ಧೋನಿ ಪತ್ನಿ ಸಾಕ್ಷಿ ಧರಿಸಿದ್ದ ಈ ಆಕರ್ಷಕ ವಾಚ್ ಬೆಲೆ ಕೇಳಿದ್ರೆ ನಿಮ್ಮ ಹುಬ್ಬೇರೋದು ಖಚಿತ | ​Sakshi Dhoni

Sakshi Dhoni: ಪ್ರಸಕ್ತ ಐಪಿಎಲ್​ ಆವೃತ್ತಿಯಲ್ಲಿ ಸೋಲಿನ ಹಾದಿ ಹಿಡಿದಿರುವ ಚೆನ್ನೈ ಸೂಪರ್ ಕಿಂಗ್ಸ್​, ಉತ್ತಮ ಆಲ್​ರೌಂಡ್​ ಪ್ರದರ್ಶನ ನೀಡಲು ಹೆಣಗಾಡುತ್ತಿದೆ. ಮತ್ತೊಂದೆಡೆ, ತಂಡದಲ್ಲಿ ಮಹೇಂದ್ರ ಸಿಂಗ್ ಧೋನಿ ಅವರ ಅನುಪಸ್ಥಿತಿ ಕ್ರಿಕೆಟ್​ ಪ್ರೇಮಿಗಳ ನಿರಾಶೆ, ಬೇಸರಕ್ಕೆ ಕಾರಣವಾಗಿದೆ. ಈ ಮಧ್ಯೆ, ಇತ್ತೀಚೆಗಷ್ಟೇ ಮುಂಬೈನಲ್ಲಿ ಐಪಿಎಲ್​ ಪಂದ್ಯ ನೋಡಲು ಬಂದಿದ್ದ ಧೋನಿ ಪತ್ನಿ ಸಾಕ್ಷಿ, ತಾವು ಧರಿಸಿದ್ದ ಆಕರ್ಷಕ ಸ್ಪೋರ್ಟ್ಸ್​ ವಾಚ್​ ಮೂಲಕ ಸದ್ಯ ನೆಟ್ಟಿಗರ ಗಮನ ಸೆಳೆದಿದ್ದಾರೆ.     

ಏ.23ರಂದು ಮುಂಬೈನ ವಾಂಖೆಡೆ ಕ್ರೀಡಾಂಗಣದಲ್ಲಿ ನಡೆದ ಮುಂಬೈ ಇಂಡಿಯನ್ಸ್ ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ ಪಂದ್ಯಕ್ಕೆ ಎಂದಿನಂತೆ ಫ್ರಾಂಚೈಸಿ ಆಟಗಾರರನ್ನು ಪ್ರೋತ್ಸಾಹಿಸಲು ಸಾಕ್ಷಿ ಆಗಮಿಸಿದ್ದರು. ಈ ವೇಳೆ, ಅವರು ಧರಿಸಿದ್ದ ವಿಶೇಷ ಹಾಗೂ ಆಕರ್ಷಕ ಹಸಿರು ಬಣ್ಣದ ವಾಚ್​ವೊಂದು ನೆಟ್ಟಿಗರ​ ಕಣ್ಣಿಗೆ ಬಿದ್ದಿತು. ​ಸಾಕ್ಷಿಯ ಎಡಗೈಯಲ್ಲಿದ್ದ ಸ್ಫೋರ್ಟ್ಸ್​ ವಾಚ್​ ಯಾವುದು? ಅದರ ಬೆಲೆ ಎಷ್ಟಿರಬಹುದು? ನೋಡಲು ಸಿಂಪಲ್ ಆಗಿದ್ದರೂ ಇದರ ವಿಶೇಷತೆ ಏನಿರಬಹುದು? ಎಂಬ ಕುತೂಹಲ ಹಲವರಿಗೆ ಕಾಡಿತು.

ರಿಚರ್ಡ್ ಮಿಲ್ಲೆ ಕಂಪನಿಯ ವಾಚ್​ ಇದಾಗಿದ್ದು, ಇದರ ಬೆಲೆ ಬರೋಬ್ಬರಿ 3.1 ಕೋಟಿ ರೂ. ಎನ್ನಲಾಗಿದೆ. ರಿಚರ್ಡ್ ಮಿಲ್ಲೆ ಆರ್‌ಎಂ 67-02 ವೇಡ್ ವ್ಯಾನ್ ನೀಕೆರ್ಕ್ ಎಂಬ ಅಲ್ಟ್ರಾ ಮಣಿಕಟ್ಟಿನ ವಾಚ್​ ಇದು. ಈ ಒಂದು ಸ್ಪೆಷಲ್​ ಡಿಸೈನ್​ ಹೊಂದಿರುವ ಗಡಿಯಾರ, ದಕ್ಷಿಣ ಆಫ್ರಿಕಾದ ಒಲಿಂಪಿಕ್ ಚಿನ್ನದ ಪದಕ ವಿಜೇತ ಮತ್ತು 400 ಮೀಟರ್ ವಿಶ್ವ ದಾಖಲೆ ಹೊಂದಿರುವ ವೇಡ್ ವ್ಯಾನ್ ನೀಕೆರ್ಕ್ ಅವರ ಗೌರವಾರ್ಥವಾಗಿ ವಿನ್ಯಾಸಗೊಳಿಸಲಾದ ಅತ್ಯಂತ ಹಗುರವಾದ ಆಟೋಮೆಟಿಕ್​ ಸ್ಪೋರ್ಟ್ಸ್​ ವಾಚ್​ ಆಗಿದೆ.

ಇದು ಕಾರ್ಬನ್ ಟಿಪಿಟಿ ಮತ್ತು ಕ್ವಾರ್ಟ್ಜ್ ಟಿಪಿಟಿ ವಸ್ತುಗಳಿಂದ ಮಾಡಲ್ಪಟ್ಟಿದೆ. ವಿಶೇಷವಾಗಿ ಈ ವಾಚ್​ಗಳು ಹಸಿರು ಮತ್ತು ಹಳದಿ ಬಣ್ಣಗಳಲ್ಲಿ ಲಭ್ಯವಿದೆ. ಕಾರಣ, ದಕ್ಷಿಣ ಆಫ್ರಿಕಾದ ಧ್ವಜದ ಕಲರ್​ಗಳನ್ನು ಸಂಕೇತಿಸಲು ಬಳಸಲಾಗಿದೆ. ಈ ಒಂದು ವಾಚ್​ ಲೈಟ್​ ವೇಟ್​ ಮತ್ತು ಶಾಕ್​ ಪ್ರೂಫ್​ ಆಗಿದೆ.  ಹೀಗಾಗಿಯೇ, ಇದನ್ನು ಹೆಚ್ಚಾಗಿ ಕ್ರೀಡಾಪಟುಗಳು ಧರಿಸುತ್ತಾರೆ,(ಏಜೆನ್ಸೀಸ್).