ಕರ್ನಾಟಕ ಕ್ರಿಕೆಟ್ ತಂಡಕ್ಕೆ 'ದಾವಣಗೆರೆ ಎಕ್ಸ್‌ಪ್ರೆಸ್' ಎಂಟ್ರಿ! ಹೆಡ್ ಕೋಚ್ ಆಗಿ ಆರ್. ವಿನಯ್ ಕುಮಾರ್ ಆಯ್ಕೆ! Vinay Kumar

ಬೆಂಗಳೂರು: ಕರ್ನಾಟಕದ ಕ್ರಿಕೆಟ್ ಅಭಿಮಾನಿಗಳಿಗೆ ಸಿಹಿಸುದ್ದಿಯೊಂದು ಸಿಕ್ಕಿದ್ದು, ಮುಂಬರುವ 2026-27ರ ದೇಶೀಯ ಕ್ರಿಕೆಟ್ ಋತುವಿನಲ್ಲಿ ಕರ್ನಾಟಕ ಪುರುಷರ ಕ್ರಿಕೆಟ್ ತಂಡದ ಹೊಸ ಮುಖ್ಯ ಕೋಚ್ ಆಗಿ ಟೀ ಇಂಡಿಯಾ ಹಾಗೂ ಹಾಗೂ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ಮಾಜಿ ಬೌಲರ್ ಆರ್. ವಿನಯ್ ಕುಮಾರ್ (Vinay Kumar) ನೇಮಕಗೊಳ್ಳುವುದು ಬಹುತೇಕ ಖಚಿತವಾಗಿದೆ.

ವರದಿ ಮಾಡಿರುವ ಪ್ರಕಾರ, ಈ ಹಿಂದೆ ರಾಜ್ಯ ತಂಡವನ್ನು ಮುನ್ನಡೆಸಿ ಕೀರ್ತಿ ತಂದುಕೊಟ್ಟಿದ್ದ ದಿಗ್ಗಜನ ಕೈಗೆ ಈಗ ಮತ್ತೆ ತಂಡದ ಹತೋಟಿ ದೊರೆತಿದ್ದು, ವಿನಯ್ ಕುಮಾರ್ ಕರ್ನಾಟಕ ಕ್ರಿಕೆಟ್ ತಂಡದ ಡಗೌಟ್ ಜವಾಬ್ದಾರಿಯನ್ನು ವಹಿಸಿಕೊಳ್ಳಲಿದ್ದಾರೆ.

ಕೇವಲ ವಿನಯ್ ಕುಮಾರ್ ಮಾತ್ರವಲ್ಲದೆ, ಅವರೊಂದಿಗೆ ಕರ್ನಾಟಕ ತಂಡದ ಮತ್ತೊಬ್ಬ ಮಾಜಿ ಆಟಗಾರ ದೀಪಕ್ ಚೌಗುಲೆ ಫೀಲ್ಡಿಂಗ್ ಕೋಚ್ ಆಗಿ ಅಧಿಕಾರ ಸ್ವೀಕರಿಸಲಿದ್ದಾರೆ. ಇದರೊಂದಿಗೆ, ತಂಡದ ಪ್ರಸ್ತುತ ಬೌಲಿಂಗ್ ಕೋಚ್ ಆಗಿ ಕಾರ್ಯನಿರ್ವಹಿಸುತ್ತಿರುವ ಮನ್ಸೂರ್ ಅಲಿ ಖಾನ್ ಮುಂಬರುವ ಋತುವಿನಲ್ಲೂ ತಮ್ಮ ಜವಾಬ್ದಾರಿಯಲ್ಲಿ ಮುಂದುವರಿಯುವ ಸಾಧ್ಯತೆಯಿದೆ ಎಂದು ಹೇಳಲಾಗುತ್ತಿದೆ.

ಕರ್ನಾಟಕ ಕ್ರಿಕೆಟ್ ಇತಿಹಾಸದಲ್ಲಿ 2013-14 ಹಾಗೂ 2014-15ರ ಸೀಸನ್‌ಗಳನ್ನು ಯಾರೂ ಮರೆಯಲು ಸಾಧ್ಯವಿಲ್ಲ. ಅಂದು ನಾಯಕ ವಿನಯ್ ಕುಮಾರ್ ಅವರ ಅಮೋಘ ಸಾರಥ್ಯದಲ್ಲಿ ಕರ್ನಾಟಕ ತಂಡವು ಸತತವಾಗಿ ರಣಜಿ ಟ್ರೋಫಿ, ವಿಜಯ್ ಹಜಾರೆ ಟ್ರೋಫಿ ಹಾಗೂ ಇರಾನಿ ಕಪ್‌ಗಳನ್ನು ಬಾಚಿಕೊಂಡಿತ್ತು. ಈಗ ಅದೇ ವಿನಯ್ ಕುಮಾರ್ ಕೋಚ್ ಆಗಿ ವಾಪಸ್ ಆಗುತ್ತಿರುವುದರಿಂದ ತಂಡದಲ್ಲಿ ಹೊಸ ಉತ್ಸಾಹ ಮೂಡಿದೆ ಎಂದರೆ ತಪ್ಪಾಗದು.

