ಧೋನಿ ನನ್ನ ಫೋನ್ ಕರೆಯನ್ನೇ ಸ್ವೀಕರಿಸುತ್ತಿಲ್ಲ! CSK ವಿರುದ್ಧದ ಪಂದ್ಯದ ಬಳಿಕ ಜಡೇಜಾ ನೀಡಿದ ಹೇಳಿಕೆ ವೈರಲ್ | RavindraJadeja

ಹೌದು, ಕಳೆದ ರಾತ್ರಿ ರಾಜಸ್ಥಾನ್ ರಾಯಲ್ಸ್ ಮತ್ತು ಸಿಎಸ್‌ಕೆ ನಡುವೆ ನಡೆದ ಪಂದ್ಯವು ಕೇವಲ ಆಟವಾಗಿರದೆ, ಭಾವನೆಗಳ ಸಂಘರ್ಷವಾಗಿತ್ತು. ಪಂದ್ಯದ ನಂತರ ಜಡೇಜಾ ಅವರು ಎಂ.ಎಸ್. ಧೋನಿ ಬಗ್ಗೆ ನೀಡಿರುವ ಹೇಳಿಕೆ ಈಗ ಹೊಸ ಚರ್ಚೆಗೆ ನಾಂದಿ ಹಾಡಿದೆ.

2012 ರಿಂದ 2025 ರವರೆಗೆ (ತಂಡ ನಿಷೇಧಕ್ಕೊಳಗಾದ ಎರಡು ವರ್ಷ ಹೊರತುಪಡಿಸಿ) ಸಿಎಸ್‌ಕೆಯ ಬೆನ್ನೆಲುಬಾಗಿ ನಿಂತಿದ್ದ ಜಡೇಜಾ, ಈಗ ರಾಜಸ್ಥಾನ್ ರಾಯಲ್ಸ್ ಜರ್ಸಿಯಲ್ಲಿ ಹಳದಿ ಪಡೆಯ ವಿರುದ್ಧವೇ ಕಣಕ್ಕಿಳಿದಿರುವುದು ಅಭಿಮಾನಿಗಳಿಗೆ ವಿಚಿತ್ರವಾಗಿ ಕಂಡಿತು. 2018, 2021 ಮತ್ತು 2023ರ ಚಾಂಪಿಯನ್ ಪಟ್ಟ ಅಲಂಕರಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದ ಜಡೇಜಾ, ನಿನ್ನೆ ಬೌಲಿಂಗ್‌ನಲ್ಲಿ ಕೆಂಡ ಉಗುಳಿದರು. ಕೇವಲ 18 ರನ್‌ ನೀಡಿ 2 ಪ್ರಮುಖ ವಿಕೆಟ್‌ (ಸರ್ಫರಾಜ್ ಖಾನ್ ಮತ್ತು ಶಿವಂ ದುಬೆ) ಪಡೆಯುವ ಮೂಲಕ ತಮ್ಮ ಆಲ್ ರೌಂಡ್ ಪ್ರತಿಭೆಯನ್ನು ಸಾಬೀತುಪಡಿಸಿದರು. ಈ ಪಂದ್ಯದಲ್ಲಿ ರಾಜಸ್ಥಾನ್ ರಾಯಲ್ಸ್ ತಂಡ ಸಿಎಸ್‌ಕೆ ವಿರುದ್ಧ 8 ವಿಕೆಟ್‌ಗಳ ಭರ್ಜರಿ ಜಯ ಸಾಧಿಸಿತು.

ಪಂದ್ಯದ ನಂತರ ನಡೆದ ಭಾವುಕ ಕ್ಷಣಗಳ ಬಗ್ಗೆ ಮಾತನಾಡಿದ ಜಡೇಜಾ, ತಮ್ಮ ಹಳೆಯ ತಂಡದ ವಿರುದ್ಧ ಆಡುವುದು ಸಂಕಟ ತಂದಿತ್ತು ಎಂದು ಒಪ್ಪಿಕೊಂಡರು. ಇದೇ ವೇಳೆ ಎಂ.ಎಸ್. ಧೋನಿ ಅವರ ಬಗ್ಗೆ ಕೇಳಲಾದ ಪ್ರಶ್ನೆಗೆ ಉತ್ತರಿಸಿದ ಅವರು, "ಮಹಿ ಭಾಯ್ (ಧೋನಿ) ತಮ್ಮ ಫೋನ್ ಅನ್ನು ಯಾವಾಗಲೂ ಸ್ವಿಚ್ ಆಫ್ ಇಟ್ಟಿರುತ್ತಾರೆ. ನಾನು ತಂಡ ಬದಲಿಸಿದ ನಂತರ ಅವರೊಂದಿಗೆ ಅಥವಾ ಸುರೇಶ್ ರೈನಾ ಅವರೊಂದಿಗೆ ಸರಿಯಾಗಿ ಮಾತನಾಡಲು ಸಾಧ್ಯವಾಗಿಲ್ಲ. ಅವರು ನನ್ನ ಕರೆಗಳನ್ನು ಸ್ವೀಕರಿಸುತ್ತಿಲ್ಲ" ಎಂದು ಮಾರ್ಮಿಕವಾಗಿ ಹೇಳಿದರು. ಆದಾಗ್ಯೂ, "ಅವರು ಸಿಕ್ಕಾಗಲೆಲ್ಲಾ ಹಳೆಯ ಪ್ರೀತಿಯಿಂದಲೇ ಮಾತನಾಡಿಸುತ್ತಾರೆ" ಎಂದು ಸ್ಪಷ್ಟಪಡಿಸಿದರು.

ರಾಜಸ್ಥಾನ್ ರಾಯಲ್ಸ್ ತಂಡಕ್ಕೆ ಸೇರ್ಪಡೆಗೊಂಡಿರುವುದು ವೃತ್ತಿಜೀವನದ ಭಾಗ ಎಂದು ಜಡೇಜಾ ಬಣ್ಣಿಸಿದರು. "ಅಂಡರ್-19 ವಿಶ್ವಕಪ್ ಮುಗಿದ ನಂತರ ನಾನು ಮೊದಲು ಸೇರಿದ್ದೇ ರಾಜಸ್ಥಾನ್ ತಂಡಕ್ಕೆ. ಈಗ ಮತ್ತೆ ಅದೇ ತಂಡಕ್ಕೆ ಮರಳಿರುವುದು ಹಳೆಯ ದಿನಗಳನ್ನು ನೆನಪಿಸುತ್ತಿದೆ. ಹೊಸ ತಂಡದಲ್ಲಿ ಯುವ ಆಟಗಾರರೊಂದಿಗೆ ಬೆರೆತು ನನ್ನ ಅನುಭವವನ್ನು ಹಂಚಿಕೊಳ್ಳುತ್ತಿದ್ದೇನೆ" ಎಂದು ಹೇಳಿದರು,(ಏಜೆನ್ಸೀಸ್).