92 ವರ್ಷಗಳ ಬಳಿಕ ವಿಶ್ವಕಪ್‌ನಲ್ಲಿ ಚೊಚ್ಚಲ ಗೆಲುವು ಸಾಧಿಸಿದ ಈಜಿಪ್ಟ್‌: ಜಿ ಗುಂಪಿನಲ್ಲಿ ಅಗ್ರಸ್ಥಾನ

ಬಿ.ಸಿ. ಪ್ಲೇಸ್ ವ್ಯಾಂಕೋವರ್ ಸ್ಟೇಡಿಯಂನಲ್ಲಿ ಭಾನುವಾರ ರಾತ್ರಿ ನಡೆದ (ಭಾರತೀಯ ಕಾಲಮಾನ ಸೋಮವಾರ ಮುಂಜಾನೆ) ಪಂದ್ಯದಲ್ಲಿ ಈಜಿಪ್ಟ್ ಹಿನ್ನಡೆಯಿಂದ ಕಂಬ್ಯಾಕ್ ಮಾಡಿತು. ಕಳೆದ ಆವೃತ್ತಿಯ ಅರ್ಹತೆಯಿಂದ ವಂಚಿತವಾಗಿದ್ದ ಈಜಿಪ್ಟ್ ಮೊದಲಾರ್ಧದಲ್ಲಿ 1-0 ಹಿನ್ನಡೆ ಕಂಡಿತು. ಇನ್‌ಸ್ಟಾಗ್ರಾಮ್ನ ಸೆನ್ಸೇಷನ್ ಟಿಮ್ ಪೇನ್ ನೀಡಿದ ಕಾರ್ನರ್ ಕಿಕ್‌ನಲ್ಲಿ ಫಿನ್ ಸುರ್ಮನ್ ಅದ್ಭುತ ಹೆಡರ್ ಮೂಲಕ 15ನೇ ನಿಮಿಷದಲ್ಲಿ ‘ಆಲ್‌ವೈಟ್ಸ್’ ನ್ಯೂಜಿಲೆಂಡ್‌ಗೆ ಮುನ್ನಡೆ ಒದಗಿಸಿದರು.

35ನೇ ನಿಮಿಷದದಲ್ಲಿ ಪಂದ್ಯ ಸಮಬಲಗೊಳಿಸುವ ಅವಕಾಶದಲ್ಲಿ ಈಜಿಪ್ಟ್ ಓಮರ್ ಮಾರ್ಮೌಶ್ ವಿಲರಾದರು. ದ್ವಿತೀಯಾರ್ಧದಲ್ಲಿ ಮೊಸ್ತಾ ಜಿಕೊ 58ನೇ ನಿಮಿಷದಲ್ಲಿ ಈಜಿಪ್ಟ್ ಪರ ಮೊದಲ ಗೋಲು ಸಿಡಿಸಿ ಪಂದ್ಯ ಸಮಬಲಗೊಳಿಸಿದರೆ, 10 ನಿಮಿಷದ ಅಂತರದಲ್ಲಿ ಅನುಭವಿ ಮೊಹಮದ್ ಸಲಾಹ್ (67ನೇ ನಿಮಿಷ) ವೈಯಕ್ತಿಕ 68ನೇ ಅಂತಾರಾಷ್ಟ್ರೀಯ ಗೋಲು ಬಾರಿಸಿ ಮುನ್ನಡೆ ಒದಗಿಸಿದರು.

ಸಲಾಹ್ ಗೋಲು ಗಳಿಸಲು ನೆರವಿಗೆ ಜಿಕೊ ಬ್ಯಾಕ್ ಹೀಲ್ ಪಾಸ್ ನೀಡಿದರು. 34 ವರ್ಷದ ಮೊಹಮದ್ ಸಲಾಹ್ ರಷ್ಯಾದಲ್ಲಿ ನಡೆದ 2018ರ ವಿಶ್ವಕಪ್‌ನಲ್ಲಿ ಎರಡು ಗೋಲು ಗಳಿಸಿದ್ದರು. 82ನೇ ನಿಮಿಷದಲ್ಲಿ ಟ್ರೆಜೆಗುಟ್ ಡೈವಿಂಗ್ ಹೆಡರ್ ಮೂಲಕ ಈಜಿಪ್ಟ್ ಗೆಲುವಿನ ಅಂತರ ಹಿಗ್ಗಿಸಿದರು.

4ನೇ ಬಾರಿಗೆ ವಿಶ್ವಕಪ್‌ನಲ್ಲಿ ಆಡುತ್ತಿರುವ ಈಜಿಪ್ಟ್ ನಾಕೌಟ್‌ಗೇರಲು ಉತ್ತಮ ಅವಕಾಶ ಹೊಂದಿದ್ದು, ಶನಿವಾರ ಇರಾನ್ ವಿರುದ್ಧ ಕನಿಷ್ಠ ಡ್ರಾದ ಅವಶ್ಯಕತೆ ಹೊಂದಿದೆ. 2010ರ ನಂತರ ಆಡುತ್ತಿರುವ ನ್ಯೂಜಿಲೆಂಡ್ ಟೂರ್ನಿಯಲ್ಲಿರುವ ಅತಿ ಕಡಿಮೆ ಶ್ರೇಯಾಂಕಿತ ತಂಡ ಎನಿಸಿದೆ.

ಮೊಸ್ತಾ ಜಿಕೊ (58ನೇ ನಿಮಿಷ)

ಮೊಹಮದ್ ಸಲಾಹ್ (67)

ಟ್ರೆಜೆಗುಟ್ (82)

ಫಿನ್ ಸುರ್ಮನ್ (15)