ಈತ ಮುಂಬೈ ಇಂಡಿಯನ್ಸ್ ಅಪ್ಪಟ​ ಫ್ಯಾನ್ ಅನ್ನೋದಕ್ಕೆ ಇದೇ ಸಾಕ್ಷಿ​​! ಇಂಥಾ ಅಭಿಮಾನಿಗಳು ಅಪರೂಪದಲ್ಲೇ ಅಪರೂಪ

RCB vs MI: ನಿನ್ನೆ (ಏ.12) ಮುಂಬೈನ ವಾಂಖೆಡೆ ಕ್ರೀಡಾಂಗಣದಲ್ಲಿ ನಡೆದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ) ಮತ್ತು ಮುಂಬೈ ಇಂಡಿಯನ್ಸ್ (ಎಂಐ) ನಡುವಿನ ಐಪಿಎಲ್​ 19ನೇ ಆವೃತ್ತಿಯ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ 18 ರನ್‌ಗಳಿಂದ ಸೋಲುಂಡಿತು. ತವರಿನಲ್ಲೇ ಕಳಪೆ ಪ್ರದರ್ಶನದಿಂದ ಎಂಐ ತಂಡ ಭಾರೀ ಮುಖಭಂಗ ಅನುಭವಿಸಿತು. ತಮ್ಮ ನೆಚ್ಚಿನ ತಂಡವನ್ನು ಹುರಿದುಂಬಿಸಲು ಸ್ಟೇಡಿಯಂನಲ್ಲಿ ಕುಳಿತಿದ್ದ ಫ್ಯಾನ್ಸ್​, ಅಯ್ಯೋ ಗೆಲುವು ನಮ್ಮಿಂದ ಕೈತಪ್ಪಿತೇ ಎಂದು ಬೇಸರದಲ್ಲಿದ್ದರೆ, ಅಲ್ಲೊಬ್ಬ ಅಪ್ಪಟ ಮುಂಬೈ ಇಂಡಿಯನ್ಸ್ ಅಭಿಮಾನಿಯೊಬ್ಬ​ ಮಾಡುತ್ತಿದ್ದ ಕೆಲಸ ಕಂಡು ಹಲವರು ಹುಬ್ಬೇರಿಸಿದ್ದಾರೆ. 

ಟಾಸ್​ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು, ನಿಗದಿತ 20 ಓವರ್‌ಗಳಲ್ಲಿ ನಾಲ್ಕು ವಿಕೆಟ್‌ಗಳ ನಷ್ಟಕ್ಕೆ 240 ರನ್ ಗಳಿಸಿತು. ಈ ಬೃಹತ್​ ರನ್​ಗಳ ಗುರಿಯನ್ನು ಬೆನ್ನಟ್ಟಿದ ಮುಂಬೈ ಇಂಡಿಯನ್ಸ್​ ತಂಡದ ಆರಂಭಿಕ ಬ್ಯಾಟರ್​ಗಳಾದ ರೋಹಿತ್ ಶರ್ಮ ಮತ್ತು ರಿಕಲ್ಟನ್​ ಜೋಡಿ, ಪವರ್​ಪ್ಲೇಯ ಮೊದಲ ಮೂವರು ಓವರ್​ನಲ್ಲಿ ಭರ್ಜರಿ ಓಪನಿಂಗ್ ನೀಡಿದ್ದೇ ಆದರೂ, ಅದನ್ನು ಮುಂದುವರಿಸಿಕೊಂಡು ಹೋಗುವಲ್ಲಿ ವಿಫಲವಾಯಿತು. 20 ಓವರ್‌ಗಳಲ್ಲಿ 5 ವಿಕೆಟ್‌ಗಳ ನಷ್ಟಕ್ಕೆ 222 ರನ್‌ಗಳನ್ನು ಗಳಿಸಲಷ್ಟೇ ಸಾಧ್ಯವಾಯಿತು. ಈ ಮೂಲಕ ಆರ್​ಸಿಬಿ 18 ರನ್​ಗಳಿಂದ ಗೆಲುವು ದಾಖಲಿಸಿತು.  

