ಗಾಲೆಯಲ್ಲಿ ದೇವದತ್ ಪಡಿಕ್ಕಲ್ ಶತಕದಾಟ: ಹಲವು ದಾಖಲೆ ಬರೆದ ಕರ್ನಾಟಕ ಬ್ಯಾಟರ್!

ಗಾಲೆ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ಭಾನುವಾರ ಎರಡನೇ ದಿನದಾಟ, ಭಾರತೀಯ ಕಾಲಮಾನ ಪ್ರಕಾರ ಮಧ್ಯಾಹ್ನ 2.15 ಗಂಟೆಗೆ ಆರಂಭಗೊಂಡಿತು. ಭಾರಿ ಮಳೆ ಜತೆಗೆ ಮೈದಾನ ತೇವಾಂಶದಿಂದ ಕೂಡಿದ್ದರಿಂದ ಆಟ ವಿಳಂಬಗೊಂಡಿತು.

2 ವಿಕೆಟ್‌ಗೆ 288 ರನ್‌ಗಳಿಂದ ಆಟ ಮುಂದುವರಿಸಿದ ಭಾರತ ತಂಡ, ಆತಿಥೇಯ ಸ್ಪಿನ್ನರ್‌ಗಳಾದ ಪ್ರಭಾತ್ ಜಯಸೂರ‌್ಯ (109ಕ್ಕೆ 4) ಹಾಗೂ ಕೇಶರ ನುವಂತ (175ಕ್ಕೆ 3) ಸುಧಾರಿತ ಬೌಲಿಂಗ್ ಎದುರು ದಿಟ್ಟ ಬ್ಯಾಟಿಂಗ್ ನಡೆಸಿ ದಿನದಂತ್ಯಕ್ಕೆ 116 ಓವರ್‌ಗಳಲ್ಲಿ 9 ವಿಕೆಟ್‌ಗೆ 460 ರನ್‌ಗಳ ಬೃಹತ್ ಮೊತ್ತ ಕಲೆಹಾಕಿದೆ. ಬಾಲಗೋಂಚಿಗಳಾದ ಕುಲದೀಪ್ ಯಾದವ್ (12*) ಜತೆಗೆ ಕನ್ನಡಿಗ ಪ್ರಸಿದ್ಧಕೃಷ್ಣ (1*) ಸೋಮವಾರಕ್ಕೆ ಬ್ಯಾಟಿಂಗ್ ಕಾಯ್ದುಕೊಂಡಿದ್ದಾರೆ. ಪಂದ್ಯದ ಎರಡನೇ ದಿನ ನಿಗದಿತ 98 ಓವರ್‌ಗಳ ಪೈಕಿ 43 ಓವರ್‌ಗಳ ಆಟ ಮಾತ್ರ ಸಾಧ್ಯವಾಯಿತು. ಆದರೆ, ಶನಿವಾರ ಎರಡು ವಿಕೆಟ್ ಕಬಳಿಸಿದ್ದ ಲಂಕಾ ಬೌಲರ್‌ಗಳು ಎರಡನೇ ದಿನ ಏಳು ವಿಕೆಟ್ ಪಡೆದರು. ಪಿಚ್ ನಿಧಾನವಾಗಿ ಸ್ಪಿನ್ನರ್‌ಗಳಿಗೆ ನೆರವು ಒದಗಿಸಲು

ಆರಂಭಿಸಿದೆ.

4: ದೇವದತ್ ಪಡಿಕ್ಕಲ್ ಶ್ರೀಲಂಕಾದಲ್ಲಿ 4ನೇ ಗರಿಷ್ಠ ವೈಯಕ್ತಿಕ ರನ್ ಗಳಿಸಿದ ಭಾರತೀಯ ಎನಿಸಿದರು. ಸಚಿನ್ ತೆಂಡುಲ್ಕರ್ (203), ವೀರೇಂದ್ರ ಸೆಹ್ವಾಗ್ (201*), ಶಿಖರ್ ಧವನ್ (190) ಮೊದಲ 3 ಸ್ಥಾನದಲ್ಲಿದ್ದಾರೆ.

5: ದೇವದತ್ ಪಡಿಕ್ಕಲ್ ಶ್ರೀಲಂಕಾದಲ್ಲಿ 150 ಪ್ಲಸ್ ರನ್ ಗಳಿಸಿದ 5ನೇ ಭಾರತೀಯ ಎನಿಸಿದರು. ಸಚಿನ್, ಸೆಹ್ವಾಗ್, ಧವನ್, ಪೂಜಾರ ಹಿಂದಿನ ನಾಲ್ವರು ಸಾಧಕರು.

2: ದೇವದತ್ ಪಡಿಕ್ಕಲ್ ಶ್ರೀಲಂಕಾ ನೆಲದಲ್ಲಿ 3ನೇ ಕ್ರಮಾಂಕದಲ್ಲಿ 150 ರನ್ ಗಳಿಸಿದ 2ನೇ ಭಾರತೀಯರೆನಿಸಿದರು. 2017ರಲ್ಲಿ ಚೇತೇಶ್ವರ ಪೂಜಾರ (153) ಗಾಲೆಯಲ್ಲೇ ಈ ಸಾಧನೆ ಮಾಡಿದ್ದರು.