6,6,6... ಈ ತಪ್ಪು ಮಾಡಬಾರದಿತ್ತು ಸಿಎಸ್​ಕೆ! ಮೊದಲ ಇನ್ನಿಂಗ್ಸ್​ನಲ್ಲೇ ಸೇಡು ತೀರಿಸಿಕೊಂಡ ಜಡೇಜಾ​ | CSK vs RR

CSK vs RR: ಇಂದು (ಮಾ.30) ಅಸ್ಸಾಂನ ಗುವಾಹಟಿ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಐಪಿಎಲ್​ 19ನೇ ಆವೃತ್ತಿಯ ಮೂರನೇ ಪಂದ್ಯದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್​ ಮತ್ತು ರಾಜಸ್ಥಾನ ರಾಯಲ್ಸ್ ತಂಡಗಳು ಮುಖಾಮುಖಿಯಾಗಿವೆ.

ಟಾಸ್​ ಗೆದ್ದು ಬೌಲಿಂಗ್ ಆಯ್ದುಕೊಂಡ ಆರ್​ಆರ್​, ರುತುರಾಜ್ ಪಡೆಗೆ ಬ್ಯಾಟಿಂಗ್ ಮಾಡುವಂತೆ ಆಹ್ವಾನಿಸಿತು. ಅಂತೆಯೇ, ಬ್ಯಾಟ್​ ಮಾಡಿದ ಸಿಎಸ್​ಕೆಗೆ ಯಾವೊಬ್ಬ ಬ್ಯಾಟರ್​ ಕೂಡ ಉತ್ತಮ ಸಾಥ್​ ನೀಡಲಿಲ್ಲ. ಆರಂಭಿಕರಾದ ಕ್ಯಾಪ್ಟನ್​ ರುತುರಾಜ್ ಗಾಯಕ್ವಾಡ್ (6 ರನ್​)​ ಮತ್ತು ಸಂಜು ಸ್ಯಾಮ್ಸನ್ (6)​ ಒಂದಂಕಿಗೆ ಬಹುಬೇಗನೇ ಪೆವಿಲಿಯನ್​ ಹಾದಿಹಿಡಿದರು.

ಅವರ ಹಾದಿಯನ್ನೇ ಹಿಡಿದ ಆಯುಷ್​ ಮಾತ್ರೆ (0), ಮ್ಯಾಟ್​ ಶಾರ್ಟ್ (2)​ ಮತ್ತು ಶಿವಂ ದುಬೆ (6) ಅವರಿಂದಲೂ ಉತ್ತಮ ಇನ್ನಿಂಗ್ಸ್​ ಬರಲಿಲ್ಲ. ಇನ್ನು ಅಪಾರ ನಿರೀಕ್ಷೆಯಿಂದ ಹರಾಜಿನಲ್ಲಿ ಖರೀದಿ ಮಾಡಿದ್ದ ಸರ್ಫರಾಜ್​ ಖಾನ್ (17)​, ಸ್ಫೋಟಕ ಶುರು ನೀಡಿದ್ದೇ ಆದರೂ ಮುಂದುವರಿಸುವಲ್ಲಿ ಮುಗ್ಗರಿಸಿದರು. ಈ ಮಧ್ಯೆ, ಜೆಮೀ ಓವರ್​ಟರ್ನ್ (30)​ ಅವರ ಏಕಾಂಗಿ ಹೋರಾಟದಿಂದ ತಕ್ಕಮಟ್ಟಿಗಿನ ಪ್ರದರ್ಶನ ಮೂಡಿಬಂದಿದ್ದು, ತಂಡದ ಮೊತ್ತ 100ರ ಗಡಿದಾಟಿತು.

ಚೆನ್ನೈ ಬ್ಯಾಟರ್​ಗಳನ್ನು ಆರಂಭದಿಂದಲೇ ಕಟ್ಟುಹಾಕಿದ ರಾಜಸ್ಥಾನ ರಾಯಲ್ಸ್ ಪಡೆಯ ಬೌಲರ್​ಗಳು, ಬಹುಮುಖ್ಯ ವಿಕೆಟ್​ಗಳನ್ನೇ ಕಬಳಿಸಿದರು. ಇನ್ನು ಎಷ್ಟೋ ವರ್ಷಗಳಿಂದ ಸಿಎಸ್​ಕೆಗೆ ಆಡಿದ್ದ ಜಡೇಜಾರನ್ನು ಸಂಜು ಸ್ಯಾಮ್ಸನ್​ ಅವರಿಗೋಸ್ಕರ ಟ್ರೇಡ್​ ಮಾಡಿದ ಫ್ರಾಂಚೈಸಿಗೆ ಮೊದಲ ಪಂದ್ಯದಲ್ಲೇ ಜಡೇಜಾ ತಪ್ಪಿನ ಅರಿವು ಮೂಡಿಸಿದ್ದು ವಿಶೇಷ.

ಕೇವಲ ಒಂದೇ ಓವರ್​ನಲ್ಲಿ ಇಬ್ಬರ ವಿಕೆಟ್​ ಪಡೆದ ಜಡೇಜಾ, ಮೊದಲ ಇನ್ನಿಂಗ್ಸ್​ನಲ್ಲೇ ಗುಲಾಬಿ ಬಣ್ಣದ ಜೆರ್ಸಿಯಲ್ಲಿ ಸಿಎಸ್​ಕೆಗೆ ಪರೋಕ್ಷ ಎಚ್ಚರಿಕೆ ನೀಡಿದರು. ಜೋಫ್ರಾ ಆರ್ಚರ್​, ನಂದ್ರೆ ಬರ್ಗರ್​ ತಲಾ ಎರಡು, ಬ್ರಿಜೇಶ್ ಶರ್ಮ ಮತ್ತು ಸಂದೀಪ್ ಶರ್ಮ, ರವಿ ಬಿಷ್ಣೋಯಿ ತಲಾ ಒಂದು ವಿಕೆಟ್​ಗಳನ್ನು ಪಡೆಯುವ ಮೂಲಕ ತಂಡದ ಪರ ಮಿಂಚಿದರು. 19.4 ಓವರ್​ಗೆ ಆಲ್​ಔಟ್​ ಆದ ಸಿಎಸ್​ಕೆ, ಕೇವಲ 127 ರನ್ ಕಲೆಹಾಕಲಷ್ಟೇ ಶಕ್ತವಾಯಿತು.