಎಲ್. ರಾಹುಲ್ 26 ರನ್ ಗಳಿಸಿ ಅಜೇಯರಾಗಿ ಕ್ರೀಸ್‌ನಲ್ಲಿದ್ದರು. ಮಳೆ ನಿಲ್ಲದ ಕಾರಣ ಡಕ್ವರ್ಥ್-ಲೂಯಿಸ್ (DLS) ನಿಯಮದ ಪ್ರಕಾರ ಭಾರತದ ಗೆಲುವಿನ ಗುರಿಯನ್ನು 109 ರನ್‌ಗಳಿಗೆ ಪರಿಷ್ಕರಿಸಲಾಯಿತು, ಇದರಿಂದಾಗಿ ಭಾರತ ತಂಡ ಜಯವನ್ನು ತನ್ನದಾಗಿಸಿಕೊಂಡಿತು, (ಏಜೆನ್ಸೀಸ್​).