ಈ ಪಂದ್ಯವನ್ನು ಬಹಳ ಗಂಭೀರವಾಗಿ ನೋಡುತ್ತಿದ್ದ ಮುಂಬೈ ಇಂಡಿಯನ್ಸ್ ಮತ್ತು ಆರ್​ಸಿಬಿ ಅಭಿಮಾನಿಗಳು, ಎಂದಿನಂತೆ ತಮ್ಮ ನೆಚ್ಚಿನ ತಂಡಗಳಿಗೆ ಪ್ರೋತ್ಸಾಹ ನೀಡುತ್ತಿದ್ದರು. ದ್ವಿತೀಯ ಇನ್ನಿಂಗ್ಸ್​ನ 15ನೇ ಓವರ್​ನಲ್ಲಿ ಮುಂಬೈ ಇಂಡಿಯನ್ಸ್​ ಫ್ಯಾನ್ಸ್​ಗೆ ಗೆಲುವಿನ ಭರವಸೆ ಹೋಯಿತು. ಹೀಗಾಗಿ, ಬಹಳ ಬೇಸರದಿಂದ ಕುಳಿತಿದ್ದರು. ಆದರೆ, ಇಲ್ಲೊಬ್ಬ ಅಪ್ಪಟ ಮುಂಬೈ ಅಭಿಮಾನಿ, ತನ್ನ ಆರ್​ಸಿಬಿ ಜೆರ್ಸಿ ಧರಿಸಿದ್ದ ಸ್ನೇಹಿತನೊಂದಿಗೆ ಕುಳಿತು, ಮುಖಕ್ಕೆ ಗ್ಲೋಯಿಂಗ್ ಮಾಸ್ಕ್​ ಹಚ್ಚಿಕೊಳ್ಳುತ್ತಿರುವುದು ಮತ್ತೊಬ್ಬರ ಮೊಬೈಲ್​ ಕ್ಯಾಮರಾದಲ್ಲಿ ಸೆರೆಯಾಗಿದೆ.

ಮುಖದ ತ್ವಚೆ ಬಿಸಿಲಿನಿಂದ ಹಾಳಾಗಬಹುದು ಎಂಬ ಮುನ್ನೆಚ್ಚರಿಕೆಯಿಂದ ಸ್ಕಿನ್​ ಕೇರ್​​ಗೆ ಹೆಚ್ಚು ಒತ್ತು ಕೊಟ್ಟಿರುವ ಈತ, ಯಾರಾದರೂ ಸೋಲಲಿ, ಗೆಲ್ಲಲಿ ನನಗೇನು? ನನ್ನ ಮುಖ ಚೆನ್ನಾಗಿ ಕಂಡರೆ ಸಾಕು ಎನ್ನುವ ರೀತಿ, ಜೆಲ್​ ಹಚ್ಚಿಕೊಳ್ಳುತ್ತಿರುವುದು ಕಂಡುಬಂದಿದೆ. ಸದ್ಯ ಈ ದೃಶ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದೆ. ಅಸಲಿಗೆ, ಕ್ಯಾಮರಾಮ್ಯಾನ್​ಗಳು ಸೂಕ್ಷ್ಮವಾಗಿ ಸ್ಟೇಡಿಯಂನಲ್ಲಿರುವ ಅಭಿಮಾನಿಗಳನ್ನು ಸೆರೆಹಿಡಿಯಲು ಮುಂದಾದರೆ, ಇಂತಹ ಹಲವು ದೃಶ್ಯಗಳು ಕಾಣಸಿಗುತ್ತವೆ ಎಂಬುದರಲ್ಲಿ ಸಂದೇಹವಿಲ್ಲ.