ಗೌತಿ​-ಅಗರ್ಕರ್ ಇಬ್ಬರೂ... ಇಂಗ್ಲೆಂಡ್ ಎದುರು ಟಿ20​ ಸರಣಿ ಸೋಲಿಗೆ ಸ್ಫೋಟಕ ಕಾರಣ ಬಿಚ್ಚಿಟ್ಟ ದಿನೇಶ್ ಕಾರ್ತಿಕ್

ಲಂಡನ್: ಪ್ರಸಕ್ತ, ಆಂಗ್ಲರ ವಿರುದ್ಧ ಮೂರು ಪಂದ್ಯಗಳ ಏಕದಿನ ಸರಣಿಯನ್ನು ಆಡುತ್ತಿರುವ ಭಾರತ, ಶ್ರೇಯಸ್ ಅಯ್ಯರ್​ ನಾಯಕತ್ವದಲ್ಲಿ ಆಡಿದ ಟಿ20 ಸರಣಿಯಲ್ಲಿ ಹೀನಾಯವಾಗಿ ಸೋಲುಂಡಿದ್ದು ಕ್ರಿಕೆಟ್​ ಪ್ರೇಮಿಗಳು ಮತ್ತು ಮಾಜಿ ಕ್ರಿಕೆಟಿಗರ ಅಸಮಾಧಾನಕ್ಕೆ ಕಾರಣವಾಗಿದೆ. ಇದೇ ಸಂದರ್ಭದಲ್ಲಿ ಮಾತನಾಡಿದ ದಿನೇಶ್ ಕಾರ್ತಿಕ್​, ಟೀಮ್ ಇಂಡಿಯಾ ಹೀನಾಯ ಸೋಲಿಗೆ ಹೆಡ್​ ಕೋಚ್​ ಗೌತಮ್ ಗಂಭೀರ್​ ಮತ್ತು ಆಯ್ಕೆ ಸಮಿತಿ ಅಧ್ಯಕ್ಷ ಅಜಿತ್ ಅಗರ್ಕರ್​ ಕಾರಣ ಎಂದು ಹೇಳಿದ್ದಾರೆ.

ಸ್ಕೈ ಸ್ಪೋರ್ಟ್ಸ್ ಜತೆ ಮಾತನಾಡಿದ ಕಾರ್ತಿಕ್​, ಗಂಭೀರ್ ಮತ್ತು ಅಗರ್ಕರ್ ನಡುವೆ ಯಾವುದೋ ವಿಚಾರಕ್ಕೆ ಭಿನ್ನಾಭಿಪ್ರಾಯಗಳಿವೆ. ಒಬ್ಬರಿಗೆ ಪ್ರತಿ ಪಂದ್ಯದಲ್ಲೂ ಗೆಲುವು ಬೇಕು, ಇನ್ನೊಬ್ಬರಿಗೆ ಭವಿಷ್ಯದ ಬಗ್ಗೆಯೇ ಚಿಂತೆ. ಇಬ್ಬರೂ ಒಂದೇ ಬಾಕ್ಸ್​ನಲ್ಲಿ ಇಲ್ಲ. ಇವರ ಮಧ್ಯೆಯಿರುವ ಆಂತರಿಕ ಘರ್ಷಣೆಯೇ ಐರ್ಲೆಂಡ್ ಮತ್ತು ಇಂಗ್ಲೆಂಡ್ ವಿರುದ್ಧದ ಟಿ20 ಸರಣಿಗಳಲ್ಲಿ ಹೀನಾಯ ಸೋಲಿಗೆ ಕಾರಣ ಎಂದಿದ್ದಾರೆ.

ಭಾರತಕ್ಕೆ ಟಿ20 ವಿಶ್ವಕಪ್ ಗೆಲ್ಲಿಸಿಕೊಟ್ಟ ಕೇವಲ ಮೂರೇ ತಿಂಗಳಲ್ಲಿ ಸೂರ್ಯಕುಮಾರ್ ಯಾದವ್​ರನ್ನು ನಾಯಕತ್ವದಿಂದ ಕೆಳಗಿಳಿಸಿದ್ದಲ್ಲದೆ, ತಂಡದಿಂದಲೂ ಕೈಬಿಡಲಾಯಿತು. ಭವಿಷ್ಯದಲ್ಲಿ ತಂಡ ಕಟ್ಟುವ ಹುಮ್ಮಸ್ಸಿನಲ್ಲಿ ವಯಸ್ಸು ಮತ್ತು ಫಾರ್ಮ್ ಅನ್ನು ನೆಪವಾಗಿಟ್ಟುಕೊಂಡು ಅಗರ್ಕರ್ ಪಡೆ ಸೂರ್ಯರನ್ನು ಕೈಬಿಟ್ಟರೆ, ವಿಶ್ವಕಪ್ ತಂಡದಲ್ಲೇ ಇಲ್ಲದ ಶ್ರೇಯಸ್ ಅಯ್ಯರ್‌ಗೆ ಟಿ20 ನಾಯಕತ್ವ ನೀಡಿ ಭಾರಿ ಚರ್ಚೆಗೆ ಗುರಿಯಾದರು.

ಐರ್ಲೆಂಡ್​ ಎದುರು ಪಂದ್ಯಗಳ ಸರಣಿಯಲ್ಲಿ ಫ್ಲಾಪ್ ಆದ ಕೂಡಲೇ ತಂಡದಿಂದ ಕಿತ್ತೆಸೆಯುತ್ತಾರೆ ಎಂಬ ಭಯ ಮತ್ತು ಅಭದ್ರತೆ ಇದೀಗ ಆಟಗಾರರಲ್ಲಿ ಕಾಡಲಾರಂಭಿಸಿದೆ. ಬಿಸಿಸಿಐ ಮತ್ತು ಟೀಮ್ ಮ್ಯಾನೇಜ್‌ಮೆಂಟ್ ತಕ್ಷಣವೇ ಮಧ್ಯಪ್ರವೇಶಿಸಿ ಕೋಚ್ ಹಾಗೂ ಆಯ್ಕೆಗಾರರ ನಡುವಿನ ಗೊಂದಲವನ್ನು ಬಗೆಹರಿಸದಿದ್ದರೆ ಭವಿಷ್ಯದಲ್ಲಿ ಟೀಮ್ ಇಂಡಿಯಾ ಅಪಾಯಕ್ಕೆ ಸಿಲುಕಲಿದೆ ಎಂದು ದಿನೇಶ್​ ಎಚ್ಚರಿಸಿದ್ದಾರೆ,(ಏಜೆನ್ಸೀಸ್).