ಚಿನ್ನಸ್ವಾಮಿಯಲ್ಲಿ ರನ್​ಗಳ ಸುನಾಮಿ... ಆರ್​ಸಿಬಿ ಆರ್ಭಟದ ಮುಂದೆ ಅಡಗಿತು ಸಿಂಹ ಘರ್ಜನೆ! ಸಿಎಸ್​ಕೆಗೆ ಸತತ 3ನೇ ಸೋಲು | CSK vs RCB

CSK vs RCB: ಬೆಂಗಳೂರಿನ ಎಂ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ ಚೆನ್ನೈ ಸೂಪರ್​ ಕಿಂಗ್ಸ್​ ಮತ್ತು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡಗಳ ನಡುವಿನ ಐಪಿಎಲ್​ 19ನೇ ಆವೃತ್ತಿಯ 11ನೇ ಪಂದ್ಯದಲ್ಲಿ ಆರ್​ಸಿಬಿ ಒನ್​ ಸೈಡೆಡ್​ ಆಗಿ 43 ರನ್​ಗಳ ಅಂತರದಲ್ಲಿ ಜಯ ಸಾಧಿಸಿತು. 

ಟಾಸ್​ ಗೆದ್ದ ಸಿಎಸ್​ಕೆ ನಾಯಕ ರುತುರಾಜ್ ಗಾಯಕ್ವಾಡ್​, ಆರ್​ಸಿಬಿಗೆ ಮೊದಲು ಬ್ಯಾಟ್ ಮಾಡಲು ಆಹ್ವಾನಿಸಿದರು. ಅಂತೆಯೇ, ಕಣಕ್ಕಿಳಿದ ಚಾಲೆಂಜರ್ಸ್​ ಪಡೆಯ ಆರಂಭಿಕರಾದ ವಿರಾಟ್​ ಕೊಹ್ಲಿ ಮತ್ತು ಫಿಲ್​ ಸಾಲ್ಟ್​, ಪವರ್​ಪ್ಲೇಯಲ್ಲಿ ಉತ್ತಮ ಓಪನಿಂಗ್ ನೀಡುವಲ್ಲಿ ವಿಫಲರಾದರು. ಕೇವಲ 28 ರನ್​ಗೆ ಕೊಹ್ಲಿ ಔಟಾದರೆ, ಸಾಲ್ಟ್​ 46 ರನ್​ಗಳನ್ನು ಸಿಡಿಸಿ ಪೆವಿಲಿಯನ್​ಗೆ ಹಿಂತಿರುಗಿದರು. ಅವರ ನಂತರದಲ್ಲಿ ಬಂದ ದೇವದತ್ತ ಪಡಿಕಲ್, ರಜತ್ ಪಾಟಿದಾರ್​ ಮತ್ತು ಟಿಮ್​ ಡೇವಿಡ್​ರ ಸ್ಫೋಟಕ ಇನ್ನಿಂಗ್ಸ್ ತಂಡದ ಮೊತ್ತವನ್ನು 250ರ ಗಡಿದಾಟಿಸಿತು.

ಆರ್​ಸಿಬಿ ನೀಡಿದ 251 ರನ್​ಗಳ ಬೃಹತ್ ಗುರಿಯನ್ನು ಬೆನ್ನತ್ತಿದ ಸಿಎಸ್​ಕೆಗೆ ಎಂದಿನಂತೆ ಆರಂಭಿಕರು ಆರಂಭಿಕ ಹಂತದಲ್ಲೇ ಕೈಕೊಟ್ಟರು. ನಾಯಕ ರುತುರಾಜ್ ಗಾಯಕ್ವಾಡ್ (7 ರನ್​) ಮತ್ತು ಸಂಜು ಸ್ಯಾಮ್ಸನ್ (9)​ ಕೇವಲ​ ಒಂದಂಕಿಗೆ ಪೆವಿಲಿಯನ್ ಹಾದಿ ಹಿಡಿದರು. ಅವರ ಬೆನ್ನಲ್ಲೇ ಆಯುಷ್​ ಮಾತ್ರೆ (1) ಕೂಡ ಔಟ್​ ಆದರು. ಇನ್ನು ತಂಡದ ಮೊತ್ತವನ್ನು 100 ಗಡಿದಾಟಿಸಲು ಕೊಡುಗೆ ನೀಡಿದ್ದು ಸರ್ಫರಾಜ್ ಖಾನ್ (50)​, ಪ್ರಶಾಂತ್ ವೀರ್ (43) ಮತ್ತು ಜೆಮೀ ಓವರ್​ಟನ್ (37) ಮಾತ್ರ. 

10 ಓವರ್​ವರೆಗೆ 90 ರನ್​ಗಳನ್ನು ಹೊಂದಿದ್ದ ಆರ್​ಸಿಬಿಗೆ ಬಲ ತುಂಬಿದ್ದೇ ದೇವದತ್ತ ಪಡಿಕಲ್​ ಅವರ ಆಕರ್ಷಕ ಅರ್ಧಶತಕ. ಪಡಿಕಲ್​ಗೆ ಸಾಥ್​ ನೀಡಿದ ಕ್ಯಾಪ್ಟನ್​ ರಜತ್ ಪಾಟೀದಾರ್​ ಕೂಡ ಕಡಿಮೆ ಎಸೆತಗಳಲ್ಲಿ ಸ್ಫೋಟಕ ಸಿಕ್ಸರ್​, ಬೌಂಡರಿಗಳನ್ನು ಬಾರಿಸಿದರು. ಇವರಿಬ್ಬರ ಹಾದಿಯನ್ನೇ ಹಿಡಿದ ದೈತ್ಯ ಟಿಮ್ ಡೇವಿಡ್​ ಬ್ಯಾಕ್​ ಟು ಬ್ಯಾಕ್ ಸಿಕ್ಸರ್​ಗಳನ್ನು ಸಿಡಿಸಿದರು. ಇದು ಮತ್ತೊಮ್ಮೆ ಚೆನ್ನೈ ಪಡೆಯ ಬೌಲರ್​ಗಳ ಸಾಮರ್ಥ್ಯವನ್ನು ಪ್ರಶ್ನಿಸುವಂತೆ ಮಾಡಿತು. 

ಮೊದಲೆರೆಡು ಪಂದ್ಯಗಳಲ್ಲಿಯೂ ಪವರ್​ಪ್ಲೇಯಲ್ಲಿ ವಿಕೆಟ್​ ಪಡೆಯಲು ಪರದಾಡಿದ ಸಿಎಸ್​ಕೆ ಬೌಲರ್​ಗಳು, ರಜತ್ ಪಡೆಯ ವಿರುದ್ಧವೂ ವಿಕೆಟ್​ ಕೀಳಲು ತೀರ ಹೆಣಗಾಡಿದರು. ಚೆನ್ನೈ ಬೌಲರ್​ಗಳಿಗೆ ನೀರು ಕುಡಿಸಿದ ಆರ್​ಸಿಬಿ, 20 ಓವರ್​ನಲ್ಲಿ 3 ವಿಕೆಟ್​ ನಷ್ಟಕ್ಕೆ 250 ರನ್ ಕಲೆಹಾಕಿತು. ಈ ಬೃಹತ್​ ಗುರಿಯನ್ನು ತಲುಪುವಲ್ಲಿ ಮುಗ್ಗರಿಸಿದ ಸಿಎಸ್​ಕೆ, ಸತತವಾಗಿ ಮೂರು ಸೋಲುಗಳನ್ನು ಉಂಡಿದೆ.