ಆರ್. ವಿನಯ್ ಕುಮಾರ್ ತಮ್ಮ ಆಟದ ಜೀವನದಲ್ಲಿ ಭಾರತದ ಪರ 1 ಟೆಸ್ಟ್, 31 ಏಕದಿನ ಮತ್ತು 9 ಟಿ20 ಪಂದ್ಯಗಳನ್ನು ಆಡಿದ್ದಾರೆ. ಅಷ್ಟೇ ಅಲ್ಲದೆ ಐಪಿಎಲ್‌ನಲ್ಲಿ ಆರ್​ಸಿಬಿ, ಮುಂಬೈ ಇಂಡಿಯನ್ಸ್, ಕೊಲ್ಕತ್ತಾ ನೈಟ್ ರೈಡರ್ಸ್ ಹಾಗೂ ಕೊಚ್ಚಿ ಟಸ್ಕರ್ಸ್ ಪರ ಒಟ್ಟು 105 ಪಂದಳನ್ನಾಡಿ ಸೈ ಎನಿಸಿಕೊಂಡಿದ್ದಾರೆ. 2021ರಲ್ಲಿ ಕ್ರಿಕೆಟ್‌ಗೆ ಗುಡ್‌ಬೈ ಹೇಳಿದ ಬಳಿಕ, ಮುಂಬೈ ಇಂಡಿಯನ್ಸ್ ತಂಡಕ್ಕೆ ಟ್ಯಾಲೆಂಟ್ ಸ್ಕೌಟ್ ಆಗಿ, ಕಾಮೆಂಟೇಟರ್ ಆಗಿ ಹಾಗೂ ಎಂಐ ಎಮಿರೇಟ್ಸ್ ಬೌಲಿಂಗ್ ಕೋಚ್ ಆಗಿ ಅನುಭವ ಸಂಪಾದಿಸಿದ್ದಾರೆ.

ಎಂಟು ಬಾರಿಯ ರಣಜಿ ಚಾಂಪಿಯನ್ ಆಗಿರುವ ಕರ್ನಾಟಕ ತಂಡವು ಕಳೆದ ಋತುವಿನಲ್ಲಿ ಫೈನಲ್ ತಲುಪಿ ಸ್ವಲ್ಪದರಲ್ಲಿ ಪ್ರಶಸ್ತಿ ಕೈತಪ್ಪಿಸಿಕೊಂಡಿತ್ತು.

ಈ ಬಾರಿ 2026-27ರ ರಣಜಿ ಟ್ರೋಫಿಯ ಎಲೈಟ್ ಗ್ರೂಪ್ 'ಬಿ' ನಲ್ಲಿ ಸ್ಥಾನ ಪಡೆದಿರುವ ಕರ್ನಾಟಕ ತಂಡವು ಹೈದರಾಬಾದ್, ತ್ರಿಪುರ, ಆಂಧ್ರ, ಪಂಜಾಬ್, ಅಸ್ಸಾಂ, ಸೌರಾಷ್ಟ್ರ ಮತ್ತು ಛತ್ತೀಸ್‌ಗಢ ತಂಡಗಳನ್ನು ಎದುರಿಸಲಿದೆ.

ಮತ್ತೆ ರಾಜ್ಯ ತಂಡಕ್ಕೆ ದೇಶೀಯ ಟ್ರೋಫಿಗಳನ್ನು ಗೆದ್ದುಕೊಡುವುದೇ ವಿನಯ್ ಕುಮಾರ್ ಅವರ ಮುಂದಿರುವ ಮುಖ್ಯ ಗುರಿ ಎಂದು ಹೇಳಲಾಗುತ್ತಿದೆ. ಕರ್ನಾಟಕ ತಂಡಕ್ಕೆ ದಾವಣಗೆರೆ ಎಕ್ಸ್‌ಪ್ರೆಸ್ ಸಾಥ್ ಯಾವ ಮಟ್ಟಿಗೆ ಕೈಹಿಡಿಯಲಿದೆ ಎಂಬುದನ್ನು ಕಾದು ನೋಡಬೇಕಿದೆ, (ಏಜನ್ಸೀಸ್​).