ಡೇವಿಸ್ ಕಪ್: ಮೊದಲ ದಿನವೇ ಭಾರತಕ್ಕೆ ಹಿನ್ನಡೆ

ಸಿಯೋಲ್ ಒಲಿಂಪಿಕ್ ಪಾರ್ಕ್ ಟೆನಿಸ್ ಸೆಂಟರ್‌ನಲ್ಲಿ ಶುಕ್ರವಾರ ನಡೆದ ಮೊದಲ ಸಿಂಗಲ್ಸ್ ಪಂದ್ಯದಲ್ಲಿ 26 ವರ್ಷದ ದಕ್ಷಿಣೇಶ್ವರ್ ಸುರೇಶ್ 6-3, 3-6, 4-6ರಿಂದ 3 ಸೆಟ್‌ಗಳ ಸೆಣಸಾಟದಲ್ಲಿ ವಿಶ್ವ ನಂ. 157 ಸುನ್ವೂ ಕ್ವೊನ್ ಎದುರು ಸೋಲು ಅನುಭವಿಸಿದರು. ವಿಶ್ವ ನಂ.367 ದಕ್ಷಿಣೇಶ್ವರ್ ಮೊದಲ ಸೆಟ್‌ನಲ್ಲಿ ಮೇಲುಗೈ ಸಾಧಿಸಿದರೂ, ನಂತರದ 2 ಸೆಟ್‌ನಲ್ಲಿ ನಿರಾಸೆ ಅನುಭವಿಸಿದರು. ಇದುವರೆಗೆ ಡೇವಿಸ್ ಕಪ್‌ನಲ್ಲಿ ಆಡಿದ 5ರಲ್ಲಿ ದಕ್ಷಿಣೇಶ್ವರ್‌ಗೆ ಮೊದಲ ಸೋಲು ಇದಾಗಿದೆ.

ನಂತರ ಎರಡನೇ ಸಿಂಗಲ್ಸ್‌ನಲ್ಲಿ ಭಾರತದ ಅಗ್ರ ತಾರೆ ಸುಮಿತ್ ನಗಾಲ್ 6-2, 4-6, 5-7ರಿಂದ ಹಿಯಾನ್ ಚುಂಗ್ ಎದುರು ಪರಾಭವಗೊಂಡರು. ಮೂರು ಗಂಟೆ 6 ನಿಮಿಷಗಳ ಪೈಪೋಟಿಯಲ್ಲಿ ನಗಾಲ್, ಮೊದಲ ಸೆಟ್ ಗೆದ್ದರೂ ಬಳಿಕ ತನಗಿಂತ 300 ಸ್ಥಾನ ಕೆಳಗಿರುವ ಆಟಗಾರನ ಎದುರು ಮುಗ್ಗರಿಸಿದರು.

ಶನಿವಾರ ನಡೆಯಲಿರುವ ಡಬಲ್ಸ್ ಪಂದ್ಯ ಭಾರತದ ಪಾಲಿಗೆ ನಿರ್ಣಾಯಕವಾಗಿದ್ದು, ಅನುಭವಿ ಎನ್. ಶ್ರೀರಾಮ್ ಬಾಲಾಜಿ-ನಿಕಿ ಪೂಣಚ ಜತೆಯಾಗಿ ಆಡಲಿದ್ದಾರೆ. ಭಾರತ ಉಳಿದಿರುವ ಮೂರು ಪಂದ್ಯಗಳಲ್ಲಿ ಗೆದ್ದರಷ್ಟೇ, 1996ರ ಡೇವಿಸ್ ಕಪ್ ಕ್ವಾರ್ಟರ್​ಫೈನಲ್​ಗೇರಬಹುದಾಗಿದೆ. 2010, 2018ರಲ್ಲಿ ಕ್ರಮವಾಗಿ ಬ್ರೆಜಿಲ್, ಚೀನಾ ಎದುರು 0-2 ಹಿನ್ನಡೆಯ ನಡುವೆಯೂ ಪುಟಿದೆದ್ದು ಗೆಲುವು ಕಂಡಿರುವ ಭಾರತ ಅದೇ ಸಾಧನೆ ಪುನರಾವರ್ತಿಸುವ ಅನಿವಾರ್ಯತೆಯಲ್ಲಿದೆ.